1. Whakarongo e koutou e nga iwi o taku Hahi, no te mea, he pono taku e mea atu nei ki a koutou, ko enei mea e korerotia atu ana ki a koutou, hei painga, hei akoranga ma koutou;

2. Otira, ahakoa nga mea kua oti na te tuhituhi, ko te tikanga kua tukua ki nga kaumatua o taku Hahi mai ano o te timatanga, a ake tonu atu, ma ratou e whakahaere nga huihuinga katoa kia rite ki ta te Wairua Ora e tohutohu ai, e arataki ai;

3. Heoi ra he whakahau tenei ki a koutou, kaua tetahi e peia atu ki waho i o koutou huihuinga mo te katoa, e whakaturia nei hoki era mo nga tangata katoa;

4. He whakahau ano tenei ki a koutou kia kaua ano tetahi, no roto nei hoki ia i te Hahi, e peia ki waho i o koutou huihuinga hakarameta; engari me he mea kua hara tetahi, kaua ia e pa (ki te hakarameta), kia murua ra ano tana hara.

5. Me tenei ano na, ko taku kupu tenei ki a koutou, kaua ano e peia tetahi ki waho i o koutou huihuinga hakarameta, ara te hunga e ata rapu marie ana i toku kingitanga: e korero ana ahau i tenei mo te hunga kaore nei i te Hahi.

6. Na ko taku kupu ano tenei ki a koutou, me he mea ka tupono tetahi ki roto i o koutou huihuinga whakau, kaore nei ratou i roto i te Hahi, ko ta ratou nei he ata rapu marie i toku kingitanga, kaua koutou e pei i a ratou ki waho;

7. Engari e whakahaua ana koutou i roto i nga meatanga katoa kia inoi atu ki te Atua, e homai noa nei ki a ia; a ko ta te Wairua e whakaatu ai ki a koutou, pai ke ki a au kia meatia e koutou i runga i te tapu o te ngakau, me te tika ano te haere i toku aroaro, he whakaaro ki te mutunga o to koutou whakaoranga, me te mahi i nga mea katoa i runga i te inoi, i te whakawhetai, kia kore ai koutou e taea e nga wairua kino te maminga, e nga whakaakoranga ranei o nga rewera, e nga ture ranei a te tangata, no te mea ko etahi e ahu mai ana i nga tangata, ko etahi i nga rewera.

8. No reira, kia tupato kei tinihangatia koutou; a kia kore ai koutou e taea te tinihanga, rapua marietia e koutou nga homaitanga papai rawa, me te mahara tonu ano ki te take i homai ai;

9. He pono hoki taku e mea atu nei ki a koutou, e hoatu ana nga mea pera hei painga mo te hunga e aroha ana ki a au, e pupuri ana hoki i aku ture katoa, hei painga ano hoki mo te tangata e hiahia ana kia pera tana mahi, he mea e whai painga ai te katoa e rapu ana, e tono ana ranei ki a au, e inoi ana ranei e hara i te mea he hiahia ki tetahi tohu, hei mea whakangata i ona hiahia o te kikokiko.

10. Me tenei ano, he pono taku e mea atu nei ki a koutou, he pai ke ki a au kia mahara tonu koutou, kia pupuri tonu hoki ki roto i o koutou hinengaro, i te tikanga o aua homaitanga, e hoatu na ki te Hahi.

11. No te mea, ko nga homaitanga katoa kaore i te rite te hoatutanga ki te katoa; he maha hoki nga homaitanga a e hoatu ana ki tena tangata, ki tena tangata tetahi homaitanga e te Wairua o te Atua;

12. Ki etahi hoki e hoatu ana ko tetahi, ki etahi atu e hoatu ana ko tetahi atu, kia hua ai te pai mo te katoa;

13. E hoatu ana e te Wairua Tapu ki etahi kia matau ki a Ihu Karaiti, ko te Tama a te Atua, i ripekatia nei mo nga hara o te ao;

14. Ki etahi atu ko te whakapono ki a ratou kupu, kia whiwhi ai ratou ki te oranga-tonutanga, ki te mea ka u tonu to ratou whakapono.

15. Ki etahi e homai ana ano e te Wairua Tapu kia mohio ki te pokanga ketanga o nga minitatanga, rite tonu ki ta taua Ariki ra ano i ahuareka ai, ki ta te Ariki hoki i pai ai, me te mea ano i ana mahi tohu kia rite mo ia ahuatanga, mo ia ahuatanga o te noho a nga tamariki a te tangata.

16. Me tenei ano e homai ana e te Wairua Tapu ki etahi kia mohio ki nga pokanga ketanga o nga mahi, me he mea na te Atua, kaore ranei, kia ai nga whakakitenga mai a te Wairua ki tena tangata, ki tena tangata hei whakaputa ake i te pai.

17. He pono hoki taku e mea atu nei ki a koutou, e homai ana ki etahi, e te Wairua o te Atua, te kupu whai-whakaaro;

18. Ki tetahi atu e homai ana ko te kupu o te matauranga, he mea e whakaakona ai te katoa kia whaiwhakaaro, kia whiwhi hoki ki te matauranga.

19. Me tenei ano, ki etahi e homai ana kia whiwhi ki te whakapono e taea ai te whakaora.

20. A ki etahi e homai ana kia whiwhi ki te whakapono e ahei ai ki te whakaora.

21. Ki etahi atu e homai ana ko nga mahi merekara,

22. A ki etahi e homai ana kia poropiti,

23. Ki etahi atu ko te matauranga ki nga wairua.

24. Me tenei ano, e hoatu ana ki etahi kia korero i nga reo;

25. A ki tetahi atu e homai ana ko te whakamaoritanga i nga reo:

26. A ko enei homaitanga katoa e ahu mai ana i te Atua, hei painga mo nga tamariki a te Atua,

27. E homai ana ano ki te pihopa o te Hahi, ratou ko te hunga e whiriwhiria ai, e whakaritea ai hoki e te Atua, hei tiaki mo tana Hahi, hei kaumatua hoki mo te Hahi, kia matau ratou ki enei homaitanga katoa, mo te ara rawa ake etahi i roto i a koutou, me te tito kei a ratou enei homaitanga, ka mohio koutou e hara i te Atua.

28. A meake nei te wa, koia e inoi ana i roto i te Wairua, Ka whiwhi ano i roto i te Wairua;

29. Kia hoatu ai ki tetahi, kia whiwhi ia ki enei homaitanga katoa; kia ai tera hei upoko; kia whiwhi ai nga mema katoa i te pai:

30. Ko ia e inoi ana i roto i te Wairua e rite ana tana inoi ki ta te Atua i pai ai; no reira, ka rite tonu te meatanga mai ki tana i inoi ai.

31. Me tenei ano; ko taku kupu tenei ki a koutou: nga mea katoa meinga i roto i te ingoa o te Karaiti; ara nga mea katoa e meatia e koutou i roto i te Wairua;

32. A me whakawhetai koutou ki te Atua i roto i te Wairua mo nga manaakitanga katoa e manaakitia ai koutou:

33. A me noho tonu koutou i nga wa katoa i roto i te hara-kore, i te tapu i mua i toku aroaro. Ae ra hoki, koia ano tenei. Amine.