1. Ko wai te take o Hehe, i korerotia i roto i te 1, 2, 3, 4, 5 o nga rarangi o te 11 o nga upoko o Ihaia ?

2. He pono e ai ta te Ariki, ko te Karaiti.

3. He aha te tokotoko i korerotia i roto i te tahi o nga rarangi o te 11 o nga upoko o Ihaia e puta mai i roto i te Take o Hehe ?

4. Nana, ko te kupu tenei a te Ariki, he pononga ia i roto i nga ringaringa o te Karaiti, he wahi hoki no te uri o Hehe, pera ano i a Eperaima, ara i te whare o Hohepa, kei a ia nei e takoto ana te tino kaha.

5. He aha te pakiaka o Hehe i korerotia i roto i te 10 o nga rarangi o te 11 o nga upoko ?

6. Nana, ko te kupu tenei a te Ariki, he uri no Hehe, pera ano i a Hohepa, nona nei te take o te Tohungatanga, me nga kii o te kingitanga, hei tohu mo te kohikohinga o taku iwi i roto i nga ra whakamutunga.

7. Nga patai o Iraia Hikipi, e whai ake nei—“He aha te tikanga o te whakahau i a Ihaia i te 52 o nga upoko, 1 o nga rarangi, i korerotia, kakahuria to kaha e Hiona ? A ko wai te iwi e korero nei a Ihaia?”

8. E korero ana ia mo te hunga e karanga ai te Atua i roto i nga ra whakamutunga, e tika ana kia whiwhi i te kaha o te Tohungatanga hei whakaputa mai i Hiona, me te hokonga i a Iharaira; me te kakahuranga o te mana o te Tohungatanga, no te mea he take tona (Hiona), i roto i te tatai; me te hokinga ano hoki ki te kaha kua kahore nei i a ia.

9. He aha ta tatou mohiotanga mo Hiona, mo te wetekanga i tona herehere, 2 o nga rarangi ?

10. Kia mohio ai tatou ko nga morehu i whakamararatia kia hoki atu ki to ratou Ariki, mai i to ratou hinganga, ki te pera ratou, ko te kupu whakaari a te Ariki ka korero atu ia ki a ratou, ka hoatu whakakitenga ranei ki a ratou. Tirohia te 6, 7, 8 o nga rarangi. Ko te here o tona kaki nga kanga a te Atua i runga i a ia, i nga morehu a Iharaira i roto i o ratou whakamararatanga ki roto ki nga Tauiwi.