Wahanga 7
He whakakitenga ki a Hohepa Mete, tamaiti, raua ko Oriwa Kautere, i Hamoni, Takiwa o Penihawenia, i a Aperira, 1829, i to raua uiuinga mo Hoani, te akonga i arohaina, e noho ana ranei i te ao. He mea whakamaori no tetahi kiri hipi, he mea tuhituhi, he mea huna nana ake.
1. A ka mea te Ariki ki a au, E Hoani, e taku e aroha nei, he aha tou hiahia ? Mau hoki e inoi mai tau e pai ai, ka tukua ki a koe.
2. A ka ki atu ahau ki a ia, E te Ariki, homai ki a au he mana e taea ai te mate, kia ora ai ahau kia kumea e au he wairua ki a koe.
3. A ka mea te Ariki ki a au, he pono, he pono taku e mea nei ki a koe, i te mea he penei tou hiahia ka noho koe kia haere mai ra ano ahau i runga i toku kororia, a ka poropiti i te aroaro o nga iwi, o nga hapu, o nga reo me nga huihuinga tangata.
4. Mo konei hoki ta te Ariki i mea ai ki a Pita, ki te pai ahau kia noho ia a haere mai ra ano ahau, hei aha mau ? I hiahia hoki ia ki a au kia tuku i a ia kia kumea e ia he wairua ki a au, ko koe ia i hiahia kia tere tou haerenga mai ki a au ki toku kingitanga.
5. Ka mea nei ahau ki a koe, E Pita, he hiahia pai tenei, otira kua hiahia taku pononga i aroha ai, kia nui atu ana meatanga, ara, kia nui ake ana mahi i waenganui i te tangata, i tana i mahi ai i mua;
6. Ina, kua tangohia e ia he mahi nui ake, no reira ka meinga ia e ahau kia rite ki te mura ahi, ki tetahi anahera e minita ana: ka minita ia ki te hunga o te ao, e riro ai he hunga e tika ana mo ratou te whakaoranga.
7. Ka meinga koe e ahau kia minita mona, mo tou teina hoki, mo Hemi; ka hoatu hoki e ahau ki a koutou tokotoru tenei mana, me nga kii o tenei mahi minita, a taea noatia toku haerenga mai.
8. He pono taku e mea nei ki a korua, ka rite ki a korua hiahia, a korua e whiwhi ai, no te mea ka hari tahi korua i roto i a korua i hiahia ai.