1. Ko te kupu tenei a te Ariki, he pono, he pono taku e mea atu nei ki a koe e taku tama, e murua ana ou hara, rite tonu ki tau i tono ai, kua tae ake hoki ki oku taringa au inoi, me nga inoinga a ou teina;

2. No reira, atu inaianei e manaakitia ana koe, te tangata kei a ia nei nga kii o te rangatiratanga, he mea hoatu ki a koe; ko taua rangatiratanga kua puta mai mo te wa whakamutunga.

3. He pono, ko taku tenei ki a koe, e kore nga kii o tenei rangatiratanga e tangohia mai i a koe, i a koe e ora ana i te ao nei, i te ao ranei e haere mai ana;

4. He ahakoa ra, ma roto i a koe e hoatu ai nga mana tapu (oracles) ki tetahi atu; ae ra, e hoatu ai ki te Hahi.

5. A, ko te hunga katoa e whakawhiwhia ana ki nga mana tapu (oracles) a te Atua kia tupato, kia hopohopo ratou ki aua mea, kei whakaaro ratou he mea hanga noa iho aua mea, a ka uru ratou ki raro i te whakaheanga; ka hingahinga ratou, ka whakahoroa ano, i te wa e keri ai te tupuhi, e pupuhi ai nga hau, e ua ai te ua, e aki mai ai ki to ratou whare.

6. Me tenei ano, he pono taku e mea atu nei ki ou teina, ki a Hirini Rikitana raua ko Pererika G. Wiremu, kua murua o raua hara, a, e rite tahi ana to koutou mana ki nga kii o tenei rangatiratanga whakamutunga.

7. A, pera ano ki nga kii o te kura o nga poropiti, ma roto i tau whakahaeretanga, naku ano i whakahau kia whakaturia taua kura,

8. He mea ma reira ratou e whakaakona ai kia tino matau ki nga mahi o roto i to ratou minitatanga hei whakaora i Hiona, i nga iwi o Iharaira, i nga iwi o nga Tauiwi, o te hunga katoa tera ka whakapono,

9. Kia riro ai ma roto i ta koutou whakahaeretanga e whakawhiwhi ratou ki te kupu, a kia riro hoki ma roto i ta ratou na whakahaeretanga e whakahorapa haere te kupu tae noa atu ki nga pito whakamutunga o te ao, ki nga Tauiwi i te tuatahi, a ko reira, nana, me huri ratou ki nga Hurai;

10. A, ko reira tae mai ai te ra e whakakitea mai ai e te Ariki tona ringa i runga i te kaha, hei whakatahuri mai i nga iwi, i nga iwi karakia, i te whare hoki o Hohepa, ki te Rongo-pai o to ratou whakaoranga.

11. No te mea hoki, kei taua ra ka rongo ia tangata, ia tangata i te raneatanga o te Rongo-pai i roto i tona reo ake, he mea na te hunga kua hoatu ki a ratou tenei mana, i runga ano i te mahi a te Kai-whakamarie e ringitia ana ki runga ki a ratou mo te whakakitenga mai o Ihu Karaiti.

12. Na, he pono ko taku kupu tenei ki a koutou, ka hoatu e ahau tetahi whakahaunga ki a koutou, ara kia pumau tonu koutou ki roto ki te mahi minita, kia u hoki i roto i te Tumuakitanga,

13. A, ina mutu ta koutou whakamaoritanga i nga poropiti, me timata ta koutou whakahaere i nga mahi e pai ana ki te Hahi, ki te kura ano hoki;

14. A, i ia wa, i ia wa, ka whiwhi koutou ki nga whakakitenga, rite tonu ki ta te Kai-whakamarie e whakaatu atu ai, hei whakaatu i nga mea ngaro o te rangatiratanga,

15. A meinga kia tu pai nga peka, me ako hoki koutou i a koutou kia matau ai, kia mohio ai ano koutou ki nga tikanga o nga pukapuka papai katoa, kia riro mai ai ano i a koutou te matauranga ki nga reo, ki nga iwi katoa.

16. A, koia tenei te mahi ma koutou, me to koutou mihana ano hoki i nga ra katoa e ora ai koutou, ara ko koutou hei kai whakahaere i roto i nga kaunihera, hei whakatikatika hoki i nga mea katoa e pa ana ki tenei Hahi, ara ki tenei rangatiratanga.

