1. Whakarongo, e te iwi, whakapuaretia o koutou ngakau a kia whai taringa mai i tawhiti; a kia whakarongo koutou e karangatia nei he iwi na te Ariki, a kia rongo ki te kupu a te Ariki me tana e pai ai mo koutou;

2. Ae ra, he pono, taku e mea nei, whakarangona te kupu ona kua mura nei tona riri ki te hunga hara ki te, hunga tutu;

3. E pai nei ki te tango i tana e pai ai, a ki te tiaki i roto i te ora ana e pai ai;

4. E hanga ake nei i ona wa ake e pai ai, a e whakangaro ana ina pai ia, a e ahei ana ki te panga iho i te Wairua ki te reinga.

5. Nana, ko ahau, ko te Ariki, ka whakapuaki i toku reo, a ka rangona.

6. No reira, he pono taku e mea nei, kia tupato te hunga hara, a kia wehi, kia tuwiri te hunga tutu, a ko te hunga whakapono-kore me pupuri o ratou ngutu, ka tae mai hoki te ra o te riri ki runga ki a ratou me he awhiowhio, a ka mohio nga kikokiko katoa ko ahau te Atua.

7. A ko ia e rapu tohu ana ka kite i nga tohu, otira e hara i te mea mo te whakaoranga.

8. He pono taku e mea atu nei ki a koutou, he hunga rapu tohu ano kei roto i a koutou, a he pera ano hoki mai i te timatanga;

9. Otira, nana, e hara te whakapono i te mea na nga tohu, engari ka whai tahi nga tohu i te hunga e whakapono ana.

10. Ae ra, na te whakapono nga tohu, e hara i te mea na te hiahia o te tangata, na ta te tangata ranei e pai ai, engari na ta te Atua e pai ai.

11. Ae ra, na te whakapono nga tohu me nga mahi nunui, no te mea ki te kahore he whakapono e kore e taea he mea e ahuareka ai te Atua: a kahore a te Atua ahuareka ki te tangata e riria nei e ia; no reira kahore he tohu e whakaaturia ai e ia ki nga pera, i roto anake i te riri o te whakaheanga.

12. Mo reira, kahore aku, a te Ariki, ahuareka ki te hunga i roto i a koutou kua rapu nei i nga tohu i nga mea whakamiharo mo te whakapono, a e hara i te mea hei painga mo nga tangata hei whakakororia ki a au;

13. He ahakoa, ka hoatu e ahau he whakahaunga, a he maha kua tahuri atu i aku whakahaunga a kihai i pupuri i aua mea.

14. He hunga puremu ano i roto i a koutou i mua, ko etahi kua tahuri atu i a koutou, a kei a koutou ano etahi, a nga wa e tu mai nei ka whakakitea.

15. Kia tupato nga mea pera kia hohoro te ripeneta, kei tau mai te whakawakanga ki runga ki a ratou me he mahanga, a ka whakakitea to ratou kuaretanga a ka aru a ratou mahi i a ratou i roto i nga kanohi o to iwi.

16. A, he pono, taku e mea atu nei ki a koutou, pera me taku i ki ra i mua, ko ia e titiro ana ki te wahine he hiahia ki a ia, me he mea ranei ka puremu etahi i roto i o ratou ngakau, ka kore i a ratou te Wairua, engari ka whakakahore i te whakapono a ka wehi:

17. No reira, kua mea ahau, te Ariki, ko te hunga wehi, me te hunga whakapono-kore, me nga kai korero teka katoa, me te hunga a ahuareka ana, a e mea ana i te teka, me te hunga puremu, me nga kai makutu, ka whiwhi ki to ratou wahi i roto i taua ahi e ka nei i te ahi i te whanariki, koia nei te matenga tuarua.

18. He pono taku e mea nei, e kore ratou e whai wahi i roto i te aranga tuatahi.

19. A, nana, ko ahau, ko te Ariki, ka mea atu nei ki a koutou, kahore koutou i tika, na enei mea hoki i roto i a koutou;

20. He ahakoa, ko ia e u ana i roto i te whakapono me te mea i taku e pai ai, ka taea e ia nga mea katoa, a ka whiwhi ki tetahi kainga ki runga ki te whenua ina tae mai te ra o te whakaahuatanga ketanga.

21. Ina whakaahuatia ketia te ao, pera me te tauira i whakaaturia ki aku apotoro i runga i te maunga; ko te raneatanga hoki o nga mo taua mea hore ano koutou i whiwhi noa.

