1. Nana, ko te kupu tenei a te Ariki ki nga kaumatua, nana nei i karanga, i whiriwhiri hoki i roto i enei ra whakamutunga, he mea na te reo o tona Wairua,

2. Me te penei ano tana kupu, maku, ma te Ariki e whakakite atu ki a koutou, taku e pai ai kia mahia e koutou timata atu i tenei wa tae atu ki te tunga o te hui, ka tu nei ki Mihuri, ki te whenua ka whakatapua e ahau mo taku iwi, ara mo nga morehu o Hakopa, ratou ko te hunga ka meinga hei tamariki maku he meatanga na te kawenata.

3. No reira, he pono taku e mea atu nei ki a koutou, me haere aku pononga a Hohepa Mete, tamaiti, raua ko Hirini Rikitana, ki Mihuri, ina mutu tata te whakariterite i nga mea mo to raua wehenga mai i o raua kainga.

4. A ki te mea ka u tonu raua ki a au, ko reira whaaturia ai ki a raua ta raua e mea ai;

5. Me tenei ano, ki te mea ka mau tonu to raua u, ka whakakitea ki a raua te whenua ka hoatu mo koutou.

6. Otira, ki te kore raua e u, ka hatepea atu raua, ka rite ki taku e whakaaro ai, e pai ai hoki.

7. Me tenei ano, he pono taku e mea atu nei ki a koutou, kia hohoro te haere a taku pononga a Raimana Waiti, raua ko taku pononga ko Hoani Korira:

8. Me taku pononga ano, me Hoani Mutaka, raua ko taku pononga ko Hairama Mete, me haere raua ki taua wahi ano, ma Titoroiti ahu pera atu ai.

9. Me haere atu raua i reira, me te kauwhau haere ano i te kupu i te huarahi, kaua he kupu ke atu ma ratou, ko nga mea anake kua oti te tuhituhi e nga poropiti ratou ko nga apotoro, me te mea ano hoki e whakaakona ai ki a ratou e te Kai-whakamarie, i runga i te inoi whakapono.

10. Tukua ratou kia haere takirua, takirua, a ko te ahua tena e kauwhau ai ratou ki nga huihuinga tangata katoa i te huarahi, me te rumaki ki te wai me te whakapa iho i nga ringaringa i te taha o te awa.

11. Ko te kupu hoki tenei a te Ariki, ka whakahohorotia e ahau taku mahi i roto i te tika, no te mea kei te haere mai nga ra e tukua atu ai e ahau nga whakawakanga.

12. Na kia tupato taku pononga a Raimana Waiti, e hiahia ana hoki a Hatana ki te tatari i a ia ano he papapa,

13. Nana, ko te tangata e u ana, ka meinga he rangatira mo nga mea maha.

14. Na, ka hoatu e ahau ki a koutou he tauira mo nga mea katoa, kia kore ai koutou e taea te maminga, no te mea kei te haere a Hatana i te whenua, e haere ana hei maminga i nga iwi;

15. No reira ko te tangata e inoi ana, i roto ano i te wairua iro, ka paingia ia e ahau ina whakarongo ia ki aku ture.

16. Ko te tangata e korero ana, he wairua iro tona, me te korero ano i roto i te reo mahaki he mea e hanga ai te pai, no te Atua taua tangata me he mea ka whakarongo ia ki aku ture.

17. Me tenei ano ko te tangata e wiri ana i raro i toku mana, ka whakakahangia, a ka puta i a ia nga hua o te whakawhetai raua ko te matauranga, rite tonu ki nga whakakitenga me nga mea o te pono kua hoatu e ahau ki a koutou.

18. A ko te tangata kua taea (e te Rewera). A kaore e whakaputa mai he hua, penei me tenei tauira, e hara i a au;

19. Na reira ma tenei tauira, ka matauria ai e koutou i nga wa katoa nga wairua katoa i raro i nga rangi e tu iho nei,

20. Kua tae mai hoki nga ra e rite ai ki te whakapono o nga tangata, te meatanga i tenei mea ki a ratou.

21. Nana, ko tenei he whakahaunga ki nga kaumatua katoa kua whiriwhiria e ahau.

22. Me tenei ano, he pono taku e mea nei ki a koutou, me haere ano taku pononga a Tamati B. Maahi, raua ko taku pononga ko Etera Teia, ki taua whenua ano, me te kauwhau-haere hoki i te kupu,

23. Me haere ano taku pononga a Ihaka Mori, raua ko taku pononga ko Etera Puute, ki taua whenua ano, me te kauwhau-haere i te kupu.

