1. Nana, penei te kupu a te Ariki, e taku pononga, e Hoani Mutaka, kua karangatia koe kia haere ki roto ki nga whenua whaka-te-rawhiti i tenei whare, ki tenei whare, i tenei kainga ki tenei kainga, a kia haere atu i tenei pa ki tenei pa, ki te whakapuaki i toku Rongo-pai mau tonu ki roto ki nga hunga e noho ana i reira ki waenganui o nga tukinotanga me nga mahi tutu.

2. A, ko ia e manako ana ki a koe e manako ana ki a au, a tera koe e whiwhi ki te kaha hei whakapuaki i taku kupu i roto i te tohutohu atu a toku Wairua Ora;

3. A, ko ia e manako ana ki a koe ano he tamaiti kohungahunga ka whiwhi ki toku kingitanga, a ka koa ratou, no te mea ka tohungia ratou;

4. A, ko ia e whakakahore ki a koe ka whakakahoretia hoki e toku Matua me tona whare, a me rui te puehu o ou waewae i nga wahi ngaro o te huanui, hei mea whakaatu ki a ratou.

5. A, nana, titiro ka hohoro taku haere atu ki te whiu, ki te whakaatu katoa i a ratou mahi kino i mahia e ratou moku, kua tuhituhia nei e au i roto i tenei wharangi o te pukapuka.

6. Nana, he pono taku e mea atu nei ki a koe, e hara i te mea tika mou kia haere kia rite ra ano nga mea ma tou whanau me te ata tuku atu ki te pihopa ki Hiona;

7. A, i muri i etahi tau torutoru ki te hiahiatia e koe ki a au, ka haere ake koe ki te whenua pai, kia riro i a koe hei kainga tuturu mou;

8. Ki te kahore, me u tonu koe ki te whakapuaki i taku Rongo-pai tae noa ki tou tangohanga. Amine.