1. Whakarongo e koutou, e nga kaumatua o taku Hahi, tukua mai hoki o koutou taringa ki taku kupu, kia matau ano ki taku e pai ai mo koutou, mo tenei whenua ano hoki i tonoa atu nei koutou ki reira.

2. No te mea, he pono taku e mea atu nei ki a koutou, ka koa te tangata e pupuri ana i aku ture, ahakoa i roto i te ora i te mate ranei; a ko ia e u ana i roto i te whakapawera, ka nui ake te utu mona i roto i te kingitanga o te rangi.

3. I tenei wa e kore o koutou kanohi e kite, i te whakaaro o te Atua mo nga mea meake puta mai, me te kororia ano e puta mai ana i muri i nga whakapawera.

4. No te mea, hei muri o te whakapawera nui puta mai ai nga manaakitanga, no reira kei te haere mai te ra e karaunatia ai koutou ki te nui o te kororia; kaore ano kia tae mai te haora, engari kua tata.

5. Kia inahara ki tenei mea, kua korerotia atu nei e ahau ki a koutou i mua, ata rongoatia iho ki roto i o koutou ngakau, me te pupuri ano ki te mea e puta mai a muri.

6. Nana, he pono taku e mea atu nei ki a koutou, mo tenei take koutou i tonoa ai e ahau he mea e ngohengohe ai koutou. Kia rite ai ano o koutou ngakau hei kai-whakaatu mo nga mea meake puta mai;

7. Me tenei ano, kia whiwhi ai koutou ki te honore mo te whakatakotoranga i te turanga (o Hiona), mo te whakaaturanga ano hoki i te whenua ka tu nei te Hiona o te Atua ki runga;

8. Me tenei ano, kia whakaritea ai he hakari o nga mea momona ma te hunga rawakore; ae ra, he hakari o nga mea momona, o te wahi momona o te waina i ata whakapaingia (refined). Kia mohio ai te ao ko nga mea i whakapuakina e nga mangai o nga poropiti, kaore e kore te tutuki;

9. Ae ra hoki, te hapa o te whare o te Ariki i tino taka paitia, a ka powhiritia nga iwi katoa ki reira.

10. Tuatahi, ko te hunga whai-taonga ratou ko te hunga matau, me te hunga whai-mahara ratou ko te hunga nui;

11. Hei muri o tena tae mai ai te ra o toku kaha: ko reira te rawakore, te kopa, te matapo me te turi, uru ai ki te marena o te Reme, me te kai ano i te hapa a te Ariki, kua oti nei te taka mo te ra nui e toe mai nei.

12. Nana, naku, na te Ariki tenei i whakapuaki.

13. Kia puta atu ai te whakaaturanga i Hiona, ae ra, kia puta atu i te mangai o te pa o to te Atua wahi:

14. Ae ra, mo tenei take koutou i tonoa mai ai e ahau ki konei, me te whiriwhiri ano i taku pononga i a Eruera Patariti, me te whakarite i tona mihana i roto i tenei whenua;

15. Otira, ki te kore ia e ripeneta mo ona hara, koia nei he whakapono-kore, he matapotanga hoki o te ngakau, na kia tupato ia kei taka ia.

16. Nana, kua hoatu ki a ia tana mihana, a e kore e takiruatia te hoatutanga.

17. A ko te tangata e tu ana i roto i tona mihana, e whakaritea ana hei kai-whakawa i roto i a Iharaira, pera me nga wa onamata, hei wehewehe i nga whenua o to te Atua wahi ki ana tamariki.

18. Hei whakarite whakawa ano mo tona iwi i runga i te whakaaturanga a te hunga tika, i ta ona kaunihera awhinatanga ano hoki i a ia, rite tonu ki nga ture o te kingitanga e hoatu nei e nga poropiti a te Atua.

19. No te mea, he pono taku e mea atu nei ki a koutou, ka mau tonu taku ture i runga i te mata o tenei whenua.

20. Kaua tetahi tangata e whakaaro he rangatira ia, engari ko te Atua he rangatira mo te tangata e whakarite whakawa ana, rite tonu ki tana ake e pai ai; ae ra hoki, heoi rangatira mo te tangata e tohutohu ana, e noho ana hoki i te nohoanga whakawa.

21. Kana tetahi tangata e takahi i nga ture o te whenua, no te mea hoki ko te tangata e pupuri ana i nga ture a te Atua, kahore he rawa e takahi ai ia i nga ture o te whenua:

22. No reira, haere i raro i nga mana kei runga ake i a koutou, a kia kingi ra ano ia, e tika nei hoki ia kia kingi, e meinga ai ano hoki nga hoa riri katoa ki raro i ona waewae.

23. Nana, ko nga ture katoa kua riro atu na i a koutou i toku ringa koia tena nga ture o te Hahi, a kia pena to koutou u ki aua ture. Nana, ko tenei he matauranga.

