1. Nana, me whakarongo ki te reo ona, kei a ia nga kaha rawa katoa, ko ia e pumau ana no te mau tonu ki te mau tonu, ae ra, te Arepa me te Omeka, te timatanga me te mutunga.

2. Nana, he pono ko te kupu tenei a te Ariki ki a koutou, e nga kaumatua o taku Hahi, kua mine ngatahi mai ki tenei wahi, ko nga mea kua oti te muru i o koutou hara, no te mea ko ahau ko te Ariki ka murua nga hara, me te tohu i nga tangata ina whaki ratou i a ratou hara i runga i te ngakau iti.

3. Na, he pono taku e mea nei ki a koutou, kahore e tino pai ma te katoa o tenei ropu o aku kaumatua kia hohoro te haere i runga i nga wai, a ko te hunga o ia taha, o ia taha e mate ana i te whakapono-kore.

4. Otira, i whakaae ahau kia pera, kia tu koutou hei kai-whakaatu. Nana, he nui nga aitua kei nga wai inaianei, a ka nui atu a muri nei.

5. No te mea, ko ahau ko te Ariki, kua oti tenei te whakatakoto i roto i toku riri, ka puta mai nga whakangaromanga maha ki runga ki nga wai; ae, nui atu hoki ki runga ki enei wai.

6. He ahakoa, kei taku ringa nga kikokiko katoa, a ko ia i waenganui i a koutou e u tonu, e kore ia e mate, he mea na nga wai.

7. No reira, e tika ana ma taku pononga, ma Hirini Kiripata, raua ko taku pononga ko Wiremu W. Wherapa kia haere wawe i runga i ta raua mihana.

8. Otira, kahore ahau i whakaae kia wehe atu korua, a kia tino ea ra ano o korua hara katoa, kia kotahi to korua whakaaro, a kia kore korua e mate i roto i te hara.

9. Ko tenei, he pono taku e mea nei, ko te tikanga ano tenei, kia haere atu koutou, no reira me haere aku pononga a Hirini Kiripata raua ko Wiremu W. Wherapa, me te hunga kua whakaritea hei hoa mo raua, a kia haere wawe ratou i runga i taua karangatanga, kia taea e ratou taua mihana te whakatutuki, a ma roto i te whakapono ka whai kaha ratou ki te pehi atu i nga tu ahua mea kino.

10. A ki te mea ka u tonu ratou ka tiakina, a ko ahau ko te Ariki e noho ai i a ratou.

11. A ma te toenga e mau i nga kakahu e tika ana mo ratou.

12. A ma taku pononga ma Hirini Kiripata, nga mea i mahue e tango ki a ia, kia rite ki ta koutou e pai ai.

13. Ko tenei, nana, i hoatu e ahau tenei whakahaunga ki a koutou hei painga ma koutou, a ko ahau, ko te Ariki e korerorero ki a koutou pera me taku i korerorero ai ki nga tangata i nga ra onamata.

14. Nana, ko ahau ko te Ariki, i te timatanga nga wai i manaakitia, otira i enei nga ra o muri nei i kangaia nga wai e te mangai o taku pononga o Hoani.

15. No reira ka puta mai te ra, e kore e ora nga kikokiko ina ratou e haere ana i runga i nga wai.

16. Taihoa kua kiia tenei i nga ra e tu iho nei, kahore e taea e nga tangata te haere mai ma runga i nga wai ki te whenua o Hiona, engari ko ia i te ngakau ma.

17. A i te mea, naku, na te Ariki nga whenua i kangaa i te timatanga, waihoki i nga ra whakamutunga ka manaakitia te whenua, kia rite ki tona wa, hei painga mo taku Hunga Tapu, kia riro i a ratou te momonatanga o te whenua.

18. Inaianei ka hoatu e ahau ki a koutou he whakahaunga, a ko taku e mea ai ki te tangata kotahi, e mea ana ki te katoa, a ma koutou e whakatupato o koutou teina mo te kino o enei wai, kia kore ratou e haere tupato noa mai ki runga i enei wai, kei mate to ratou whakapono, a ka taka ki roto i ona mahanga.

19. Ko ahau, ko te Ariki kua oti tenei te whakarite a kei runga ano te kai-whakangaro i to reira mata, a e kore ahau e whakakore i tenei whakaritenga.

