1. Ma te kai-tuhituhi a te Ariki kua whiriwhiria nei e ia, mana e whakarite tetahi whakapaparanga me te whakaaturanga hoki o te Hahi mo nga mea katoa e puta mai ai ki Hiona, mo ratou hoki e whakatapua ana i o ratou rawa, e whiwhi ana hoki ki nga wahi tupu e tika nei i te pihopa.

2. Mo to ratou ahua hoki o te ora, mo to ratou whakapono me nga mahi; mo te hunga i taka ano hoki, e taka atu ana i muri i te rironga i a ratou o o ratou wahi tupu.

3. Na, kahore e tika ki ta te Atua whakaaro, ki tana whakahau ranei, kia tuhituhia ngatahitia me te iwi o te Atua, nga ingoa o te hunga kahore nei e whiwhi ki nga wahi tuturu mo ratou i raro i te ture whakatapu, rite tonu ki tana ture i homai nei e ia, he mea e tango whakatekau ai ia i tona iwi, kia tatea ai e ratou te tu i te ra o te riri, i te ra o te tahunga.

4. Kia kauaka hoki e tiaki i o ratou whakapapa, kia kaua ano hoki e kitea ki nga wahi o nga whakaaturanga, nga whakapapa ranei o te Hahi;

5. Kia kore ano hoki e kitea o ratou ingoa, nga ingoa ranei o nga matua, nga ingoa ranei o nga tamariki e tuhituhi iho i roto i te pukapuka o te ture o te Atua, e ai ta te Ariki o nga Mano.

6. Ae ra, e ai ta te reo iti, ngawari, e kohumuhumu ake ana a werohia putia nga mea katoa; a he maha nga wa i meinga ai oku wheua kia tu-wiriwiri, i te mea ka marama te reo, e mea ana:

7. A tenei ake te wa ko ahau, ko te Ariki te Atua ka tono i tetahi he marohirohi, he kaha hoki, e pupuri ana i te hepeta o te mana i tona ringa, e kakahuria ana ki te maramatanga hei kakahu, ka whakapuakina mai nga kupu e tona mangai he kupu mau tonu; ko ona whekau he puna o te pono, hei whakapai i te whare o te Atua, me te whiriwhiri ano (he mea na te rota) nga wahi tupu o nga Hunga Tapu, ko o ratou ingoa nei me nga ingoa o o ratou matua, me nga ingoa o a ratou tamariki e kitea e tuhituhia ana ki roto ki te pukapuka o te ture a te Atua;

8. Ko te tangata ra i karangatia e te Atua, i whakarite hoki ki te totoro tona ringa hei pupuri i te aaka o te Atua, ka hinga ia e te patunga o te mate pera me te rakau e patua ana e te patunga nui o te uira;

9. A, ko ratou katoa kahore nei e kitea ki roto i te pukapuka o te whakamaharatanga, e kore e whiwhi ki te wahi tupu i taua ra, engari ka patua ratou ki waenga, ka whiwhia ngatahitia a ratou wahi mo ratou kei roto i te hunga whakapono-kore, ki te wahi o te auetanga me te teteatanga o nga niho.

10. Ko enei mea e hara ia i te korero naku ake; no reira e ai ta te Ariki i korero ai, e whakatutukitia ana e ia.

11. A, ko ratou nei no te Tohungatanga Nui, e kore nei e kitea o ratou ingoa e tuhituhia ana i roto i te pukapuka o te ture—e mohiotia ana kua taka atu ki waho, kua tapahia atu ranei i te Hahi, ko nga tangata o te tohungatanga iti ranei, ko nga mema ranei a taua ra e kore ratou e kite i tetahi wahi tupu ki waenganui i nga Hunga Tapu o te Runga Rawa;

12. Ka meinga kia peratia ki a ratou me te mea i whakaritea ki nga tamariki a te tohunga, e korero ana mo taua mea i te pukapuka a Etera, te rua o nga upoko, te ono tekau ma tahi me te ono tekau ma rua o nga rarangi.