17. Kaua e numinumi, kaua ano e tukua kia raru koutou; engari kia whai whakaaro koutou ina tupu ake te whakapehapeha te whakahi i roto i a koutou, ma reira hoki e mau ai o koutou wairua i te mahanga.

18. Meinga kia pai o koutou whare ake; ko te mangere ia me te paru kia matara rawa i a koutou.

19. Na, he pono ko taku kupu tenei ki a koutou, kia hohoro te whakarite he kainga mo te whanau o tou kaunihera, o tou kai-tuhituhi hoki, o Pererika G. Wiremu:

20. A tukua taku pononga kaumatua, a Hohepa Mete, matua, kia noho tonu ratou ko tona whanau ki runga i te wahi e noho na ia, a kaua e hokona taua wahi, kia whakapuakina mai ra ano e te mangai o te Ariki te kupu.

21. Tukua ano hoki toku kaunihera, ara a Hirini Rikitana kia noho tonu i te wahi e noho na ia, kia matua whakapuakina mai ra ano te kupu e te mangai o te Ariki.

22. A, ma te pihopa e rapu marie tetahi kai whakahaere (agent), ko ia aho hei te tangata whai taonga—he tangata na te Atua, nui hoki te whakapono;

23. Kia ahei ai ia ki te whakaea i nga nama katoa, kia kore ai te whare taonga o te Ariki e ingoa kino i roto i nga tirohanga kanohi a te iwi.

24. Rapua marietia, inoi i nga wa katoa, kia mau hoki te whakapono, a ka rite nga mea katoa hei painga mo koutou, me he mea ki te tika ta koutou haere, ki te mau hoki te mahara ki te kawenata kua kawenata na koutou tetahi ki tetahi.

25. Kaua e nui nga tangata ki o koutou hapu, tera noa ake ki te hapu o Hohepa Mete, matua, ko te tikanga o tenei korero mo te hunga e hara nei i te tamariki na koutou ake;

26. Kia kore ai nga mea kua rite mo koutou, he mea e oti ai taku mahi, e tangohia i a koutou e hoatu nei ma te hunga kihai nei i tau mo aua mea,

27. Ma reira hoki e araia ai koutou, te taea e koutou te whakatutuki nga mea i whakahaua atu e ahau ki a koutou.

28. Me tenei ano, he pono taku e mea atu nei ki a koutou, ko taku e pai ai, me whakawhiwhi taku pononga wahine, a Wiena Tiaki (Vienna Jaques) ki te moni hei utuutu i nga raruraru o tona haerenga ki te whenua o Hiona;

29. A ko te toenga o te moni kia tapu ki a au, a ka utua ia i taku wa e pai ai.

30. He pono taku e mea atu nei ki a koutou, he mea pai ki taku titiro iho, kia haere ia ki te whenua o Hiona, kia whiwhi ai ia ki te wahi tuturu mona, he mea na te ringa o te pihopa,

31. Kia noho ai ia ki reira i roto i te rangimarie ki te mea ka u tonu ia, a kahore e mangere i roto i ona ra katoa, timata atu i tenei wa.

32. Nana, he pono taku e mea atu nei ki a koutou, tuhituhia tenei whakahaunga, me te mea atu ano ki o koutou teina i Hiona, i roto i te mihi aroha, kua karangatia koutou e ahau hei kai whakahaere mo te Hahi ki Hiona ina tae mai toku wa:

33. No reira me mutu to ratou whakahoha i a au mo tenei mea.

34. Nana, ko taku kupu tenei ki a koutou, e timata haere ana te ripeneta o o koutou teina i Hiona, a kei te hari nga anahera mo ratou;

35. He ahakoa ra, kahore ahau i te ahuareka ki etahi mea, kahore hoki ahau i te ahuareka ki taku pononga, ki a Wiremu E. Makarerini (William E. McLellin), ki taku pononga ranei ki a Hirini Kiripata (Sydney Gilbert); ki te pihopa ranei, me etahi atu ano, he maha nga mea kia ripenetatia e ratou.

36. Engari, he pono taku e mea atu nei ki a koutou, ka takare tonu ahau te Ariki a Hiona, ka tohe tonu ki ona tangata marohirohi, ka riria ia e ahau taea noatia te wa e whakatahuritia ai ia, e ma ai ano i mua i a au:

37. E kore ano ia e whakanekehia atu i tona wahi. Naku, na te Ariki tenei i whakapuaki. Amine.