1. Whakarongo e koutou nga kaumatua o taku Hahi, a kia whai taunga mai ki te reo o te Atua ora, a kia anganui ki nga kupu o te matauranga e hoatu ai ki a koutou, e rite ai ki ta koutou kua inoi na koutou i runga i te whakaaro kotahi mo te Hahi, me nga wairua kua haere atu na i runga i te mata o te whenua.

2. Na he pono taku e mea atu nei ki a koutou, he maha nga wairua teka, kua haere atu i runga i te mata o te whenua, e tinihangatia ana i te ao;

3. Me Hatana hoki kua whai ki te tinihanga i a koutou, kia taea ai koutou e ia.

4. Nana, ko ahau, ko te Arikk kua titiro atu Ki runga ki a koutou, a kua kite i nga mea whakarihariha i roto i te Hahi kua whakaaetia na toku ingoa;

5. Otiia, ka koa te hunga e pono ana, a ka u tonu, ahakoa i te ora, i te mate ranei, no te mea ka whiwhi ratou ki te oranga-tonutanga.

6. Otiia, aue te mate mo te hunga maminga me te hunga tinihanga, no te mea, e penei ana ta te Ariki, ka meinga ratou e ahau kia whakawakia.

7. Na, he pono taku e mea atu nei ki a koutou, he hunga tinihanga ano kei roto i a koutou, i tinihanga ai etahi, i tukua ai he kaha ki te hoa riri, otira ka whakahokia mai ratou;

8. Ko te hunga tinihanga ia ka matauria a ka hatepea atu ratou, i roto ranei i te ora, i roto ranei i te mate, kei a au te tikanga; a aue te mate mo te hunga e tapahia atu ana i taku Hahi, no te mea kua taea ratou e te ao;

9. No reira kia tupato ia tangata, ia tangata, kei meatia e ia te mea e hara nei i te pono, i te tika i mua i toku aroaro.

10. Na, ka mea te Ariki, hei mea na te Wairua, ki nga kaumatua o tana Hahi, tena, me korerorero tahi tatou kia matau ai koutou:

11. Kia korerorero tatou me te mea ko tetahi tangata e korerorero ana ki tetahi, he kanohi he kanohi:

12. Na ka mohiotia ta te tangata e te tangata ina korerorero ia, na te mea ka korerorero ia me he tangata, ka pera hoki ahau, te Ariki, ka korerorero tahi ki a koutou kia matau ai koutou;

13. No reira, ko ahau, ko te Ariki, ka ui atu nei ki a koutou, i whakaritea koutou mo te aha ?

14. Ki te kauwhau i taku Rongo-pai hei mea na te Wairua, koia nei te Kai-whakamarie i tonoa atu ai ki te ako i te pono;

15. Me i reira i whiwhi ranei koutou ki nga wairua kahore nei koutou i matau ki ta ratou, me te whiwhi ki a ratou ano he mea na te Atua, a e tika ana ranei koutou i roto i tenei ?

16. Nana, ma koutou ano tenei patai e whakautu; ahakoa ra ka tohungia koutou e ahau ko ia e ngoikore ana i roto i a koutou a mua ake nei ka meinga kia kaha.

17. He pono taku e mea atu nei ki a koutou, ko ia e whakaritea ana e ahau, a e tonoa atu ana ki te kauwhau i te kupu o te pono hei mea na te Kai-whakamarie, i runga i te Wairua o te pono, ka kauwhau ranei ia i taua mea i runga i te Wairua o te pono, i runga ranei i tetahi ahua ke ?

18. A me he mea i runga i tetahi ahua ke, e hara i te Atua.

19. Me tenei ano, ko ia e whiwhi ana ki te kupu o te pono, na te Wairua o te pono ranei tana whiwhinga, na tetahi ahua ke ranei ?

20. Me he mea na tetahi ahua ke, e hara i te Atua:

21. No reira, he aha koutou te kite ai, te mohio ai ko ia e whiwhi ana ki te kupu hei mea na te Wairua o te pono, e rite ana tana whiwhinga ki te kauwhautanga hei mea na te Wairua o te pono ?

22. No reira ko ia e kauwhau ana me ia e whiwhi ana, e matau ana ki ta tetahi, ki ta tetahi, a ka whiwhi raua tahi ki te painga a ka whakamanamana tahi raua;

23. A ko te mea e kore nei e hanga i te pai, e hara i te Atua, engari he pouritanga,

24. Ko nga mea o te Atua he maramatanga, a ko ia e whiwhi ana ki te maramatanga a e u tonu ana i roto i te Atua, ka koni ake ana maramatanga, a ko taua maramatanga ka tupu haere tae noa ki te tino awateatanga.

