1. Nana, ko koe, he mea karanga, he mea whiriwhiri hoki hei tuhituhi i te Pukapuka a Moromona, ki taku mahi minita ano hoki; me tenei ano naku koe i hiki ake i roto i ou mamaetanga, me te tohutohu ano i a koe, he mea whakaputa mai koe i ou hoa-riri katoa, he mea whakaputa mai ano hoki koe i roto i nga mana o Hatana me te pouritanga.

2. Heoi, e kore koe e whakatikaia i roto i ou takahanga i te ture; heoi ra, haere i to ara, a, kati te hara.

3. Whakanuia tou karangatanga; a i muri i tau tiringa i ou maara me tau whakaritenga i nga mea katoa, kia hohoro tau haere ki te Hahi i Kourawira, i Wheieta me Manaheta, a ka tautokona ake koe e ratou; a ka manaakitia ratou e ahau ki nga mea mo te wairua, ki nga mea ano hoki mo tenei oranga;

4. Otira, me he mea ratou ki te kahore e manako mai ki a koe, ka tukua atu e ahau he kanga ki runga i a ratou, kaore he manaakitanga.

5. A me hono tonu to karanga ki te Atua i roto i toku ingoa, me te tuhituhi ano i nga mea e hoatu ai e te Kai-whakamarie ki a koe, me te whakamarama ano i nga Karaipiture katoa ki te Hahi;

6. A tera e hoatu ki a koe i taua wa pu ano te mea e korero ai, e tuhituhi ai koe, a tera ratou ka rongo ki taua mea, ki te kahore, ka tukua atu e ahau ki a ratou he kanga, kaore he manaakitanga.

7. No te mea, me whakapau katoa e koe au mahi ki roto i Hiona; a e whiwhi koe ki te kaha i roto i tenei.

8. Kia manawanui i roto i nga mamaetanga, he maha hoki nga mea pera e pa ki a koe; otira kia u ake koe i roto i nga pera, no te mea, nana, ko ahau kei a koe, taea noatia te mutunga o ou ra.

9. A i roto i nga mahi mo tenei oranga e kore koe e whai kaha, no te mea, e hara tenei i tou karangatanga. Whakaritea to karangatanga, a ka whiwhi koe ki nga mea e whakanui ai koe i to turanga, me te whakamarama ano i nga Karaipiture katoa, a kia hono tonu ki te whakapa i nga ringaringa me te whakau ano i nga peka o te Hahi.

10. A ko tou teina, ko Oriwa, me u tonu ia ki te kawe atu i toku ingoa ki te ao, ki te Hahi ano hoki. A kaua ia e whakaaro tera e rawaka nga kupu e whakapuakina e ia i roto i taku mahi; a, nana, kei a ia ahau taea noatia te mutunga.

11. E whiwhi ia ki te kororia i roto i a au, a kahore i a ia ake ano, ahakoa i roto i te ngoikoretanga, i te kaha ranei, ahakoa ranei i roto i nga mekameka, i te here-koretanga ranei.

12. A i nga wa katoa, i nga wahi katoa ano hoki, me hamama tona mangai, me te whakapuaki i taku Rongo-pai ano he reo tetere te rite, i te ao, i te po. A ka hoatu e ahau ki a ia he kaha kahore nei tona rite 1 mohiotia noatia i roto i nga tangata.

13. Kaua e hiahia ki nga merekara, engari kia matua whakahau ra ano ahau i a koe, haunga i nga wa e peia atu ai nga rewera, i nga whakaoranga turoro ranei, i nga whakakorenga ranei i nga nakahi whakamate, me nga paitini whakamate;

14. A ko enei mea kaua e mahia noatia e koe, engari kia matua rapua i a koe, e te hunga e hiahia ana ki taua mea, he mea kia rite ai nga Karaipiture; no te mea, me rite tau meatanga ki tera kua oti te tuhituhi.

15. A ko te kainga e tomo ai koe, a kahore ratou e manako ki a koe i roto i toku ingoa, me waiho e koe he kanga ki reira, kaua he manaakitanga, ara, ma runga i te ruinga i te puehu o ou waewae hei whakahe i a ratou, ma te horoitanga ano hoki i ou waewae i te huarahi.

16. A tenei ake te wa, ko te hunga e pa ai o ratou ringaringa ki a koe he hanga kino i a koe, me whakahau e koe i roto i toku ingoa kia patua; a, nana, ka rite ki au kupu taku patu i a ratou, i taku wa e rite ai.

17. A ko ia e kawe ana i a koe ki te ture, ma te ture ano ia ka kanga ai.

18. A kaua koe e hari he whitiki, he putea ranei mou, kaua ano hoki nga tokotoko, kaua e takiruatia nga koti, no te mea ma te Hahi e whakawhiwhi koe i taua haora pu ano e hiahia ai koe ki te kai, ki te kakahu, me nga hu, me te moni, me te putea hoki.

19. No te mea kua karangatia koe ki te whakapai i toku maara waina i runga ano i te tapahanga tino kaha, ae ra, hoki, mo te wa whakamutunga. Ae ra, me te hunga ano hoki kua whakaritea na e koe, kia rite to ratou mahi ki tenei tauira. Amine.