1. Nana, ko taku kupu tenei ki a koe. Kua hiahia taku pononga a Matini Harihi, he whakaaturanga i toku ringa, kei a koe ranei nga papa, e taku pononga e Hohepa Mete, tamaiti, kua whakaaturia na e koe, kua whiwhi koe ki aua papa i hoatu nei e ahau ki a koe.

2. Na, ko tenei tau e mea atu ai ki a ia, ko ia i korero atu na ki a koe, i ki atu na, ko te Ariki ahau, ko te Atua, a naku i hoatu enei mea ki a koe, e taku pononga, e Hohepa Mete, tamaiti, a kua whakahaua koe, kia tu ko koe he kai-whakaatu mo enei mea.

3. A naku koe i mea kia uru mai kia kawenata taua ki a taua, kia kaua koe e whakaatu i enei, (papa) erangi ki nga tangata e whakahaua ai koe e ahau, a kaore o mana ki runga ki enei mea, ki te kahore ahau e whakamana i a koe.

4. Kei a koe te mana hei whakamaori i enei papa, a ko tenei te hoatutanga tuatahitanga i hoatu ai e ahau ki a koe, a ka whakahau nei ahau i a koe kia kaua koe e tango i tetahi atu homaitanga, a kia whakatutukitia ra ano taku hiahia ki tenei; no te mea e kore rawa ahau e whakaae ki tetahi atu homaitanga mou kia oti ra ano tenei.

5. He pono taku e korero nei ki a koe, ka puta mai he auetanga, he mate ki nga tangata e noho ana i te ao, ki te kahore ratou e whakarongo ki aku kupu;

6. Ta te mea a mua ake nei, ka whakaritea koe, a ka haere atu, ka whakapuaki i aku kupu ki nga tamariki a te tangata.

7. Nana, ki te kahore ratou e whakarongo ki aku kupu, e kore rawa ratou e whakapono ki a koe, e taku pononga e Hohepa, ahakoa e taea e koe te whakaatu i enei mea katoa ki a ratou, kua tukua atu nei e ahau ki a koe.

8. Aue ! tenei whakatupuranga whakapono-kore, kaki maro hoki, kua mura taku riri ki a ratou.

9. Nana, he pono taku e mea nei ki a koe, kua tiakina e ahau enei mea katoa i hoatu nei e ahau ki a koe, e taku pononga e Hohepa, mo tetahi whakaaro pai kei roto i a au, a ka whakakitea atu ki nga whakatupuranga e haere mai nei;

10. Erangi tenei whakatupuranga ka whiwhi ki aku kupu ma roto i a koe;

11. Na he apiti atu mo tau whakaaturanga, ka apititia atu nga whakaaturanga o aku pononga tokotoru, e karangatia ai e ahau me te whakarite ano, a ka whakaaturia e ahau enei mea ki a ratou, a ka haere atu me aku kupu e puta atu ana i roto i a koe;

12. Ae ra, ka mohio pu ratou, e tino tika ana enei mea, no te mea no te rangi taku whakaaturanga ki a ratou.

13. Ka hoatu e ahau he kaha ki a ratou kia titiro iho ratou me te matakitaki ano i enei mea, kaore nei e rereke atu te ahua i te ahua i kite ai ratou.

14. A e kore ahau e hoatu i tenei kaha ki etahi atu, kia whiwhi ratou ki taua whakaaturanga, i tenei whakatupuranga, i tenei te timatanga o te whakaarahanga ake me te putanga mai o taku Hahi ki waho i te koraha; pera me te marama te marama, me te kanapatanga hoki o te ra, mau ana te wehi me tetahi ope whawhai e hari ana i nga kara.

15. A ko nga whakaaturanga a nga kai-whakaatu tokotoru ka tukuna atu e ahau ma taku kupu;

16. Nana, ko ia e whakapono ana ki aku kupu, ko ratou e whakawhiwhia e ahau ki nga whakaaturanga o taku Wairua, a maku ratou ka whanau ai i te wai, i te Wairua.

17. A me tatari koe mo tetahi wa poto, i te mea kaore ano koe kia whakaritea;

18. A ko a ratou whakaaturanga ano ka puta atu hei whakahe i tenei whakatupuranga, me he mea ki te whakapakeke ratou i o ratou ngakau ki a ratou;

19. No te mea ka puta atu he whakawhiu hei whakamoti i waenganui i nga tangata e noho ana i runga i te mata o te whenua, a ka pumau tonu taua whiunga, i tenei wa, i tenei wa, ki te kahore ratou e ripeneta, a kia kahore ra ano he kai-noho mo runga i te whenua, a ka memeha atu nga tangata, ka whakangaromia rawatia hoki e te kanapatanga o toku haerenga mai.