20. Ko ahau ko te Ariki i riri ki a koutou inanahi, otira, inaianei kua hurahia atu taku riri.

21. No reira, mo era kua korerotia e ahau kia hohoro te haere, ka mea ano ahau ki a koe, me haere wawe ratou i runga i taua haerenga.

22. A kahore he tikanga ki a au, me he mea ka noho ratou mo tetahi wa poto, ina haere ratou, ma runga wai, ma te whenua ranei, ki te whakarite i o ratou mihana; heoi waiho ma ratou e whiriwhiri a muri ake nei.

23. Ko tenei mo aku pononga a Hirini Rikitana koutou ko Hohepa Mete, tamaiti, ko Oriwa Kautere, kia kaua ratou e haere ma runga i nga wai, engari ma te awakeri, i a ratou e haere ana ki o ratou kainga, ara kaua ratou e haere mai ma runga i nga wai, engari ma nga awakeri.

24. Nana, kua whakaritea e ahau e te Ariki he huarahi hei haerenga mo toku Hunga Tapu, nana, koia tenei te huarahi—i te mutunga o to ratou haerenga i runga i te awakeri me haere ratou i te whenua, i te mea kua oti ratou te whakahau kia haere ki te whenua o Hiona;

25. A kia rite ta ratou ki ta te whanau a Iharaira, kia whakatutu i te ara.

26. A ko tenei whakahaunga me hoatu ki o teina katoa.

27. Otira, ko ia kua whakawhiwhia nei ki te mana hei whakahau i nga wai, kua hoatu ki a ia he matauranga e te Wairua ki ona ara katoa.

28. No reira kia rite tana ki ta te Wairua o te Atua ora e whakahau ai ki a ia, ahakoa i te whenua, i runga ranei i nga wai, rite tonu ki taku e pai ai a muri ake nei.

29. A ki a koe e whakaaturia ana te huarahi mo te Hunga Tapu, ara te ara e haere ai ratou ki te puni o te Ariki.

30. Me tenei ano, he pono taku e mea nei ki a koutou, e aku pononga, e Hirini Rikitana koutou ko Hohepa Mete, tamaiti, ko Oriwa Kautere, kaua koutou e puaki i o koutou mangai i roto i nga huihuinga o te hunga hara, kia tae ra ano koutou ki Hinihinati.

31. Na i roto i taua pa, me ara ake o ratou reo ki te Atua, hei whakahe i taua iwi; ae ra, ki a ia kua mura nei tona riri mo o ratou hara; he iwi hoki ratou e tata ana mo te whakangaromanga.

32. A me haere atu ratou i reira ki nga huihuinga o o ratou teina, no te mea nui ke te mahi ma ratou i waenganui i o ratou teina i te mahi i roto i te hunga hara,

33. A ko te hunga e toe me tuku ratou kia haere ki te kauwhau i te kupu ki roto ki nga whakaminenga o te hunga hara kia rite ki te mea i hoatu ai.

34. A ki te meatia tenei e ratou, ka ma o ratou kakahu, ka koha-kore hoki i toku aroaro.

35. A tukua ratou kia haere takirua, takirua kia rite ki ta ratou e pai ai; otira ko aku pononga, ko Renara Kahuna raua ko Hamuera H. Mete, ko taku e ahuareka nei, kaua e wehea kia tae ra ano raua ki o raua kainga, a mo tetahi tikanga whai-whakaaro tenei i roto i a au.

36. Ko tenei, he pono taku e mea nei ki a koutou, a ko taku e mea ai ki te kotahi, e meatia ana ki te katoa, kia maia e nga tainariki nonohi, no te mea kei waenganui ahau i a koutou, a kahore ahau e whakarere i a koutou.

37. A i te mea kua whakaiti koutou i a koutou ano i a au, ko nga manaakitanga o te kingitanga ka riro i a koutou.

38. Whitikiria to hope, kia mataara, kia whai-whakaaro; titiro ano ki te haerenga mai o te Tama a te tangata, no te mea ka haere mai ia, i te haora e kore koutou e mahara.

39. Inoi tonu kia kore koutou e uru ki roto i nga whakamatautauranga, kia tu ai koutou i te ra o tona haerenga mai, ahakoa i te ora, i te mate ranei. Ae ra. Amine.