1. He pono taku e mea atu nei ki a koutou e oku hoa, kaua e wehi, engari kia tau te rangimarie ki o koutou ngakau, ae ra, kia koa i nga wa katoa, a i roto i nga mea katoa hoatu te whakawhetai.

2. Me te tatari marie atu hoki ki ta te Ariki, no te mea kua tae a koutou inoi ki nga tarihga o te Ariki o nga Mano, a kua oti te tuhituhi, hiiri rawa, kawenata rawa; kua oti hoki te Ariki, kua whakaari tera ka whakamanaia aua inoi;

3. No reira, ka hoatu ia i tenei kupu whakaari ki, a koutou i runga i te kawenata mau tonu, ara, ka whakamanaia aua inoi, a ko nga mea katoa i whakawhiua ai koutou ka riro hei hanga i te pai mo koutou, mo te kororia ano hoki o toku ingoa, e ai ta te Ariki.

4. Na, he pono taku e mea atu nei ki a koutou, mo runga i nga ture o te whenua, ko taku e pai ana kia tahuri taku iwi ki te whakarite i nga mea katoa e whakahaua ana e ahau;

5. A, ko te ture o te whenua, koia he ture kaupapa no te kawanatanga e tautoko ana i te tikanga o te here-koretanga kia riro tonu ai i a ratou nga tikanga mo ratou ano—Ko tena ahua o te ture no nga iwi katoa, a he mea whakaae ano ia naku;

6. No reira, ko ahau, ko te Ariki e whakaae ana kia tautoko koutou, me o koutou teina o roto i te Hahi i taua ture, koia ra nei hoki te kaupapa o nga ture kawanatanga;

7. A, o nga ture katoa i hanga mo te tangata ki te nui ake tetahi, ki te iti ranei i tenei ahua o te ture, ko tona putake mai ko te kino.

8. Naku, na te Ariki, na te Atua koutou i mea hei rangatira, no reira he tino rangatira koutou; a e whakarangatiratia ana koutou e te ture.

9. Otiia, ki te riro ko te hunga kino hei kai whakahaere tikanga, ka tangi te iwi;

10. No reira, ko ta koutou e ata rapu ai ko nga tangata tika, ko nga tangata matau, a hei nga tangata pai, hei nga tangata matau ta koutou e tautoko ai; ki te kore e pena, i putake ake i te kino.

11. Na tenei taku whakahau ki a koutou, whakarerea atu nga kino katoa, kia mau ki nga mea pai katoa, ko ta koutou noho, kia rite ki nga kupu katoa e puta mai ana i te mangai o te Atua;

12. No te mea hoki ka hoatu e ia ki te hunga e u ana hei ako i runga i te ako, hei whakahau i runga i te whakahau; a ka whakamatautauria koutou e ahau ki enei mea.

13. A, ko te tangata e tuku ana i tona oranga hei whakaaro ki taku tikanga, he whakaaro ki toku ingoa, ka kite ano i tona oranga, ara i te oranga mutungakore:

14. No reira, kaua e wehi i o koutou hoa riri, kua oati hoki ahau i roto i toku ngakau, e ai ta te Ariki, ka whakamatau ahau i a koutou i roto i nga mea katoa, kia kitea ai me he mea koutou ka u tonu te noho ki roto i taku kawenata taea noatia te matenga, he mea e kitea ai e tau ana koutou ki a au;

15. No te mea hoki, ki te kahore koutou e u ki roto i taku kawenata, kahore koutou e taungatia naku;

16. No reira, whakarerea te pakanga, karangatia ko te rangimarie, ata whakatahuritia nga ngakau o nga tamariki ki o ratou matua, nga ngakau o nga matua ki o ratou tamariki;

17. Me nga ngakau o nga Hurai ki nga poropiti, o nga poropiti ki nga Hurai, kei haere atu ahau ka kangaia te whenua katoa, a ka pau nga kikokiko i mua i a au.

