Wahanga 23
He whakakitenga ki a Oriwa Kautere, ki a Hairama Mete, ki a Hamuera H. Mete, ki a Hohepa Mete, matua, me Hohepa Naiti, matua, he mea homai ma roto i a Hohepa, te Matakite, i Manaheta, Niu Iaka, i a Aperira, 1830.
1. Nana, ka korero ahau ki a koe, e Oriwa, i etahi kupu ruarua nei. Nana, e manaakitia ana koe, a kahore koe i raro i tetahi whakaheanga. Otira kia ohiti, kei whakamanamana, kei uru koe ki roto i te whakamatautauranga.
2. Whakamohiotia atu tou karangatanga ki te Hahi, ki te aroaro o te ao ano hoki, a ka whakapuaretia tou ngakau ki te kauwhau i te pono timata atu inaianei a mo ake tonu atu. Amine.
3. Nana, ka korero ahau ki a koe, e Hairama, i etahi kupu ruarua nei: no te mea ko koe hoki tetahi kahore i raro i tetahi whakaheanga, ko tou ngakau kua oti te whakatuwhera; ko tou arero kua oti te whakatangatanga; a ko tou karangatanga he whakahauhau, me te hono tonu ano te whakakaha i te Hahi. No reira, ko te mahi mau me mahi tonu ki te Hahi mo ake tonu atu, a i penei ai na te whakaaro ki tou whanau. Amine.
4. Nana, ka korero ahau i etahi kupu ruarua nei ki a koe, e Hamuera, no te mea ko koe ano tetahi kaore i raro i tetahi whakaheanga, a ko tou karangatanga kia whakahauhau, kia whakakaha hoki i te Hahi, a kahore ano koe kia karangatia ki te kauwhau ki te ao. Amine.
5. Nana, ka korero ahau i etahi kupu ruarua nei ki a koe, e Hohepa, no te mea kahore ano hoki koe i raro i tetahi whakaheanga, a ko tou karangatanga ano hoki tenei, ko te whakahauhau, me te whakakaha ano i te Hahi, a ko te mahi tenei mau, timata atu inaianei, a mo ake tonu atu. Amine.
6. Nana, he whakaatu tenei naku ki a koe, e Hohepa Naiti, i roto i enei kupu, me amo ake e koe tou ripeka, ara, me inoi-a-mangai i mua i te ao, me pera ano hoki i roto i te wahi ngaro, i roto hoki i tou whanau, i waenganui i ou hoa, i nga wahi katoa ano hoki.
7. Me tenei ano, nana, e tika ana ko te mahi mau, me hui tahi atu koe ki te Hahi pono, me te hono tonu ano hoki te whakaara i tou reo ki te whakahauhau, kia whiwhi ai koe ki te utu o te kai-mahi. Amine.