1. He pono taku e mea nei ki a koutou, ko ahau e korero ana he mea ia na te reo o toku Wairua; ae ra ko te Arepa me te Omeka, ko to koutou Ariki me to koutou Atua.

2. Whakarongo mai, E koutou kua oti nei te homai o koutou ingoa kia haere ki te whakapuaki i taku Rongo-pai, ki te kokoti ano hoki i taku maara-waina.

3. Nana, ko taku kupu tenei ki a koutou, ko taku e pai ai tenei, ara, kia haere koutou, kaua e whakaroa, noho noa iho ranei, engari me whakapau to koutou kaha,

4. Whakaarahia o koutou reo ano ko te tangi o te tetere, a whakapuakina te pono, kia rite ki ta nga whakakitenga me nga whakahaunga kua oti nei e ahau te hoatu ki a koutou,

5. A ko tenei, ki te mea e u tonu ana koutou ka riro i a koutou nga paihere maha, ka karaunatia ano ki te honore, ki te kororia, ki te pirau-kore, me te orangatonutanga.

6. No reira he pono ko taku kupu tenei ki taku pononga ki a Wiremu E. Makarereni, e whakakahoretia ana e ahau te karangatanga i hoatu ai e ahau ki a ia, ara mo te karangatanga kia haere ki nga takiwa o te rawhiti;

7. A ka hoatu e ahau tetahi karangatanga hou, me tetahi whakahaunga hou ki a ia, kei reira e whiua ana ia e ahau e te Ariki mo nga amuamutanga i roto i tona ngakau;

8. A i he ai ia, heoi ka murua tona he e ahau, a e mea atu ana ki a ia, me haere koe ki nga wahi tonga,

9. A tukua ano taku pononga a Ruka Teonehana kia haere tahi me ia ki te whakapuaki i nga mea kua whakahaua nei e ahau ki a raua,

10. E karanga ana i runga i te ingoa o te Ariki mo te Kai-whakamarie, mana raua e whakaako ki nga mea katoa e tika nei mo raua,

11. E inoi tonu ana kei hemo raua, a ki te penei raua, ko ahau hei hoa mo raua taea noatia te mutunga.

12. Nana, ko tenei ta te Ariki to koutou Atua e pai ai mo koutou, ae ra. Amine.

13. Me tenei ano he pono e mea ana te Ariki, tukua taku pononga ko Orihana Haiti raua ko taku pononga ko Hamuere H. Mete, kia haere raua ki nga wahi rawhiti, a whakapuaki i nga mea kua whakahaua nei e ahau ki a raua, a ki te mea ka u tonu raua, na, ko ahau hei hoa mo raua tae noa ki te mutunga.

14. Me tenei ano, he pono taku e mea atu nei ki taku pononga ki a Raimana Teonehana raua ko taku pononga ka Orihana Parata, e tika ana ma raua e haere ki nga wahi rawhiti. Nana, ko ahau hei hoa ano hoki mo raua tae noa ki te mutunga.

15. Me tenei ano taku e mea atu nei ki taku pononga ki a Eha Taate raua ko taku pononga ko Kawha Wirihana, kia haere hoki raua ki nga takiwa hauauru me te kauwhau i taku Rongo-pai kia rite ki taku i whakahau atu ki a raua.

16. A ko ia e u ana ka taea e ia nga mea katoa a ka whakateiteitia ake i a ia a te ra whakamutunga.

17. Me tenei ano taku e mea nei ki taku pononga ki a Meha N. Arahi, raua ko taku pononga ko Paara Rihiki, kia haere ano hoki raua ki nga wahi o te tonga;

18. Ae ra, kia haere katoa ratou pera me taku i whakahau atu ai, ma ratou e haere ki ia whare, ki ia kainga, ki ia pa.

19. A ko nga whare e tomo ai koutou, a ka manakohia koutou e ratou kia tau ta koutou manaakitanga ki taua whare.

20. A ko nga whare e tomo ai koutou ki te kahore ratou e manako i a koutou me haere wawe atu i taua whare, a whakangahoroa te puehu o o koutou waewae hei whakaatu i te he mo ratou;

21. A ka whakaki i a koutou ngakau ki te hari me te koa, kia matau hoki ki tenei, a te wa o te whakawakanga ka tu koutou hei kai-whakawa mo taua whare, me te whakatan i te he ki a ratou;

22. Heoi ka mama atu mo te hunga whakapono-kore i te ra o te whakawakanga i to taua whare; no reira whitikiria tou hope, a kia pono; a ka taea nga mea katoa e koutou a ka whakaara ake a te ra whakamutunga. Ae ra. Amine.

23. Me tenei ano e ai ta te Ariki ki a koutou, E koutou, e nga kaumatua o taku Hahi kua oti te homai i o koutou ingoa, hei mea kia mohio ai koutou ki tana e whakaaro ai mo koutou.

24. Nana, e mea atu ahau ki a koutou, ko te tikanga o te Hahi kia awhina i nga hapu o te hunga e karangatia ana, a e tonoa ana ki te kauwhau i te Rongopai ki te ao;

25. No reira ko ahau, ko te Ariki, ka hoatu tenei whakahaunga ki a koutou, kia whai kainga ai mo o koutou hapu, ki te mea e pai ai o koutou tuakana ki te aroha mai i roto i o ratou ngakau;

26. A ko ratou katoa e ahei ana te whiwhi nei ki nga kainga mo o ratou hapu, me nga atawhainga o te Hahi mo ratou, kaua nga pera e kore te haere ki te ao, ahakoa ki te rawhiti, ki te hauauru ranei, ahakoa ki te nota, ki te tonga ranei;

27. Kia inoi ai ratou, a ka whiwhi ratou, patuki, a ka uakina ki a ratou, a ka whakakitea mai i runga, he mea ia na te Kai-whakamarie, ki nga wahi e haere ai ratou.

28. A tenei ano, he pono taku e mea atu ki a koutou, a ko nga tangata katoa e takoto nei te tikanga kia mahi oranga mo tona ake hapu, me tuku ia kia pera, a e kore e kore ia te whiwhi ki tona karauna; a me mahi hoki ia i roto i te Hahi.

29. Kia u nga tangata katoa, ki te pono i roto i nga mea katoa, a ko nga tangata mangere, e kore e whai wahi i roto i te Hahi, ki te kahore ia e ripeneta, me te tahuri mai hoki i ana mahi he.

30. No reira, tukua taku pononga a Himiona Kaata raua ko taku pononga a Ima Harihi kia mahi tahi i roto i te minitatanga;

31. Me taku pononga hoki a Etera Teia, rana ko taku pononga a Tamati B. Maahi;

32. Me taku pononga hoki a Hairama Mete; raua ko taku pononga a Renara Kahuna;

33. Me taku pononga hoki a Raniera Tanatana, raua ko taku pononga a Heimoa Paranatana;

34. Me taku pononga hoki a Hiriwheta Mete, raua ko taku pononga a Kireone Kaata;

35. Me taku pononga hoki a Rakara Eeme, raua ko taku pononga ko Tepene Panati;

36. Me taku pononga hoki a Maika B. Weratana, raua ko taku pononga ko Erene Mete. Ae ra. Amine.