1. Kua tata te putanga mai o tetahi mahi nui whakamiharo ki nga tamariki a te tangata.

2. Nana, ko te Atua ahau, a kia rongo ki taku kupu e ora nei, e mana nei, koi rawa atu i tetahi hoari matarua, a wehea noatia nga ponapona me te hinu wheua, no reira, kia rongo ki aku kupu.

3. Nana kua ma te maara, kua rite noa ake mo te kotinga, no reira, ko ia e hiahia ana ki te kokoti, kia aki iho e ia i tana toronaihi i runga i tona kaha, i te roanga o te ra, kia purangatia ai mo tona wairua he oranga mutunga-kore i roto i te kingitanga o te Atua:

4. Ae ra, ko ia e aki iho ana i tana toronaihi kokoti ai, kua karangatia e te Atua.

5. No reira, e ka inoi mai korua ki a au ka whiwhi korua; e ka patuki korua ka uakina ki a korua.

6. Na, i te mea kua inoi mai korua, nana, ko taku tenei ki a korua, puritia aku whakahaunga, a me tohe ki te whakaputa, ki te whakapumau hoki i te tikanga whakaaro nui mo Hiona.

7. Engari te matauranga kia rapua, kaua te taonga, a nana, ka hurahia nga mea ngaro o te Atua ki a korua, a ko reira korua whai taonga ai. Ina ko ia he oranga-tonutanga tona e whai taonga ana ia,

8. He pono, he pono taku e mea nei ki a korua, ka rite ki ta korua inoi mai ki a au te meatanga atu ki a korua; a me he mea ka hiahia ano korua, ka ai korua hei mea e meatia ai nga painga maha i roto i tenei whakatupuranga.

9. Kati ano he kupu atu ki tenei whakatupuranga: he ripenetanga anake; puritia aku whakahaunga, a awhinitia te whakaputanga mai o taku mahi, kia rite ki aku whakahaunga, a ka manaakitia korua.

10. Nana, kei a koe he homaitanga, ka koa koe mo tou homaitanga, (mana) a, kia mahara he tapu taua homaitanga, i ahu mai hoki i te rangi:

11. A ki te uiui koe ka matau koe ki nga mea ngaro, koia nei nga mea nunui whakamiharo: no reira whakamahia tou homaitanga kia kite ai koe i nga mea ngaro, kia tokomaha ai au e whakatahuri ai ki te matauranga ki te pono, ae ra, whakamohiotia atu ratou ki te he o a ratou ara.

12. Kei whakaaturia tou homaitanga ki tetahi, engari ki te hunga ano o tou whakapono. Kei takarohia nga mea tapu.

13. Ki te mea ka pai au meatanga, ae ra, ki te u tonu i runga i te whakapono a taea noatia te mutunga, ka whakaorangia koe ki roto ki te kingitanga o te Atua koia nei te homaitanga nui rawa o nga homaitanga katoa o te Atua; no te mea, kahore he homaitanga nui atu i te oranga-tonutanga.

14. He pono, he pono taku e mea nei ki a koe, ka koa koe mo tau i mea ai, no te mea kua uiui mai koe ki a au, a, tena, i ou uiuinga katoatanga kua akona koe e taku Wairua. Me i kaua te pena, penei kua kore koe e tae ake ki te wahi e tu na koe i tenei wa.

15. Nana, e mohio na koe kua uiui mai koe ki a au, a naku tou hinengaro i whakamarama; na ka korerotia e ahau enei mea ki a koe, kia mohio koe kua whakamaramatia koe e te Wairua o te pono;

16. Ae ra, ka korero ahau ki a koe, kia mohio ai koe ko te Atua anake e matau ana ki ou whakaaro, ki nga hiahia hoki o tou ngakau:

17. I korerotia e ahau enei mea ki a koe, hei whakaatu ki a koe, ko nga kupu, ara, ko te mahi kua oti na i a koe e pono ana.

18. No reira, kia u, kia pono hoki tau tautoko i taku pononga i a Hohepa i roto i ona taumahatanga, mo te kupu te take, ahakoa i te aha, i te aha.

19. Whakatupatoria ia i roto i ana heanga, kia ngohengohe koe ki ana whakatupatoranga i a koe. Kia manawanui; kia taikaha-kore; kia peehia nga hiahia o te ngakau; kia whai-manawanui; kia whaiwhakapono, kia whai-tumanako, kia whai-aroha.

