1. He pono, ko te kupu tenei a te Ariki, tenei ake te wa, ko nga wairua katoa e whakarere ana i o ratou hara, me te haere mai ki a au, a ka karanga ake i runga i toku ingoa, me te ngohengohe ki toku reo, me te pupuri i aku whakahaunga, ka kite ratou i toku mata, ka matau hoki ko ahau ano tenei.

2. Ka matau ano ratou ko ahau te maramatanga pono, e whakamarama ana i nga tangata katoa e haere mai ana ki te ao;

3. Me tenei ano ko ahau kei roto i te Matua, a ko te Matua kei roto i a au, a kotahi tonu maua ko te Matua:

4. Ko te Matua, no te mea nana i homai ki a au tona raneatanga, a ko te Tama, no te mea i te ao i mua, a meinga iho he tapenakara moku te kikokiko, a noho ana i roto i nga tamariki a te tangata.

5. I te ao ahau i mua a manaakitia ana e toku Matua, a ko ana mahi i ata whakakitea maramatia;

6. Ko Hoani ia i kite, i whakaatu hoki mo te raneatanga o toku kororia, a ko te toenga o te whakaaturanga a Hoani meake te wa e whakakitea mai ai:

7. A, i whakaatu ia, i mea, i kite ahau i tona kororia, ko ia ano i te timatanga i mua i te hanganga o te ao;

8. No reira i te timatanga te Kupu, ko ia ano te Kupu, ara ko ia te karere o te ora,

9. Ko ia ano te maramatanga me te Kai-hoko o te ao; te Wairua o te pono kua tae mai nei ki te ao, no te mea nana i hanga te ao, a i roto i a ia te ora me te maramatanga mo nga tangata.

10. Nana nga ao katoa i hanga: nga tangata nana i hanga: nga mea katoa nana i hanga, ma roto hoki i a ia.

11. A, ko ahau, ko Hoani, ka whakaatu i kite ahau i tona kororia, he kororia e rite ana ki to te Tama Kotahi a te Matua, ki tonu i te aroha noa me te pono, ara i te Wairua o te pono, i haere mai nei a noho ana i roto i te kikokiko, a noho ana i waenganui i a matou.

12. I kite ahau, a Hoani, kihai i whakawhiwhia i te tuatahi ki te raneatanga, engari i whiwhi ia ki te aroha noa, hono iho ano ki te aroha noa;

13. Kahore hoki ia i whiwhi ki te raneatanga i te tuatahi, engari i nuku haere ake ia i te aroha noa ki te aroha noa, tae noa ki te wa i whiwhi ai ia ki te raneatanga;

14. Koia tenei te ahua i karangatia ai ia ko te Tama a te Atua, no te mea kahore ia i whiwhi ki te raneatanga i te tuatahi.

15. Na, ko ahau ko Hoani, ka whakaatu, nana, i tuwhera nga rangi a heke iho ana te Wairua Tapu ki runga ki a ia me he kukupa, a tau ana ki runga i a ia, na ko tetahi reo no te rangi, e mea ana, Ko taku Tama tenei i aroha ai.

16. A, ko ahau ko Hoani, ka whakaatu i whakawhiwhia ia ki te raneatanga o te kororia o te Matua;

17. I whakawhiwhia ki a ia te mana katoa o te rangi, o te whenua, a i a ia te kororia o te Matua, e noho ana hoki ia i roto i a ia.

18. Ko tenei, ki te u tonu koutou ka hoatu ki a koutou te toenga, ara te raneatanga o te whakaaturanga o Hoani.

19. E hoatu ana e ahau ki a koutou enei kupu, kia marama ai koutou, kia matau ai ki te koropiko ki a au, me te mohio ano ki ta koutou e koropiko na, kia haere mai ai koutou ki te Matua i roto i toku ingoa, mo te rite rawa ake te wa ka whiwhi koutou ki tona raneatanga,

20. Ki te pupuri hoki koutou i aku whakahaunga ka whiwhi koutou ki tona raneatanga, ka whakakororiatia hoki i roto i a au, ka rite ki a au i roto i te Matua; no reira, ko taku kupu tenei ki a koutou, ka whiwhi koutou ki te aroha noa, hono iho ano ki te aroha noa.

21. Nana, he pono taku e mea atu nei ki a koutou, i te Matua ahau i te timatanga, a ko ahau te matamua;

22. Ko te hunga katoa e whanau ana i roto i a au ka whai wahi ratou ki te kororia o taua mea, ko ratou ano hoki te Hahi o te matamua.

23. Waihoki, ko koutou i te Matua ano i te timatanga, ara te wahi Wairua koia ano te Wairua o te pono.

24. Ko te pono te matauranga ki nga mea o tenei wa, ki nga mea o mua, ki nga mea hoki kei te haere mai;

25. Ki te nuku ake, ki te iti iho ranei tetahi mea i tenei, no te wairua o taua mea kino, ko ia ano hoki te kai korero teka mai o te timatanga ra ano.

26. Ko te Wairua o te pono no te Atua. Ko ahau te Wairua o te pono, a i whakaatu a Hoani moku i mea—i whiwhi ia ki te raneatanga o te pono, ae ra, o te pono katoa.

27. E kore tetahi tangata e whiwhi ki te raneatanga, ki te kahore ia e pupuri i aku whakahaunga.

28. Ko te tangata e pupuri ana i ana whakahaunga ka whiwhi ki te pono, ki te maramatanga taea noatia te wa e whakakororiatia ai ia i roto i te pono, e matau ai ano hoki ki nga mea katoa.

29. I te timatanga ano te tangata me te Atua, ko te matauranga, ara ko te maramatanga o te pono kahore i te mea hanga, e kore ano hoki e ahei kia hangaia.