18. Kei pouri o koutou ngakau, he maha hoki nga nohoanga i roto i te whare o toku Matua, a kua taka e ahau he wahi mo koutou, ko te wahi e noho ai maua ko toku Matua, ko reira ano hoki koutou.

19. Nana, ko ahau, ko te Ariki kahore i te ahuareka ki etahi o roto i te Hahi i Katarana.

20. Kahore hoki ratou i te whakarere i o ratou hara, i a ratou mahi whakarihariha, i te whakahi o o ratou ngakau, i to ratou hao ki te taonga, me a ratou tikanga whakarihariha katoa, kahore hoki i te pupuri i nga kupu o te matauranga o te oranga-tonutanga kua hoatu e ahau ki a ratou.

21. He pono taku, ko taku kupu tenei ki a koutou, ka pakia ratou e ahau, e te Ariki, ka mahia e ahau taku e pai ai ki a ratou, ki te kahore ratou e ripeneta, e pupuri hoki i aku mea katoa i whakapuaki ai ki a ratou.

22. Me tenei ano ko taku kupu tenei ki a koutou, ki te pupuri koutou i aku whakahaunga katoa, katahi ahau, te Ariki, ka whakatahuri ke i te riri i te aritarita i a koutou, a e kore nga kuwaha o te reinga e toa ki a koutou.

23. Na, ka whai kupu ahau ki a koutou mo a koutou tamariki; ki te whakawhiua koutou e nga tangata, a koutou tamariki ranei, katahi whakawhiunga, me te manawanui tonu koutou, a kahore e riri ki to ratou kino, e rapu utu ranei, ka whakawhiwhia koutou ki nga utu honore;

24. Engari ki te kahore koutou e manawanui, na ko tona tikanga kua penei, e tika ana taua whakawhiunga mo koutou.

25. Na, me he mea ki te whakawhiua ano koe e te hoari ko te rua o ana meatanga, a kahore e puaki i a koe he kupu kino mona; engari ka manawanui tonu koe ki tana mahi, tatakirau nga utu mou.

26. A, me he mea ka whakawhiua ano koe e ia, ko te tuatoru o ana meatanga, me tou manawanui tonu, takirua tatakirau nga utu mou;

27. Na, ki te kahore tou hoa riri e ripeneta, ko reira enei mea e toru tu ai hei kai whakaatu, i te he mona, e kore rawa hoki e horoia atu.

28. Na, he pono taku e mea atu nei ki a koe, ki te puta taua hoa riri ou i taku riri, e kore ia e taka ki roto ki tetahi whiu, ko te tikanga ma koutou ia e whakatupato i runga i toku ingoa kia mutu rawa taua kino ki a koutou, ki o tamariki ranei, ki nga tamariki ranei o a koutou tamariki, te toru te wha ra ano o nga whakatupuranga.

29. Na, me he mea ki te puta mai ano ia ki a koe, ki o tamariki ranei, ki nga tamariki ranei o au tamariki, te toru te wha ra ano o nga whakatupuranga; nana kua tukua tou hoa riri e ahau ki roto i ou ringaringa,

30. Heoi ki te whakaorangia ia e koe, ka whiwhi koe ki te utu mo to mahi tika; tae atu ki ou tamariki, ki nga tamariki a o tamariki, te toru te wha ra ano o nga whakatupuranga;

31. He ahakoa ra, ko tou hoa riri kei roto tonu i ou ringaringa, a me he mea ki te utua ia e koe kia rite ki ana mahi, ka whakatikaia tonutia koe, i te mea ko tana he hiahia ki te whakamate i a koe, he rapu i tou ora, na ko tou hoa riri ka tukua atu ki roto i ou ringaringa, a ki te patu koe i a ia e tika ana koe.

32. Nana, ko taku ture ano tenei i hoatu ai ki taku pononga ki a Niwhai, ki o koutou matua hoki ki a Hohepa, ki Hakopa, ki a Ihaka, ki a Aperahama, ki nga poropiti onamata ratou ko nga apotoro.

