1. Nana, whakarongo, e koutou katoa e te hunga e noho ana i Hiona, e koutou hoki e nga iwi o taku Hahi, e noho ana i tawhiti, whakarongo ki te kupu a te Ariki, e hoatu nei e ahau ki taku pononga ki a Hohepa Mete, tamaiti, ki taku pononga hoki ki a Matini Harihi, ki taku pononga ki a Oriwa Kautere, ki taku pononga ki a Hoani Witima, ki taku pononga ki a Hirini Rikitana, ki taku pononga hoki ki a Wiremu W. Wherapa, he mea whakahau atu ki a ratou;

2. No te mea ka hoatu e ahau he whakahaunga ki a ratou; no kona whakarongo kia whai taringa hoki, ko te kupu hoki tenei a te Ariki ki a ratou.

3. Naku, na te Ariki, ratou i whiriwhiri, i whakarite hoki hei tuari mo nga whakakitenga me nga ture kua hoatu e ahau ki a ratou, mo nga mea ano hoki tera e hoatu e ahau ki a ratou.

4. A ko taku e hiahia nei, hei te ra o te whakawakanga me homai e ratou nga whakaaturanga mo tenei tuaritanga:

5. No kona, naku i whakarite mo ratou, a koia tonu tenei te mahi ma ratou i roto i te Hahi a te Atua, ara hei kai-whakahaere ratou i aua mea, me nga tikanga katoa o aua mea; ae ra, i nga painga ano hoki e puta ana mai i aua mea.

6. No reira, he whakahaunga tenei ka hoatu e ahau ki a ratou, ara kia kaua enei mea e hoatu e ratou ki te Hahi, ki te ao ranei:

7. He ahakoa ra me he mea ka nui rawa to ratou whiwhi, ka neke noa ake i nga mea e tika ana mo ratou, e hiahiatia ana e ratou, me kawe atu ki taku whare takotoranga-taonga.

8. A ko nga hua me whakatapu mo te hunga e noho ana i Hiona, me o ratou whakatupuranga ano hoki, ki te mea ka riro mai ratou hei tamariki rite ki nga ture o te kingitanga.

9. Nana, ko ta te Ariki tonu tenei e tono atu ana ki nga tangata katoa i roto i tona tuaritanga, ae ra, ko taku tonu tena, ta te Ariki i whakarite ai, e whakarite ai hoki a muri ake nei ki nga tangata katoa.

10. Nana, kahore tetahi tangata no te Hahi nei ia a te Atua ora e puta ki waho o tenei ture;

11. Ae ra, kahore te pihopa, kahore hoki te kaiwhakahaere o te whare takotoranga-taonga a te Ariki, te tangata ranei kua whakaritea tona tuaritanga ki runga ki nga mea maori;

12. Ko te tangata e whakaritea ana hei kai mahi mo nga mea wairua, ka ea i a ia tona utu, ka pera tonu ano me te hunga kua whakaritea nei hei tuaritanga mo ratou, ara hei kai mahi mo nga mea maori;

13. Ae ra, ka nui ke ake mo ratou, ka tapiritia atu hoki taua nui ki nga whakakitenga mai a te Wairua;

14. Otira i roto i o koutou mea maori kia riterite tonu koutou, kaua ano i runga i te puhaehae, kei ai he take e puritia ai te nuinga o nga whakakitenga mai a te Wairua.

15. Na ko tenei whakahaunga e hoatu ana e ahau ki aku pononga, hei painga mo ratou, i a ratou e ora ana, kia meinga hei whakakitenga atu i aku manaakitanga ki runga i o ratou matenga hei utu mo to ratou uaua, hei mea ano hoki e pumau ai ratou;

16. Hei mea ano e whiwhi ai ratou ki te kai, ki te kakahu; ki te kainga; ki nga whare, ki nga whenua, ahakoa he aha nga wahi e whakanohoia ai ratou e ahau e te Ariki, ahakoa ranei tonoa ratou e ahau, e te Ariki, ki whea;

17. No te mea kua manawanui ratou i nga mea maha, kua pai ano a ratou mahi, i te mea kahore ratou i hara.

18. Nana, ko ahau, ko te Ariki, he aroha, a ka manaaki ahau i a ratou; a ka uru ratou ki roto i te hari o enei mea. Ae, ka pera ano. Amine.