24. Nana, inaianei ka korero ahau mo taku pononga mo Eruera Patariti, ko tenei whenua hei kainga mona, hei kainga hoki mo te hunga kua whakaritea e ia hei kaunihera mona. Ko tenei ano hoki hei kainga mo te tangata kua whakaritea e ahau hei kai-tiaki mo taku toa;

25. No reira, me mau mai e ratou o ratou whanau ki tenei whenua, kia rite ki nga whakariteritenga i waenganui i a ratou, i a au hoki:

26. No te mea, nana, e hara i te mea tika kia whakahau ahau i te tangata i roto i nga mea katoa, no te mea, ko te tangata e whakahaua ana i roto i nga mea katoa he tangata mangere, a e hara ia i te pononga whai-whakaaro; na kona e kore ia e whiwhi ki te utu.

27. He pono taku e mea atu nei, me pau tonu te taima o te tangata ki nga mahi pai, me te mahi noa ake i etahi mahi i runga i ta ratou ake i whakaaro ai, me te whakaputa ake ano i nga mea tika;

28. Kei roto tonu hoki i a ratou te kaha hei pera, na kona hoki ratou ka rangatira (agents) mo ratou ake ano. A me he mea he pai nga mahi a te tangata, e kore ratou e hapa i o ratou utu.

29. Engari, ko te tangata e kore e mahi noa ake i tetahi mea, kia matua whakahaua ra ano ia, a ina whakahaua ka ruarua tona ngakau, ka ngakau-kore ki te pupuri i tana whakahaunga, kua kangaa noatia ake ia.

30. Ko wai ahau nana nei i hanga te tangata, e ai ta te Ariki, te kore ai e mea he hara kore te tangata kahore e whakarongo ki aku ture ?

31. Ko wai ahau e ai ta te Ariki, kua whakaari, a kahore e whakatutuki ?

32. E whakahau ana ahau i te tangata, a kahore ia e whakarongo, no reira ka whakakahore ahau i tana whakahaunga, a e kore ratou e whiwhi ki te manaakitanga;

33. Ko reira ratou mea ai i roto i o ratou ngakau, e hara tenei mahi i te Ariki, ina hoki ra ko ana mea i whakaari ai kahore ano kia tutuki. Aue te mate mo ratou, no te mea ko to ratou utu ka ahu ake i raro, kaore e ahu mai i runga.

34. A inaianei ka tapiri atu ano ahau i nga kupu tohutohu mo tenei whenua.

35. He matauranga tenei i roto i a au, ara kia meinga taku pononga a Matini Harihi hei tauira ki te Hahi, i runga i tana hoatutanga i ana moni ki te pihopa o te Hahi.

36. Me tenei ano, hei ture tenei ki nga tangata katoa e haere mai ana ki tenei whenua kia whiwhi ki tetahi kainga mo ratou; a kia rite tana meatanga ki ana moni ki ta te ture e mea ai.

37. He mea whai whakaaro ano tenei, ara kia hokona mai he whenua i Itipeha hei tuunga mo te toa, mo te whare ta-pukapuka ano hoki.

38. Ko era atu whakahaunga mo taku pononga, mo Matini Harihi ka hoatu ki a ia e te Wairua, he mea e whiwhi ai ia ki te kainga mona, kia rite ki tana i pai ai.

39. Me ripeneta ia mo ona hara, e rapu ana hoki ia i te whakahonore a te ao.

40. Me tu taku pononga a Wiremu W. Wherapa i te turanga i whakaritea ai ia e ahau, me te riro ano i a ia te wahi mona i roto i te whenua;

41. Me tenei ano, he tika kia ripeneta hoki ia, no te mea ko ahau, ko te Ariki, kahore i te ahuareka ki a ia, e rapu ana hoki ia kia neke ake ia, a kahore ia i te ngakau-iti i toku aroaro.

42. Nana, ko ia e ripeneta ana mo ona hara, ka murua ona hara, a e kore ahau te Ariki e mahara ano ki ana hara i muri atu.

43. Ma tenei koutou ka mohio ai, me he mea kua ripeneta te tangata mo ona hara. Nana, ka whaki ia i ona hara me te whakarere rawa atu ano hoki.

44. Na, he pono taku e mea atu nei mo te toenga o nga kaumatua o taku Hahi, kahore ano kia tae mai te wa; era hoki, he maha nga tau e tu mai nei, e whiwhi ai ratou ki nga wahi mo ratou i roto i tenei whenua, haunga ia me he mea ka hiahia ratou i roto i te inoi whakapono, kei te Ariki te tikanga ki te whakawhiwhi i a ratou.

