1. E Tamati, e taku tama, ka koa koe mo tou whakapono ki taku mahi.

2. Nana, kua maha ou mamaetanga, mo tou whanau te take: otira ka manaaki ahau i a koe me tou whare; ae ra, au tamariki nonohi, a tenei ake te ra e whakapono ai ratou, e matau ai ki te pono, a ka kotahi ratou me koe i roto i taku Hahi.

3. Kia ara ake tou ngakau kia koa, no te mea kua tae mai te haora e timata ai tou mihana, a ka whakatatangatia tou arero; ka whakapuaki hoki koe i nga rongo whakahari o te koa nui ki tenei whakatupuranga.

4. Me whakapuaki e koe nga mea kua whakakitea ki taku pononga, ki a Hohepa Mete, tamaiti. Me timata koe i tenei wa ake te kauwhau; ae ra, ki te kokoti i roto i te maara kua ma, kua rite mo te tahunga:

5. Na reira, kia whakapaua tou wairua katoa ki te aki iho i tou toronaihi, a, ko ou hara kua murua, ka taumaha hoki tou tuara i nga paihere, no te mea e tika ana kia riro i te kai-mahi tona utu. No reira ka ora tou whanau.

6. Nana, he pono taku e mea nei ki a koe, me haere atu koe i a ratou mo tetahi wa poto ki te whakapuaki i taku kupu, a maku e whakarite he nohoanga mo ratou;

7. Ae ra, maku e whakatuwhera nga ngakau o nga iwi, a ka manako ratou ki a koe. A, ma tou ringa ka whakatu ai ahau i tetahi peka o te Hahi:

8. A mau ratou e whakakaha, e whakarite i a ratou mo te wa e huihui ai ratou.

9. Kia manawanui i roto i nga mamaetanga, kaua e taunu atu ki te hunga e tawai ana. Whakahaeretia tou whanau i runga i te ahua mahaki, a kia u.

10. Nana, ko taku kupu tenei ki a koe, ka ai koe he rata mo te Hahi, otira e hara i te mea mo te ao, ina, e kore ratou e manako ki a koe:

11. Haere i tou ara i nga wahi katoa e pai ai ahau, a ka hoatu ki a koe e te Kai-whakamarie tau e mea ai, me nga wahi hoki e haere ai koe.

12. Kia hono tonu te inoi, kei uru koe ki roto ki nga whakamatautauranga, a ka ngaro tou utu.

13. Kia u taea noatia te mutunga, a nana, ko au tonu kei a koe. E hara i te tangata enei kupu, i nga tangata ranei, engari naku; ae ra, na Ihu Karaiti, na tou Kai-hoko, i runga i ta te Matua i pai ai. Amine.