1. Nana, e ai ta te Ariki, ka koa te hunga kua tae mai ki tenei whenua i runga i te titiro tapatahi atu ki taku kororia, he ngohengohetanga hoki ki aku ture;

2. No te mea ko te hunga e mahue iho ki te ora ka riro i a ratou te whenua, a ko te hunga e mate ka whai-okioki ratou i o ratou mahi, a ka whai tonu a ratou mahi i a ratou, a ka whiwhi ratou ki te karauna i roto i nga whare a toku Matua, kua taka noatia ake e ahau mo ratou;

3. Ae ra ka koa te hunga kua tu o ratou waewae ki runga i te whenua o Hiona, kua ngohengohe nei ki toku Rongo-pai, e whiwhi hoki ratou ki nga mea papai o te whenua hei utu mo ratou; e kaha hoki ta te whenua whakaputa mai i ona mea.

4. Ka karaunatia ano hoki ratou ki nga manaakitanga o runga, ae ra, ki nga whakahaunga kore nei e arikarika; ki nga whakakitenga hoki i o ratou na wa: ara ko te hunga e rahi ana te whakapono, e u tonu ana hoki i mua i a au.

5. No reira, he whakahaunga tenei ka hoatu e ahau ki a ratou, penei na taku kupu: Me aroha koe ki te Ariki ki tou Atua, me pau katoa tou ngakau ki te aroha ki a ia, tou kaha katoa, tou hinengaro katoa; a i roto i te ingoa o Ihu Karaiti me mahi koe ki a ia.

6. Kia aroha ki tou hoa tata ano ko koe. Kaua koe e tahae; kaua ano e puremu, e patu, e mahi ranei i tetahi mea pera.

7. I roto i nga mea katoa me whakawhetai atu koe ki te Ariki, ki tou Atua.

8. Me hoatu whakahere koe ki te Ariki ki tou Atua i runga i te pono; ae ra, ko to whakahere, ko te ngakau maru, ko te wairua iro.

9. A kia whai kaha ai koe ki te tiaki i a koe kei poke i te ao, me haere koe ki te whare inoi ka whakarite i au hakarameta i taku ra tapu;

10. No te mea, nana, ko tenei ra kua whakaritea mou, hei okiokitanga mou i au mahi, hei koropikotanga atu ano hoki ki te Runga Rawa;

11. He ahakoa ra ko au kupu oati e hoake i roto i te pono i nga ra katoa, i nga wa katoa;

12. Kia mahara i tenei ra i te ra o te Ariki, me hoake au whakahere me au hakarameta ki te Runga Rawa, me te whaki ano i ou hara ki ou tuakana, ki mua ano hoki i te Ariki.

13. Kaua tetahi mea e mahia e koe i tenei ra, ko nga kai mau me taka i runga i te ngakau tapatahi, he mea e tino tika ai to noho-pukutanga, ae ra, i tetahi aranga o te kupu, kia tino nui ai to haringa.

14. He pono, ko te noho-puku, ko te inoi tenei, ae ra, i tetahi aranga o te kupu, ko te haringa tenei me te inoi.

15. A ki te mea ka meinga e kouton enei mea i runga i te whakawhetai me te hari ano o koutou ngakau, me te ngawari ano o koutou kanohi, kaua i runga i te haparangi o te kata, ta te mea he hara tena, engari i runga i te ngakau koa me te ngawari hoki o te kanohi;

16. He pono taku e mea nei, ki te mea ka penei ta koutou meatanga, ka riro i a koutou te momonatanga o te whenua; nga kararehe o te parae ratou ko nga manu o te rangi, me nga mea e piki haere ana i te rakau, e ngokingoki ana i runga i te whenua;

17. Ae ra hoki, nga mahuri, me nga mea papai e tupu ake ana i te whenua, ahakoa hei kai, hei kakahu ranei, hei whare kararehe ranei, hei kaari rakau, hei maara, hei maara-waina ranei;

18. Ae ra, nga tu mea katoa e tupu ake ana i te whenua, i tona wa, i tona wa, i hanga hei painga mo te tangata, hei whakakoa i te kanohi, hei whakahari i te ngakau;

19. Ae ra, hei kai, hei kakahu, hei whakamatau ma te waha, hei hongi ma te ihu, he mea e whai kaha ai te tinana, e hauora ai te wairua.

20. A e hari ana te Atua, mona i homai i enei mea katoa ki te tangata; he whakaaro hoki ki tenei i hanga ai enei mea kia mahia e te tangata i runga i te whai-whakaaro, kaua ano i runga i te moumou i te hao ranei;

21. Na kahore he mea e whakapouritia ai te Atua e te tangata, e kore ano e mura tona riri ki tetahi, engari ia ki te hunga e kore e whakaae ki te meatanga a tona ringa i roto i nga mea katoa, e ngohengohe ranei ki ana ture.

22. Nana, e hangai ana tenei ki te ture, ki ta nga poropiti ano hoki: no reira, kati noa te whakararuraru mai i a au mo runga i tenei take,

23. Engari kia mohio ko te tangata e mahi ana i nga mahi o te tika ka whiwhi ki tona utu, ara ki te rangimarie i tenei ao, a i te ao e haere mai nei, ki te oranga-tonutanga.

24. Naku, na te Ariki tenei i whakapuaki, a ko te Wairua kei te whakaae. Amine.