20. Nana, ka korero atu ahau i enei mea ki a koe, ka pera ano me taku korerotanga ki te iwi mo te whakangaromanga o Hiruharama, a ko taku kupu ka whakatutukitia inaianei, ka peratia me tona whakatutukitanga i nga wa kua kore ake nei.

21. Na ka whakahau atu nei ahau ki a koe e taku pononga e Hohepa kia ripeneta koe, kia whakatikaia tou haere ki mua i a au, a kaua koe e whakaae ki nga kukumetanga a te tangata a mua atu nei;

22. A kia u koe ki te pupuri i nga whakahaunga i whakahaua ai koe e ahau, a ki te mea koe i tenei, nana ka hoatu e ahau ki a koe he oranga-tonutanga, ahakoa ka kohurutia koe.

23. A tenei ano ka korero atu ahau ki a koe, e taku pononga e Hohepa, mo te tangata e hiahia ana kia kite.

24. Nana, ko taku kupu tenei ki a ia, e whakanui ana ia i a ia, a kaore e rite tana whakaitinga i a ia ki mua i a au; erangi ki te koropiko mai ia ki mua i a au me te whakaiti i a ia ano i runga i te inoi kaha, me te whakapono, i runga i te whakaaetanga o tona ngakau, ko reira whakaae atu ai ahau ki a ia kia tirohia e ia nga mea e hiahia nei ia kia kite.

25. Ko reira ia korero atu ai ki te iwi o tenei whakatupuranga, nana, kua kite ahau i nga mea i whakakitea nei e te Ariki ki a Hohepa Mete, tamaiti, a e pumau ana toku mohiotanga, e tino tika ana, ina kua kite ahau i aua mea, no te mea kua whakakitea mai ki a au i runga i te kaha o te Atua, e hara i to te tangata.

26. A, ko ahau, ko te Ariki ka whakahau atu i a ia, i taku pononga, i a Matini Harihi, kia kaua ia e korero mea ano ki a ratou mo enei mea, erangi me penei tana ki: Kua kite ahau i enei mea, a he mea whakaatu mai ki a au i runga i te kaha o te Atua, a ko enei nga kupu he korerotanga mana;

27. Heoi ki te whakakahore ia ki tenei, ka whakakahoretia e ia te kawenata i kawenata ai ia ki a au i mua, a nana, kua whakahengia ia.

28. A tenei hoki, ki te kahore ia e whakaiti i a ia ano, me te whakaae mai ki ahau ki nga mea he i mahi ai ia, a ka kawenata mai ia ki a au, ka tino puritia e ia aku whakahaunga, me tana kaha ki te whakapono mai ki a au, nana ko taku kupu tenei ki a ia, e kore ia e whiwhi ki aua kitenga, no te mea e kore au e whakaae kia tirotiro ia i aua mea kua korerotia ake nei e ahau.

29. A me he mea ka penei, ka whakahau ahau i a koe e taku pononga e Hohepa, kia korero atu koe ki a ia, kia kaua ia e mahi ano, kia kaua hoki ia e whakararuraru ano i a au mo tenei mea.

30. A me he mea ki te penei, nana, ka ki atu ahau ki a koe e Hohepa, ina oti i a koe etahi atu wharangi torutoru te whakamaori, me mutu koe mo tetahi wa, a kia whakahaua ra ano koe e ahau, ko reira koe whakamaori ai ano.

31. A ki te kahore koe e penei, nana, ka mutu i konei tou mana, a ka tangohia mai e ahau nga mea kua tukua atu nei e ahau ki a koe.

32. A no te mea ka kite noa atu ahau i nga mea e takoto mai ana hei whakamoti i a koe, a e kite noa ana ahau, ki te kahore taku pononga a Matini Harihi e whakaiti i a ia, me te whiwhi ki tetahi whakaaturanga i toku ringaringa, ka tino taka atu ia ki te hara.

33. A he tokomaha e tatari ana ki te whakangaro atu i a koe i runga i te mata o te whenua, a mo tenei take, kia roa ai ou ra, kua hoatu e ahau enei whakahaunga ki a koe.

34. Ae ra, mo tenei take kua ki atu ahau kati, e tu, kia whakahau ra ano ahau i a koe, a ka whakarite mea ahau e ahei ai koe te whakatutuki i te mea i whakahau ai ahau ki a koe;

35. A ki te u pono koe ki te pupuri i aku whakahaunga, ka whakateiteitia ake koe a te ra whakamutunga. Amine.