33. Ko te ture ano tena i hoatu ai e ahau ki nga iwi onamata, ara kaua rawa ratou e pakanga ki tetahi iwi, hapu, reo, huihuinga tangata ranei, ki te kahore ratou e matua whakahaua e ahau e te Ariki.

34. Na, me he mea tetahi iwi, reo, huihuinga tangata ranei, ki te whakaara pakanga ki a koutou, me hapai e koutou i te tuatahi te kara o te rangimarie ki taua huihuinga tangata, iwi, reo ranei;

35. Me he mea taua iwi ki te kahore e whakaae kia tau te rangimarie ki a koutou, ahakoa kua rua, kua toru ranei a koutou tononga ki a ratou kia kaua he pakanga, me hoatu e koutou ki te Ariki, hei tohu whakaatu ki a ia;

36. Ko reira ahau te Ariki, whakatika ai i a ratou, ka whakahau hoki ahau i a ratou kia whawhai ki taua iwi, reo, huihuinga tangata ranei.

37. A, maku, ma te Ariki, e whawhai a ratou pakanga, nga pakanga a a ratou tamariki, me nga pakanga ano a nga tamariki a o ratou tamariki, kia whiwhi utu ra ano ratou i o ratou hoa riri katoa, a te toru te wha ra ano o nga whakatupuranga.

38. Nana, hei tauira tenei ki nga iwi katoa, e ai ta te Ariki, ta te Atua, me penei hoki ka tautoko ai ahau.

39. Na, he pono taku e mea atu nei ki a koe, me he mea ka ripeneta tou hoa riri i muri i tana huakanga tuatahi ki a koe, ka haere mai, ka inoi kia murua tana e koe, me muru e koe tana he, kaua ano e waiho i muri atu hei take whakaatu mau ki te Ariki, ki te he o tou hoa riri;

40. Koia ano te mahi mau, i muri mai o tana huakanga tuarua, tuatoru ranei; i nga wa katoa e ripeneta ai tou hoa riri mo tona he ki a koe, me muru tonu e koe tana he, kia whitu tekau ra ano whitu;

41. Me he mea ia ki te he ki a koe, ko te tuatahi o nga heanga ki a koe, a kahore e ripeneta, me muru tonu e koe tana;

42. Me he mea ranei ki te tuarua tana he ki a koe, a kahore e ripeneta, me muru e koe tana he.

43. Me he mea ranei ki te toru ona heanga ki a koe, me te kore tonu e ripeneta, me whakarere tonu e koe tana he;

44. Na, ki te he mai ano ia ki a koe, ko te wha o ona heanga, kaua koe e muru i tana hara, engari mauria mai ena ki te Ariki hei whakaaturanga ki a ia, a e kore rawa aua hara e patua, kia ripeneta ra ano ia, kia tataki-wha hoki tana utu ki a koe mo nga mea katoa i he ai ia ki a koe;

45. Ki te pena tana mahi, murua katoatia e tou ngakau ona he, engari ki te kahore e pena tana mahi, maku, ma te Ariki, e rapu he utu mou i tou hoa riri kia tataki-rau mo te mea kotahi;

46. Ka rapu ano e ahau i ana tamariki, i nga tamariki ano hoki o a ratou tamariki o te hunga katoa e kino ana ki a au, te toru, te wha ra ano o nga whakatupuranga;

47. Engari ki te ripeneta nga tamariki, nga tamariki ranei a nga tamariki, ka tahuri ki te Ariki, ki to ratou Atua, i runga i te pau katoa o o ratou ngakau ki te ripeneta, me te pau katoa te kaha o o ratou hinengaro hoki, me te whakahoki mai ki a koutou kia tataki-wha nga utu mo a ratou he i he ai ratou, o ratou matua ranei, nga matua ranei o o ratou matua, ko reira me huri mai tou aritarita i a ratou,

48. A, mutu ake te rapunga i te utu i a ratou, e ai ta te Ariki, ta tou Atua, e kore hoki o ratou he e mauria mai i muri atu hei whakaatu ki a au i to ratou kino. Amine.