1. Whakarongo mai ki a au, e ai ta te Ariki, ta tou Atua, he mea mo taku pononga mo Oriwa Kautere. Na e hara i te matauranga i roto i a au kia hoatu ki a ia rawa anake nga ture me nga moni kia mauria e ia ki te whenua o Hiona, engari kia haere ra ano tetahi hei hoa mona, koia ano hei te tangata tika, hei te tangata pono;

2. No reira, ko taku ko ta te Ariki e hiahia ana, ko taku pononga ko Hoani Witima, e haere hei hoa mo taku pononga mo Oriwa Kautere;

3. Me tenei ano me pumau tonu tana mahi tuhituhi me te mahi ano he hitori (history) o nga mea nunui katoa e kite ai ia, e mohio ai ano ia e pa ana ki taku Hahi;

4. Me tenei ano, ma taku pononga ma Oriwa Kautere ratou ko etahi atu ia e tohutohu e awhina.

5. A ma aku pononga, kua horapa atu nei ratou ki runga i te mata o te whenua, e tuku nga whakaaturanga o o ratou tuaritanga ki te whenua o Hiona.

6. No te mea hoki ko te whenua o Hiona, ka meinga hei wahi, hei kainga e tae atu ai, e mahia ai hoki enei mea katoa;

7. He ahakoa ra, ko taku pononga ko Hoani Witima, kia honohono tona haereere atu i tenei kainga ki tetahi atu kainga, i tenei peka ki tera peka, kia taunga ai ia ki nga mea katoa;

8. Me te kauwhau, me te whakamarama, me te tuhituhi, me te kape mai, me te whiriwhiri, me te whiwhi ano ki nga mea katoa hei painga mo te Hahi, mo nga whakatupuranga hoki, e tupu ake ana i runga i te whenua o Hiona, kia riro ai te whenua i a ratou, i tenei whakatupuranga, ki tetahi whakatupuranga, a ake, ake tonu atu. Amine.