22. A he pono hoki taku e mea atu nei ki a koutou, i te mea ahau kia whakaaturia e ahau ki a koutou, taku e pai ai, nana ka whakaaturia e ahau ki a koutou, e hara i te mea i runga i te whakahau, no to mea he tokomaha e kore nei e mea ki te pupuri i aku whakahaunga;

23. Otira ki a ia e pupuri ana i aku whakahaunga, ka hoatu e ahau nga mea ngaro o toku kingitanga, a ka ai aua mea he puna wai ora i roto i a ia, e pupu ake ana ki te oranga-tonutanga.

24. A, nana, koia tenei ko ta te Ariki, to koutou Atua e pai ai mo tana Hunga Tapu, kia huihui ratou ki te whenua o Hiona, e hara i te mea kia hohoro, kei ai he ngangau, e puta ai he mate uruta.

25. Nana, ko te whenua o Hiona, e puritia ana e ahau e te Ariki, i roto i oku ake ringaringa;

26. He ahakoa, e hoatu ana e ahau, e te Ariki, ki a Hiha nga mea a Hiha:

27. No reira, e hiahia ana ahau, te Ariki, kia hoko i nga whenua kia kore ai e raru i te ao, kia whai tika ai koutou ki runga ki te ao kia kore ai ratou e whakaohongia ki te riri;

28. No te mea e mahi ana a Hatana i roto i o ratou ngakau kia riri ki a koutou, ki te whakaheke toto;

29. No reira ma te hoko anake, ma te whakaheke toto ranei, ka riro i a koutou te whenua o Hiona, ki te kore, kahore he wahi mo koutou.

30. A me he mea he mea hoko, nana, ka manaakitia koutou;

31. A me he mea ma te whakaheke toto, i te mea e whakakahoretia ana te whakaheke toto, na, kei runga i a koutou o koutou hoa riri, a ka whiua koutou i tetahi pa ki tetahi pa, a i tetahi whare karakia i tetahi whare karakia, a he torutoru noa ake e whiwhi ki te whenua.

32. Ko ahau, ko te Ariki, e riri ana ki te hunga hara; e pupuri ana ahau i toku Wairua i te hunga o te ao.

33. Kua oati ahau i runga i toku riri, a kua mea kia ai nga whawhai i runga i te mata o te whenua, a ka whakamate te hunga hara i te hunga hara ano, a ka tan te wehi ki runga ki nga tangata katoa.

34. A tata kore te Hunga Tapu e puta; he ahakoa, kei a ratou ahau, te Ariki, a ka heke iho i te aroaro o toku Matua, a ka whakangaro i te hunga hara ki te ahi e kore nei e tineia.

35. A nana, hore ano tenei, engari a taihoa;

36. No reira, i te mea naku, na te Ariki, i mea kia puta mai enei mea katoa ki runga ki te mata o te whenua, e hiahia ana ahau me huihui toku Hunga Tapu ki runga ki te whenua o Hiona.

37. A kia mau ia tangata, ia tangata ki te tika ki roto ki ona ringaringa me te pono ki tona hope, a kia karanga i runga i te reo whakatupato ki te hunga o te whenua; a kia whakaatu i runga i te kupu me te whati, tera e tae mai te whakangaromanga ki runga ki te hunga hara.

38. No reira me whakarite e aku akonga i Katarana a ratou mea whaka-te-kikokiko, e noho nei i tenei paamu.

39. Me hoko e toku pononga, e Taituha Piringi, ko ia nei te kai tiaki, te whenua, kia whakarite ia a te ngahuru e haere ake nei mo te timata i tana haere ki te whenua o Hiona, me te hunga e noho ana ki runga ki te whenua, haunga nga mea e puritia ai e ahau ki a au ano, e kore nei e haere kia whakahaua ra ano e ahau.

40. A ko nga moni katoa e ahei ana, me tuku ake ki te whenua o Hiona, ki te hunga kua whakaritea nei e ahau kia whiwhi, kahore he tikanga ki a au, ahakoa he iti he nui ranei.

41. Nana, ka hoatu e ahau, e te Ariki, ki taku pononga ki a Hohepa Mete, tamaiti, he mana e mohio ai ia, he mea na te Wairua, ki te hunga kua whakaritea kia haere ake ki te whenua o Hiona, ki era hoki o aku akonga e noho.

42. Me pupuri tonu e toku pononga, e Nuera K. Witini tana toa, ara, mo tetahi wa poto.

43. Otira me hoatu e ia nga moni katoa e taea ana e ia te hoatu, kia tuku ake ki te whenua o Hiona.

44. Nana, kei roto enei mea i ona ringaringa ake, me whakarite e ia i runga i te whai whakaaro.

45. He pono taku e mea nei, me whakamana ia hei kai whakariterite ki nga akonga e noho ana, a me whakarite ia ki tenei mana;

46. Na kia hohoro te torotoro i nga peka (hahi), kauwhautia enei mea ki a ratou, me taku pononga me Oriwa Kautere. Nana, ko taku tenei e pai ai, kia penei te whiwhinga ki nga moni, me taku e whakahau nei.