30. He mea motuhake te pono i roto i te wahi i whakanohoia ai ia e te Atua, e mahi ana mona ake, e penei ana ano te ahua o nga matauranga katoa, me i kahore, penei, kua kore tetahi mea ora.

31. Nana, kei konei te here-koretanga o te tangata, kei konei ano hoki te whakaheanga mona, no te mea e ata marama ana ratou ki te mea o te timatanga, heoi kihai ratou i pai ki te maramatanga.

32. Na, ko nga tangata katoa kahore tona wairua e pai ki te maramatanga, kei raro ratou i te whakaheanga,

33. He wairua hoki te tangata, ko nga mea timatanga ka mau tonu, a ko te wairua me te mea timatanga, ki te kotahi raua, ka whiwhi ki te raneatanga o te hari.

34. Ki te wehea raua, e kore te tangata e whiwhi ki te raneatanga o te hari.

35. Ko nga mea timatanga to te Atua tapenakara; ae ra, ko te tangata te tapenakara o te Atua, ara he temepara; a ko te temepara kua whakapokea, ka whakangaromia e te Atua.

36. Ko te matauranga te kororia o te Atua, ara ki tetahi aronga, ko te maramatanga raua ko te pono;

37. E whakarere ana te maramatanga raua ko te pono, i te tangata o te hara.

38. I te timatanga he hara kore nga wairua katoa o nga tangata, a i te mea ka hokona mai e te Atua te tangata i tona takanga atu, no reira ka hoki ano te tangata ki te ahua o tona tamarikitanga, ara ka harakore ki ta te Atua titiro iho.

39. Me i reira ka haere mai te tangata o te hara, a tangohia ake e ia te maramatanga me te pono i nga tamariki a te tangata, he mea na to ratou kore e whakarongo, he mea ano hoki na nga whakarerenga iho a o ratou matua.

40. Engari kua oti koutou te whakahau e ahau kia whakatupuria ake e koutou a koutou tamariki i roto i te maramatanga me te pono;

41. He pono taku e mea atu nei ki a koe, e taku pononga, e Pererika G. Wiremu, e taka ana koe ki raro i tenei whakaheanga;

42. Ina hoki, kahore ou tamariki i te whakaakona e koe kia mohio ki te maramatanga, ki te pono, kia rite ki aku whakahaunga, na kona hoki te tangata o te hara i whai mana tonu ai ki runga i a koe, a koia ano te take e whiua na koe.

43. Ko tenei ka hoatu e ahau he whakahaunga ki a koe me he mea koe e hiahia ana kia whakaputaina koe i ou mate, whakatikaia tou whare, no te mea he maha nga mea e he ana i roto i tou whare.

44. He pono ko taku kupu tenei ki taku pononga, ki a Hirini Rikitana, i etahi inea kahore i te mau i a ia nga whakahaunga mo ana tamariki, no reira matua whakatikaia e koe tou whare i te tuatahi.

45. He pono, taku e mea atu nei ki taku pononga, ki a Hohepa Mete, tamaiti, ara me hua koutou e ahau ko oku hoa, no te mea ko koutou oku hoa, a meake ka whiwhi wahi tuturu koutou ki te wahi kei reira ahau.

46. A mo te whakaaro ki te ao, e karangatia ana koutou e ahau he pononga, a he pononga koutou ki a ratou mo te whakaaro ki a au;

47. Na, he pono ko taku kupu tenei ki a Hohepa Mete, tamaiti, kahore koe i te pupuri i nga whakahaunga, a e tika ana kia riria koe i te aroaro o te Ariki.

48. Ko te whanau e tika ana kia ripeneta ratou, kia whakarerea ano hoki etahi mea, a kia hopohopo ki nga kupu e whakapuakina ana e koe, ki te kore ka hatepea ratou i o ratou turanga.

49. Ko taku e mea nei ki te tangata kotahi, e mea ana ahau ki te katoa, kia mau ki te inoi, kei whai wahi te tangata o te hara i roto i a koutou, a ka hatepea atu koutou i o koutou turanga.

50. Ko taku pononga, ko Nuera K. Witini, ahakoa he pihopa ia i roto i te Hahi, na e tika ana kia riria hoki ia, kia whakatikaia ano hoki e ia tona whanau, me titiro hoki e ia me he mea ratou e u tonu ana, e whakaaro ana ranei ki nga mahi o te kainga, kia mau ano ratou ki te inoi, ki te kore ka whakakorea atu ratou i o ratou turanga.

51. Na, ko taku kupu tenei ki a koutou, ki oku hoa, tukua taku pononga, a Hirini Rikitana kia hohoro te haere, mana e whakapuaki ta te Ariki tau i manako mai ai, me te kauwhau i te Rongo-pai o te whakaoranga, kia rite ki taku e hoatu ai hei korerotanga mana, a ma runga i a koutou inoi whakapono, i te ngakau kotahi hoki e tautokongia ai ia e ahau.

52. Tukua ano taku pononga a Hohepa Mete, tamaiti, raua ko Pererika G. Wiremu kia hohoro te haere, a ka rite te hoatutanga ki a raua ki ta te inoi whakapono, a ki te pupuri koutou i aku kupu e kore koutou e taea te whakapororaru i roto i tenei ao, i te ao ranei e haere mai ana.

53. He pono taku e mea atu nei ki a koe, ko taku hiahia kia hohoro te whakamaori i aku karaipiture, me riro mai ano i a koe te matauranga ki nga korero o nehe (hitori), te mohiotanga ki nga whenua katoa, ki nga kingitanga, ki nga ture a te Atua, a te tangata ano hoki, a ko enei katoa hei whakaoranga mo Hiona. Amine.