25. Me tenei ano, he pono taku e mea atu nei ki a koutou, a meatia nei hoki e ahau kia mohio ai koutou ki te pono, kia taea ai te pouritanga te pei atu e koutou i roto i a koutou,

26. No te mea ko ia e whakaritea ana e te Atua a e tonoa atu ana kua whiriwhiria ko ia te nui rawa, ahakoa ko te iti rawa ia a he pononga na te katoa:

27. No reira, nana nga mea katoa; no te mea kei a ia te tikanga o nga mea katoa, i roto i te rangi, i runga hoki i te whenua, te ora me te maramatanga, te Wairua me te kaha, i tukua mai ai i runga i ta te Matua i pai ai i roto i a Ihu Karaiti, i tana Tama;

28. Otiia, e kore e riro i te tangata nga mea katoa; ki te kore ia e whakamakia, e horoia i nga hara katoa;

29. A ki te mea ka whakamakia koutou ka horoia i nga hara katoa, me inoi e koutou i runga i te ingoa o Ihu ta koutou e pai ai, a ka meatia:

30. Otira, kia mohio ki tenei, ka hoatu ki a koutou ta koutou e inoi ai, a i te mea kua whakaritea koutou hei upoko, ka ngohengohe nga wairua ki a koutou.

31. No reira, ki te mea ka kite koutou i tetahi wairua e whakaaturia ana ki a koutou kahore koutou e matau ki a ia, a ka kore koutou e manako ki taua wairua, me inoi koutou ki te Matua i runga i te ingoa o Ihu, a ki te kore ia e homai taua wairua ki a koutou, katahi koutou ka mohio e hara i te Atua.

32. A ka hoatu ki a koutou he kaha ki runga ki taua wairua, a ka kiia e koutou i runga i te reo nui e hara i te Atua taua wairua;

33. Kauaka i runga i te whakapae kaha kei taea koutou, te whakapehapeha ranei, i te whakamanamana ia mona i whiriwhiria e te Atua kia whiwhi,

34. Ko ia e whiwhi ana he mea na te Atua, kia hoatu e ia te honore ki te Atua, a kia whakamanamana ia mona i whiriwhiria e te Atua kia whiwhi,

35. A ma to koutou whai mahara, me te whakarite i enei mea kua whiwhi nei koutou, me nga mea e whiwhi ai koutou a mua ake nei: ka hoatu ai ki a koutou e te Matua te kingitanga me te kaha e taea ai nga mea katoa e hara nei i te mea whakarite nana.

36. Nana, he pono taku e mea atu nei ki a koutou, ka koa koutou e rangona enei kupu aku i te mangai o taku pononga, no te mea kua murua o koutou hara.

37. Me haere taku pononga a Hohepa Weikawhira, taku e ahuareka atu nei, raua ko taku pononga ko Pare P. Parata, ki waenganui ki nga peka, whakakaha ai i a ratou i runga i te kupu whakahauhau;

38. Me taku pononga me Hoani Korira, otira me aku pononga katoa kua whakaritea ki tenei tunga, a tukua ratou kia mahi i roto i te maara-waina; a kaua tetahi tangata e arai i ta ratou meatanga i taku i whakarite ai ki a ratou;

39. No reira, i roto i tenei mea kahore taku pononga a Eruera Patariti i tika, otira me ripeneta ia a ka murua tana.

40. Na, he tamariki nonohi koutou a e kore e taea e koutou nga mea katoa inaianei, me tupu koutou i roto i te aroha noa, i roto hoki i te matauranga ki te pono,

41. E nga tamariki nonohi, kaua e wehi, no te mea naku koutou, a kua taea e ahau te ao, a no roto koutou i te hunga kua homai nei e te Matua ki a au;

42. A e kore e ngaro tetahi o te hunga kua homai nei e te Matua ki a au:

43. A ko te Matua me ahau kotahi tonu: kei roto ahau i te Matua me te Matua kei roto i a au; a i te mea kua manako koutou ki a au kei roto koutou i a au, a kei roto ahau i a koutou;

44. No reira, kei waenganui ahau i a koutou, a ko ahau te Hepera pai, te Kohatu o Iharaira. Ko ia e hanga ana ki runga ki tenei kamaka e kore e hinga,

45. A ka haere mai te ra e rongo ai koutou ki toku reo, e kite ai ano hoki i a au, a ka mohio ko ahau ano tenei.

46. No reira, kia mataara, kia takatu ai koutou. Koia ano tenei. Amine.