1. Whakarongo, e koutou nga kaumatua o taku Hahi, kia whai-taringa mai hoki ki nga kupu tera ka whakapuakina e au ki a koutou;

2. No te mea, nana, he pono, he pono taku e mea nei ki a koutou, kua whiwhi koutou ki tetahi whakahaunga hei ture ki taku Hahi na roto i taku i whakarite ai ahau ki a koutou hei hoatu whakahaunga, me nga whakakitenga na toku ringa.

3. A me tuturu ta koutou mohio ki tenei, ki te u ia ki roto ki a au, kaore tetahi atu e whakaritea kia whiwhi whakahaunga, whakakitenga, a kia tangohia ra ano ia.

4. Otira he pono, he pono, taku e mea nei ki a koutou, e kore tetahi atu e whakaritea mo tenei homaitanga, engari ma roto anake i a ia, ta te mea ki te tangohia i a ia, kati tona mana ko te whakarite tetahi hei whakakapi mona;

5. A me ture tenei ki a koutou, ara kauaka e manakohia tetahi whakaakoranga tera e mauria mai ki o koutou aroaro ano he whakakitenga, he whakahaunga ranei.

6. A tenei taku te hoatu nei ki a koutou kia kore ai koutou e mamingatia, kia mohio ai koutou e hara i a au aua mea.

7. No te mea he pono taku e mea nei ki a koutou, ko te tangata ka whakaritea ai e au me tomo mai i te kuwaha, a me whakapa pera me taku i mea ai ki a koutou i mua, hei whakaako i aua whakakitenga kua whiwhi na koutou, i nga whakakitenga hoki e whiwhi koutou ma roto i te tangata kua whakaritea nei e au.

8. A tenei, nana, ka hoatu whakahaunga nei e au ki a koutou, ara i nga wa e huihnia tahitia ai koutou, me tohutohu koutou, me whakakaha te whakapono o tetahi, o tetahi, kia mohio ai koutou ki te mahi tika ki te whakahaere i taku Hahi, ki te whakatau i runga i nga take o aku ture me nga whakahaunga kua hoatu nei e ahau;

9. Penei ka whakaakona koutou i roto i nga ture o taku Hahi, ka whakatapua e nga mea kua riro i a koutou, a kia herea koutou e koutou ano hei mahi i roto i nga mea tapu katoa ki toku aroaro,

10. A ki te meatia tenei e koutou, ka tapiritia he kororia ki te kingitanga kua riro nei i a koutou. Ki te kore koutou e mea i tenei mea, ka tangohia atu; ae ra, te mea kua riro na i a koutou.

11. Tahia atu e koutou te kino i roto i a koutou: whakatapua hoki koutou i toku aroaro.

12. A ki te mea e hiahia ana koutou ki nga mea kororia o te kingitanga, whakaturia e koutou taku pononga, a Hohepa Mete, tamaiti; tautokona ake hoki ia i mua i a au i runga ano i te inoi whakapono.

13. Me tenei ano ko taku kupu tenei ki a koutou, ki te hiahia koutou ki nga mea ngaro o te kingitanga, whakawhiwhia atu ia ki te kai, ki te kakahu, ki nga mea katoa ano hoki e hiahia ai ia hei whakatutuki i te mahi, kua whakahaua na ia e ahau;

14. A ki te kore e pena ta koutou mahi, me noho tonu ia i te hunga e manako na ki a ia he mea e tohungia ake ai tetahi iwi koha-kore ki a au.

15. Me tenei ano ka mea atu ahau, whakarongo e koutou, e nga kaumatua o taku Hahi, kua oti ahau te whakarite; kaore koutou i tonoa atu kia whakaakona, engari ki te whakaako i nga tamariki a te tangata ki nga mea kua tukua atu na ki o koutou ringa i runga i te mana o toku Wairua;

16. A me ahu mai te whakaakoranga mo koutou i runga, whakatapua koutou a ka whiwhi koutou ki te mana, kia hoatu ai koutou kia rite tonu ki taku i mea ai.