20. Nana, ko Oriwa koe, a na ou hiahia i korero ai ahau ki a koe; no reira tiakina enei kupu ki roto i tou ngakau. Kia pono koe, kia takare tonu i roto i tau pupuritanga i nga whakahaunga a te Atua, a ka awhitia koe e ahau i roto i nga ringaringa o toku aroha.

21. Nana, ko Ihu Karaiti ahau, te tama a te Atua. Ko ahau ano tera i haere atu ki toku ake, a kihai toku ake i manako mai ki a au. Ko ahau te maramatanga e tiaho ana i roto i te pouritanga te matauria e te pouritanga.

22. He pono, he pono taku e mea nei ki a koe, ki te hiahia koe ki tetahi atu whakaaturanga kia aro ou mahara ki te po i karanga ake ai koe ki a au i roto i tou ngakau, kia mohio ai koe ki te pono o enei mea.

23. Kihai ianei ahau i korero i te rangimarie ki tou hinengaro mo runga mo tenei take ? He aha atu te whakaaturanga ki a koe kei runga ake i to te Atua ?

24. A nana kua whiwhi koe ki tetahi whakaaturanga, na i te mea kua korerotia e ahau ki a koe mo nga mea kahore nei e mohiotia ana e tetahi tangata, he teka ianei kua whiwhi koe ki tetahi whakaaturanga ?

25. A nana, ka tukua atu e ahau he homaitanga ki a koe, hei whakamaori, hei pera me taku pononga me Hohepa, ki te hiahiatia e koe i a au.

26. He pono, he pono taku e mea nei ki a koe, he tuhituhinga ano kei roto nei tetahi wahi nui o toku Rongo-pai, kua puritia nei e ahau he mea na te tutu o te iwi;

27. Tenei hoki au te whakahau nei i a koe, me na he pai ou hiahia—he hiahia kia purangatia e koe he taonga mou ki te rangi—ko reira awhinatia ai e koe, he mea na tou homaitanga, te whakaputanga mai ki te maramatanga i aua wahi o aku karaipiture kua huna he mea na te tutu.

28. A nana, ka hoatu e ahau ki a koe, ara ki a korua ko toku pononga ko Hohepa, nga kii o tenei homaitanga e whakaputaina ai tenei mahi minita ki te maramatanga; a ma te mangai o nga kai-whakaatu tokorua, tokotoru ranei ka u ai nga kupu katoa.

29. He pono, he pono taku e mea nei ki a korua, ki te whakaparahakotia e ratou aku kupu, me tenei wahi o toku Rongo-pai, me taku mahi minita, ka koa korua, kahore hoki e nui atu ta ratou meatanga ki a korua i ta ratou ki a au;

30. A ki te pera ta ratou meatanga ki a korua me ta ratou meatanga ki a au, ka koa korua, ka noho hoki korua i a au i roto i te kororia;

31. Otiia ki te kore ratou e whakaparahako ki aku kupu e whakapumautia ai e te whakaaturanga e hoatu ai, ka koa ratou, ka whai koa korua i nga hua o a korua mahi.

32. He pono, he pono taku e mea nei ki a korua pera hoki me taku i mea ai ki aku akonga, i te wahi e mine ai te hunga tokorua, tokotoru ranei i runga i toku ingoa, mo te take kotahi, nana kei reira hoki ahau kei waenganui i a ratou, me ahau nei i waenganui i a korua.

33. Kaua e wehi ki te mea i te pai, e aku tama, ka rite hoki ki ta korua e rui ai, ta korua e kokoti ai. No reira, e ka ruia e korua te pai, ka kokoti ano i te pai hei utu mo korua.

34. No reira, kaua e wehi, e te kahui iti, meatia te pai; tukua noatia te whenua raua ko te reinga kia whawhai tahi atu ki a koutou, me he mea hoki kua hanga koutou ki runga ki toku kamaka e kore e taea e ratou.

35. Nana, kahore oku whakahe ki a koutou, haere i o koutou ara, a kei hara ano, whakaritea i runga i te mahaki, te mahi i whakahaua ai koutou e ahau;

36. Kia anga ake to koutou titiro ki a au i roto i nga whakaaro katoa; kaua e ruarua, kaua hoki e wehi;

37. Tirohia nga nawe o nga tunga i werohia ai toku kaokao, me nga nawe hoki o nga whao i oku ringa me oku waewae; kia mau ki te pono, puritia aku whakahaunga, ka nohoia ai e koutou te kingitanga o te rangi. Amine.