1. Whakarongo e koutou e nga kaumatua o taku Hahi, e ai ta te Ariki ta to koutou Atua, kua mine ngatahi mai koutou, rite tonu ki aku whakahaunga, ki roto i tenei whenua, koia nei te whenua o Mihuri, koia nei ano hoki te whenua i whakaritea, i whakatapua e ahau hei huihuinga atu mo te Hunga Tapu.

2. No reira koia tenei te whenua a te kupu whakaari, te wahi hoki mo te pa o Hiona.

3. Na ko te kupu tenei a te Ariki, a to koutou Atua, me he mea e hiahia ana koutou kia whiwhi ki te matauranga, tenei te matauranga. Nana, ko te wahi e huaina nei ko Itipeha, koia ano a waenganui, a ko te wahi mo te temepara kei te taha hauauru kei runga i tetahi wahi e tata ana mai ki te whare whakawa;

4. No reira, he mea tika kia hokona mai te whenua e te Hunga Tapu, me nga whenua katoa e takoto atu ana ki te taha hauauru tae noa atu ki te rohe e rere ana i waenganui i te Hurai me te Tauiwi.

5. Me nga whenua katoa ano hoki e hono atu ana ki nga rohe o nga whenua mania (prairies) kia rite ra ki te kaha o aku akonga ki te hoko whenua mai. Nana, he matauranga tenei, kia whiwhi ratou ki aua whenua mo ake tonu atu.

6. Na me tu taku pononga a Hirini Kiripata i te turanga i whakaritea e ahau mona, hei kai-kohi moni, hei kai-whakahaere (agent) ano hoki i te Hahi, hei hoko whenua ano i roto i nga whenua e patata mai ana, kia rite ki te pono me te whai-whakaaro.

7. Na me tu taku pononga a Eruera Patariti i te turanga i whakaritea e ahau mona, hei wehewehe ki te Hunga Tapu i o ratou paanga, kia rite ki taku i whakahau atu ai; ratou tahi ko te hunga i whiriwhiria hei awhina mona.

8. Me tenei ano, he pono taku e mea atu nei ki a koutou, me noho taku pononga a Hirini Kiripata i tenei wahi, me te whakatu toa ano, kia hokohoko taonga ai ia i runga i te tika, kia whiwhi ai ia ki te moni hei tango whenua, hei painga mo te Hunga Tapu, he mea ano hoki e whiwhi ai ia ki nga mea e hiahiatia ana e nga akonga mo te whakanoho i a ratou ki runga i o ratou paanga.

9. Me tenei ano, me whiwhi raihana taku pononga a Hirini Kiripata,—(Nana he matauranga tenei, a ko ia e korero ana, kia matau ia)—kia tuku taonga atu ai ia ki te iwi, ma tana e hiahia ai, ano ko nga kai-hokohoko kua whakaritea e ia ki roto i taua mahi,

10. Koia tenei te ahua e whakawhiwhia ai toku Hunga Tapu, he mea e taea ai taku Rongo-pai te kauwhau ki te hunga e noho ana i roto i te pouritanga, i roto i te wahi me te atarangi o te mate.

11. Me tenei ano, he pono taku e mea atu nei ki a koutou, me noho taku pononga a Wiremu W. Wherapa i roto i tenei kainga, hei kai-ta-pukapuka ma te Hahi.

12. Nana, ki te manako mai te ao ki ana tuhituhinga—(nana he matauranga tenei)—me tuku ia kia whiwhi ki nga mea e riro tika ana mai i a ia, hei painga mo te Hunga Tapu.

13. A ko taku pononga, ko Onwa Kautere hei awhina i a ia, kia rite ki taku i whakahau atu ai, i nga wahi katoa e whakaritea ai ia e ahau, hei tuhituhi, hei whakatikatika, hei whiriwhiri, kia tika ai nga mea katoa i toku aroaro, kia rite ki ta te Wairua whakaaetanga i roto nei i a ia.

14. No reira, ko te hunga katoa kua korerotia ake nei e ahau, me noho ki te whenua o Hiona, a kia hohoro ano, me o ratou whanau, kia mahia nga mea kua korerotia ake nei e ahau.

15. Na mo te taha ki te kohikohinga; Ma te pihopa raua ko te kai-whakahaere e whakariterite nga mea mo nga whanau kua whakahaua nei kia haere mai ki tenei whenua, kia hohoro ano, me te whakanoho ano i a ratou ki o ratou paanga.

16. A meake nei hoatu ai nga kupu tohutohu mo te toenga o nga kaumatua ratou ko nga mema. Ka pera ano. Amine.