Wahanga 125
He whakakitenga i homai ma roto i a Hohepa te Matakite, i Nawu, Takiwa o Hanakaka, Irinoi, i a Maehe, 1841, he mea mo te Hunga Tapu o te Takiwa o Aiowa.
1. “He aha te whakaaro o te Ariki, mo te Hunga Tapu e noho i te Takiwa o Aiowa?”
2. He pono, ko te kupu tenei a te Ariki, na ka mea atu ahau ki a koutou, ko te hunga katoa e karanga ana i a ratou ki toku ingoa e whakamatau ana hoki kia Hunga Tapu ratou maku, ki te mea ka ngohengohe ratou ki a au ka pupuri hoki i aku ture mo ratou; na me huihui ratou ki nga wahi e whakakitea e ahau mo ratou ki taku pononga ki a Hohepa, me te hanga ano i nga pa ki toku ingoa kia noho rite ai ratou mo nga mea kei a au e pupuri ana a te wa e haere mai nei.
3. Me whakaara e ratou tetahi pa ki toku ingoa ki runga i te whenua, i tawahi atu o te pa o Nawu, a me hua tona ingoa ko Harahemera.
4. Na, e ai ta te Ariki ko te hunga katoa i haere mai i te rawhiti, i te hauauru, i te raki, i te tonga, e hiahia ana ki te noho i reira, me tuku ratou kia noho i reira, kia noho ano hoki i te pa o Nahiwira, i te pa ranei o Nawu, i nga Takiwa katoa ano hoki kua whakaritea, e ahau, e ai ta te Ariki.