17. Whakarongo koutou, no te mea, nana, kua tata mai te ra nui o te Ariki.

18. No te mea kei te haere mai te ra, e puaki mai ai te reo o te Ariki i te rangi; e ngaueue ai hoki nga rangi, e wiri ai te whenua me te tetere a te Atua e roa, e kaha tona tangi, me te mea atu ki nga iwi e moe ana, koutou, e te hunga tapu, maranga, ara ake hoki; e te hunga hara e noho, e moe kia tuaruatia ra ano taku karanga;

19. No reira whitikiria o koutou hope kei rokohanga atu koutou i roto tonu i te hunga hara.

20. Whakaarahia ake o koutou reo kaua e puritia, Karanga iho ki nga iwi kia ripeneta, nga koroua, nga tamariki, nga herehere, nga here-kore, me te mea atu, kia noho takatu koutou mo te ra nui o te Ariki;

21. No te mea, ki te whakaara ake ahau, tangata nei ano i toku reo, me te mea ano kia ripeneta koutou, a kaore koutou e whakarongo mai, ka pehea ra ta koutou kupu ina tae mai te ra e riro ai ma nga whatitiri e whakapuaki ki nga pito whakamutunga o te ao, me te korero ano ki nga taringa o te hunga katoa e ora ana, me te mea, Ripeneta, whakatakatu hoki mo te ra nui o te Ariki;

22. Ae ra hoki, me tenei ano i te wa e puta mai ai te hiko i te rawhiti ki te hauauru, e puaki ai ano hoki o ratou reo ki te hunga katoa e ora ana, e werohia ai, e mea ana, Ripeneta kua tae mai hoki te ra nui o te Ariki.

23. Me tenei ano, meake puaki mai ai te reo o te Ariki i te rangi, mea ai, Whakarongo e koutou, e nga iwi o te whenua, whakarongo, e koutou ki nga kupu, a taua Atua i hangaa na koutou.

24. E nga iwi o te whenua, kia pehea te nui o aku whakaminenga mai i a koutou, pera me te heihei e whakamine mai i ana pi ki raro i ona parirau, otira kihai koutou i pai.

25. Kia pehea ano te honohono o aku karangatanga i a koutou, e karanga nei ahau ma roto i te mangai o aku pononga, ma roto ano i nga minitatanga o nga anahera, ma roto i toku ake reo, ma roto i te reo o nga whatitiri, ma roto i te reo o nga ru whenua, me nga whatu nui, ma roto i nga reo o nga tu ahua katoa o te mate uruta, ma roto ano hoki i te tangihanga nui o te tetere, ma roto i te reo o nga whakaritenga whakawa, ma roto i te reo o te atawhai, i te katoa o te ra, ma roto i te reo o te kororia, o te honore, me nga taonga utu nui a te oranga-tonutanga, me te hiahia ano kia whiwhi koutou ki te oranga-tonutanga, heoi kihai koutou i pai.

26. Na ko tenei, kua tae mai te ra, kua purena hoki te kapa o taku riri.

27. Nana, he pono taku e mea atu nei ki a koutou, ko enei kupu na te Ariki, na to koutou Atua;

28. No reira, e mahi koutou, ko te wa whakamutunga ano ia e mahi ai koutou, ko te wa whakamutunga e karanga ai koutou ki nga tangata o te whenua.

29. Na ko tenei, ka haere atu ahau i te wa e pai ai ahau ki te whakawa, a ka hokona mai toku iwi, ka kingi tahi me au ki runga i te whenua,

30. No te mea, ka tae mai te wa nui o te kotahi mano tau, kua mea nei ahau tera e haere mai, ma roto i nga mangai o aku pononga.

31. E hereherea hoki a Hatana, a ina tae mai te wa e whakahoroa ai ano ona mekameka, ka kingi ia mo tetahi wa poto nei, a ko reira tae mai ai te mutunga o te whenua:

32. A ko ia e noho ana i roto i te pono, ka rite ki te kimonga kanohi tona whakarereketanga, a ko reira pahemo atu ai te whenua me te mea na te ahi;

33. A ko reira te hunga o te kino haere ai ki roto i te ahi e kore e tineia, a ko to ratou tukunga iho kaore tetahi tangata i te ao nei e matau ana, e kore ano hoki e taea kia matau, kia tae mai ra ano ratou ki mua i a au i te wa o te whakawa.

34. Whakarongo mai koutou ki enei kupu; nana ko Ihu Karaiti ahau, ko te Kai-whakaora o te ao, Puritia enei mea ki roto i o koutou ngakau kia whai-whakaaro mo nga mea mutunga-kore.

35. Kia ata noho. Kia mau ki aku ture katoa. Ae ra, koia ano tenei. Amine.