24. Me tenei ano, me haere aku pononga a Eruera Patariti raua ko Matini Harihi hei hoa mo aku pononga, mo Hirini Rikitana raua ko Hohepa Mete, tamaiti.

25. Me haere ano aku pononga a Rawiri Witima raua ko Hawi Witiraka ki taua whenua me te kauwhau-haere i te kupu i te huarahi.

26. Me haere ano aku pononga a Pare P. Parata raua ko Orihana Parata me te kauwhau-haere i te huarahi.

27. Me haere ano aku pononga a Horomona Hanakaka raua ko Himiona Kaata ki taua whenua, me te kauwhau-haere i te huarahi.

28. Me haere ano aku pononga a Etehana Whura raua ko Hakopa Kati.

29. Me haere aku pononga a Riwai Hanakaka raua ko Heperi Kotirini.

30. Me haere aku pononga a Renara Kahuna raua ko Hamuera H. Mete.

31. Me haere ano hoki aku pononga a te Wira Porowini raua ko Wiremu Kaata.

32. A me whakapa aku pononga a Nuera Naiti raua ko Tera J. Kiriwhini, katahi ka haere ai ano.

33. Ae ra, he pono taku e mea atu nei, me haere katoa enei ki taua wahi kotahi, engari kia huarahi ke, kia huarahi ke, a kaua tetahi e hanga ake i tana ki runga ki te mahi a tetahi atu, kaua hoki e haere i tana huarahi.

34. Ko ia e u tonu ana, ka tohungia, ka manaakitia hoki ki nga hua maha.

35. Na ko taku kupu ano tenei ki a koutou ko aku pononga ko Hohepa Weikiwhira raua ko Horomona Hamupere me haere ki nga whenua whaka-te-rawhiti.

36. Me mahi raua i roto i o raua hapu ake, kaua ano e kauwhau i tetahi atu mea, ko nga poropiti anake ratou ko nga apotoro, ko nga mea i kite ai, i rongo ai raua, ko nga mea ano hoki i tino whakapono ai raua, he mea e tutuki ai nga poropititanga.

37. No te mea kua taka a Hemana Patiti ki te hara, no reira me tango mai te mea i hoatu ki a ia, ka hoatu ki runga i te matenga o Haimona Raita.

38. Me tenei ano, he pono ko taku kupu ki a koutou, whakaritea a Iarere Kaata hei piriti, a Hori Hemi hoki whakaritea hei piriti.

39. Ko nga toenga o nga kaumatua hei tiaki i nga peka, me te kauwhau ano i te kupu ki nga wahi e noho nei ratou i roto; a me mahi ratou ko o ratou ringaringa ake ano, kia kore ai te karakia whakapakoko me nga mahi kino e mahia.

40. A i roto i nga mea katoa kia mahara ki te hunga rawakore, ki te hunga hoki e pangia ana e te mate, e whakawhiua ana, no te mea ko te tangata e kore ana e mahi i enei mea, e hara ia i te akonga naku.

41. Me tenei ano, me hoatu e te Hahi ki aku pononga, ki a Hohepa Mete, tamaiti, ki a Hirini Rikitana, ki a Eruera Patariti tetahi pukapuka whakaatu he tangata tika ratou. A me whakawhiwhi ano hoki taku pononga a Oriwa Kautere ki tetahi pukapuka pera.

42. Na ka rite tonu ki taku e mea nei, ara ki te u tonu koutou, ka tae katoa koutou ki te whenua o Mihuri i runga i te koa o te ngakau, koia hoki te whenua mo koutou, engari i tenei wa kei o koutou hoa riri.

43. Engari, nana, ka whakahohorotia e ahau te (hanganga o te) pa ina tae mai tona wa, a ko reira karaunatia ai te hunga u ki te hari.

44. Nana, ko Ihu Karaiti ahau ko te Tama a te Atua, ka whakateiteitia ake ratou e ahau i te ra whakamutunga. Ka pera ano. Amine.