1. Whakarongo ki te reo o te Ariki o to korua Atua; ae ra, o te Arepa me te Omeka, te timatanga me te mutunga, ko tona huarahi he porowhita mutunga kore, rite tonu inanahi, inaianei, a ake, ake, ake.

2. Ko Ihu Karaiti ahau, ko te Tama a te Atua, i ripekatia ra mo nga hara o te ao, kia meinga ai hei tamariki ma te Atua nga tangata katoa e whakapono ana ki toku ingoa, ae ra, kia kotahi ratou i roto i a au me ahau i roto i te Matua, me te Matua hoki he kotahi i roto i a au, kia kotahi ai tatou.

3. Nana, he pono, he pono taku e mea nei ki taku pononga ki a Hirini, kua titiro iho ahau ki a koe me au mahi. Kua rongo ahau i au inoi, a kua whakaritea koe mo tetahi mahi nui atu.

4. Kua manaakitia koe no te mea ka mahi koe i nga mea nunui. Nana, i tonoa atu koe, e peratia ana me Hoani, ki te whakapai i te ara i mua i a au, i mua hoki i a Iraia era e haere mai, a kihai koe i matau ki aua mea.

5. I rumaki koe ki te wai hei mea ripenetatanga, heoi kihai ratou i whiwhi ki te Wairua Tapu;

6. Otiia ka hoatu e ahau he whakahaunga ki a koe, inaianei me rumaki e koe ki te wai, a ka whiwhi ratou ki te Wairua Tapu i runga i te whakapakanga ringaringa, pera me nga Apotoro onamata.

7. A tenei ake te wa ka puta he mahi nui i runga i te whenua, ae ra, i waenganui o nga Tauiwi, no te mea ka hurahia o ratou mahi wairangi he mea na a ratou mahi whakarihariha ki mua i nga kanohi o nga iwi katoa;

8. No te mea ko ahau te Atua, a kaore i whakapototia toku ringa; ka whakakite atu hoki ahau i nga merekara, i nga tohu me nga mea whakamiharo, ki te hunga katoa e whakapono ana ki toku ingoa.

9. Ko nga tangata katoa e inoi mai ana ki a au i runga i te whakapono, ka pei rewera ratou; ka whakaora ratou i nga turoro; ka meinga e ratou nga matapo kia kite, i nga turi kia rongo, i nga wahangu kia korero, me nga kopa kia haere;

10. Ka hohoro hoki te putanga mai o te wa e whakakitea atu ai nga mea nunui ki nga tamariki a te tangata;

11. Heoi ki te kahore he whakapono e kore tetahi mea e whakakitea atu ko nga whakangaromanga anake ki runga ki Papurona, ko ia tera i mea nei i nga iwi katoa kia inu i te waina o te riri o tona puremutanga.

12. A kaore he tangata e mahi ana i te pai, ko nga mea anake kua rite hei tango i te raneatanga o taku Rongo-pai kua tukua atu nei e ahau ki tenei whakatupuranga.

13. Koia ahau i karanga ai i nga mea ngoikore o te ao, i te hunga kuare me nga mea e kinongia ana, hei whiu i nga iwi ki te kaha o toku Wairua:

14. A ko to ratou ringaringa hei ringaringa moku, ko ahau hoki to ratou whakangungu rakau, me to ratou puapua; a maku e whitiki o ratou hope, a ka whawhai ratou i runga i te toa moku; a hei raro i o ratou waewae o ratou hoa riri; a ka tuku ahau i te hoari kia taka hei awhina i a ratou, a ma te kapura o toku riri ka whakaora ai ahau i a ratou.

15. Ka kauwhautia hoki te Rongo-pai ki te hunga rawa-kore, me te hunga mahaki, a ka titiro atu ratou ki te wa o toku haerenga mai, no te mea kua tata mai;

16. Me ako e ratou te kupu whakarite mo te rakau piki, no te mea kua tata mai te raumati inaianei,

17. Kua tukua atu hoki e ahau te raneatanga o taku Rongo-pai he mea na te ringa o taku pononga o Hohepa; a kua manaaki ahau i a ia i roto i te ngoikoretanga,

18. Kua hoatu hoki e ahau nga kii o te mea ngaro o nga mea kua oti te hiiri, ae ra, o nga mea mai ano o te oroko-hanganga o te ao me nga mea hoki e puta mai ai i tenei wa, a taea noatia te wa o toku haerenga mai, ki te mea ka u ia ki roto i a au, ki te kore ka whakaturia tetahi atu hei whakakapi mona.

19. No reira tiakina ia kia kore ai e taka tona whakapono, a ka hoatu e te Kai-whakamarie, e te Wairua Tapu, e matau nei ki nga mea katoa:

20. A he whakahaunga taku te hoatu nei ki a koe, kia tuhituhi koe mona; a ka hoatu nga karaipiture, kia rite ki nga mea i roto i toku ake uma, hei whakaora i aku i whiriwhiri ai;

21. No te mea ka rongo ratou ki toku reo, a ka kite i a au, e kore hoki e moe, ka tu ano hoki ratou a te ra o toku haerenga mai, no te mea ka meinga ratou kia ma, ka penei ano me au e ma ana.

22. Na ka ki atu ahau ki a koe kia noho koe i a ia, a ka haere tahi ia me koe; kaua koe e whakarere i a ia, a he pono ka rite katoa enei mea.

23. A ki te kore koe e tuhituhi, nana, ka hoatu ki a ia kia poropiti: a ko koe ka kauwhau i taku Rongo-pai me te karanga ano i nga poropiti tapu hei tautoko i ana kupu, i nga wa e hoatu ai ki a ia.

24. Puritia katoatia nga whakahaunga me nga kawenata e here nei i a korua; ka meinga hoki e ahau nga rangi kia ngaueue hei painga mo korua, a ko Hatana ka wiri, a ka koa a Hiona i runga i nga pukepuke a ka kake haere,

25. A ka whakaorangia a Iharaira a toku wa e rite ai; a ma nga kii i hoatu ai e ahau e arahina ai ratou, a e kore e whakapoauautia ano a, ake, ake.

26. Whakaarahia ake o korua ngakau kia koa, kua tata hoki to korua whakaoranga.

27. Kaua e wehi e te kahui iti, no koutou te kingitanga a taea noatia te wa e haere mai ai ahau. Nana ka hohoro toku haerenga mai. Ae ra, koia ano. Amine.