47. Ko ia e pono ana a ka u tonu ka taea e ia te ao.

48. Ko ia e tuku moni atu ana ki te whenua o Hiona, ka whiwhi ia ki tetahi kainga i tenei ao, a ka aru ana mahi i a ia, me te utu ano i roto i tera ao:

49. Ae ra, ka koa te hunga mate e mate ana i roto i te Ariki a mua ake nei, ina haere mai te Ariki, a ka pahemo atu nga mea tawhito, a ka hou nga mea katoa, ka aru ratou i te hunga mate e kore e mate i muri atu, a ka whiwhi ki te nohoanga ki mua i te aroaro o te Ariki, i roto i te pa tapu.

50. A ko ia e ora ana a te taenga mai o te Ariki, a kua pupuri i te whakapono, ka koa ia, he ahakoa kua whakaritea kia mate ia i roto i nga tau o te tangata;

51. No reira ka tupu ake nga tamariki, a kaumatua noa, ko nga kaumatua ka mate, otira e kore ratou e moe i roto i te puehu, engari ka whakaahuatia ketia i te kimonga kautanga ano o te kanohi;

52. No konei ra i kauwhautia ai e nga apotoro ki te ao te aranga mai o te hunga mate;

53. Koia enei ko nga mea hei taringa mo koutou, a ki ta te Ariki ki, kei te tata tonu aua mea; i nga wa e tu mai nei, ae ra i nga ra o te haerenga mai o te Tama a te tangata.

54. A tae noa ki taua haora ka ai ano nga wahina kuare i waenganui o nga mea whai whakaaro, a taua haora ka tino wehea te hunga tika i te hunga hara, a i taua ra ka tono ahau i oku anahera ki te tango i te hunga hara, ki te panga i a ratou ki roto ki te kapura e kore nei e tineia.

55. A nana, he pono taku e mea atu nei ki a koutou, kahore ahau, te Ariki, e ahuareka ana ki toku pononga ki a Hirini Rikitana, e whakakake ana i a ia i roto i tona ngakau, a kahore e tango i nga tohutohu, engari e whakapouri i te Wairua;

56. No reira kahore tana tuhituhinga i pai ki te Ariki, a me mea ano e ia tetahi atu, a ki te kore tera e pai ki te Ariki, nana kua mutu tana tu i roto i te tunga i whakaritea ai ia e ahau.

57. Me tenei ano, he pono taku e mea atu nei ki a koutou, ko te hunga e hiahia ana i roto i o ratou ngakau, i runga i te mahakitanga, ki te whakatupato i te hunga hara kia ripeneta, me whakarite ratou ki tenei mana;

58. No te mea he ra tenei mo te whakatupato, e hara i te ra mo nga kupu maha. No te mea kahore ahau, te Ariki, e tawaia i nga ra whakamutunga.

59. Nana, no runga ahau, a e takoto ana toku kaha i raro. Kei runga ahau i nga mea katoa, kei roto i nga mea katoa, puta noa i nga mea katoa, a e titiro ana ki nga mea katoa, a kei te haere mai te ra e meinga ai nga mea katoa ki raro i toku mana.

60. Nana, ko ahau te Arepa me te Omeka, ae ra ko Ihu Karaiti.

61. No reira kia tupato nga tangata katoa kei whakahua noa o ratou ngutu ki toku ingoa;

62. No te mea, nana, he pono taku e mea nei, he tokomaha kei raro i tenei whakahenga, e whakahua ana i te ingoa o te Ariki a e whakahua noa ana, kahore he mana i a ratou.

63. No reira, me ripeneta te Hahi ki o ratou hara, a ka meinga ratou e ahau, e te Ariki, naku, ki te kahore ka hatepea atu ratou.

64. Maharatia nga mea e heke iho ana i runga i te tapu, a kia korerotia tupatoria, i runga hoki i ta te Wairua, a i roto i tenei kahore he whakahenga, a ka whiwhi koutou ki te Wairua he mea na te inoi; no reira, ki te kahore tenei ka ai he whakahenga ano.

65. Me rapu e aku pononga, e Hohepa Mete, tamaiti, raua ko Hirini Rikitana tetahi kainga mo raua, kia rite ki to raua whakaoranga e te Wairua he mea na te inoi.

66. Ko enei mea kia taea e koutou i runga i te manawanui, kia nui atu ai te kororia mau tonu e whiwhi ai nga mea e taea ai enei mea, ki te kahore, ka nui atu te whakahenga. Amine.