45. No te mea, nana, ko nga iwi katoa ka akina haeretia mai e ratou i nga pito o te whenua.

46. No reira, huihuia mai koutou, a ko te hunga kahore i whakaritea kia noho i roto i tenei whenua, tukua ratou kia kauwhau i te Rongo-pai ki nga wahi e patata mai ana, a i muri o tena tukua ratou kia hoki ki o ratou kainga.

47. Tukua ratou kia kauwhau haere i te huarahi, me te whakaatu atu ano i te pono i nga wahi katoa, me te karanga ano kia ripeneta te hunga whai-taonga, te hunga nunui, me te hunga iti, ratou ko te hunga rawakore;

48. A ina ripeneta nga tangata o te whenua, me whakatu nga peka.

49. A me whakarite tetahi tangata e te reo o te Hahi, hei kai-whakahaere mo te hahi (peka) i Ohaio, hei kohikohi moni ki te hoko whenua i Hiona.

50. A ka hoatu e ahau ki taku pononga ki a Hirini Rikitana, he whakahaunga kia tuhituhia e ia tetahi whakaaturanga mo te whenua o Hiona, me tetahi whakaaturanga ano o ta te Atua whakaaro kia rite ki ta te Wairua e hura ai ki a ia;

51. Me tuku atu he reta, he pukapuka kohi moni hoki ki nga peka, he mea e whiwhi moni ai, hei hoatutanga ki roto i nga ringa o te pihopa hei hoko whenua hei kainga mo nga tamariki a te Atua, mana ake, ma te kai-whakahaere ranei e tuku kia rite ki tana e pai ai, e tohutohu ai ranei.

52. No te mea, nana, he pono taku e mea atu nei ki a koutou, e hiahia ana te Ariki kia whakatuheratia e nga akonga, e nga tamariki hoki a te tangata o ratou ngakau tae noa atu ki te whakaaetanga o o ratou ngakau ki te hoko i tenei whenua katoa ina rite te wa.

53. Nana, he mea whai-whakaaro tenei. Me penei ta ratou mahi, ki te kore e kore ratou e whiwhi kainga ma runga anake i te whakaheke toto.

54. Me tenei ano, ina riro mai te whenua, me tono atu nga tangata mahi o ia ahua, o ia ahua o te mahi, ki tenei whenua kia mahi mo te Hunga Tapu a te Atua.

55. Me mahi enei mea katoa i runga i te rangimarie, a i tena wa, i tena wa me whakaatu nga painga o te whenua o te pihopa, e te kai-whakahaere (agent) ranei o te Hahi;

56. Ko te kohikohinga o te Hunga Tapu kaua e kaikatia, kaua ano e tu-a-oma te haere, engari kia rite ki te tohutohu a nga kaumatua o te Hahi i nga tunga hui, rite tonu ano ki te matauranga e hoatn ai ki a ratou i tena wa, i tena wa,

57. A ma taku pononga, ma Hirini Rikitana e whakatapu tenei whenua, me te wahi ano mo te temepara, ki te Ariki.

58. Na, me karanga tetahi huihuinga, a kia mutu tera ka tuku ai i aku pononga i a Hirini Rikitana raua ko Hohepa Mete, tamaiti, kia hoki, me Oriwa Kautere, ratou e hoki ki te whakaoti i te toenga o te mahi i whakaritea nei e ahau hei mahi ma ratou i to ratou whenua ake, me te toenga era e whakaritea i roto i nga huihuinga.

59. Kaua tetahi tangata e hoki atu i tenei whenua, ki te kore ia e whakaatu haere i te huarahi i nga mea e mohio ana ia, e tino whakaponotia ana hoki e ia.

60. Na, me tango mai te mea i hoatu ki runga i a Hipa Pitihana; a me tu ia hei mema i roto i te Hahi, me te mahi ano ko ona ringa ake ano, ratou tahi ko nga teina, me pena tona ahua kia ea ra ano ona hara katoa, no te mea kaore ia i te whaki i ona hara, a e mahara ana ia ki te huna i ona hara.

61. Ko nga toenga kaumatua o tenei Hahi kei te haere mai hoki ratou ki tenei whenua, ko etahi hoki o ratou kua tino manaakitia, hira ake i te mehua, me tu ano he hui mo ratou ki runga i tenei whenua.

62. Ma taku pononga, ma Eruera Patariti e whakahaere te huihuinga e whakaturia ai e ratou.

63. Me tuku ano hoki ratou kia hoki me te kauwhau ano i te huarahi, whakaatu i nga mea i whakakitea ai ki a ratou.

64. No te mea, he pono me haere atu te rongo i tenei wahi puta noa te ao katoa, tae noa atu ki nga wahi whakamutunga o te ao me te kauwhau i te Rongo-pai ki nga mea katoa, me te whai ano nga tohu i te hunga e whakapono ana.

65. Nana, ka haere mai te Tama a te tangata. Amine.