1. Whakarongo ki te reo o Ihu Karaiti, o tou Ariki, o tou Atua, o tou Kai-hoko ano hoki, he hohoro nei tana kupu, he kaha hoki.

2. No te mea, nana, ko taku kupu tenei ki a koe, kaore he tikanga mo ta koutou e kai ai, e inu ai ranei, 1 nga wa e tango ai koutou i te hakaremeta, ki te meatia e koutou i runga i te whakaaro tapatahi atu ki toku kororia; e whakaaro ana ki te aroaro o te Matua mo taku tinana i whakatakotoria nei mo koutou, me oku toto i whakahekea nei hei murunga atu i o koutou hara:

3. No reira ahau ka whakahau atu nei ki a koutou, ara, kaua koutou e hoko i te waina, i te inumanga kaha ranei i o koutou hoa-riri:

4. No reira, kauaka e inu i tetahi mea pera, engari ko te mea anake e mahia houtia i waenganui i a koutou; ae ra, i roto i te kingitanga o toku Matua meake e hanga ai i runga i te mata o te whenua.

5. Nana, he whai-whakaaro tenei i roto i a au, no reira, aua e miharo, no te mea kei te haere mai te haora e inu tahi ai au me koe i te hua o te waina i runga i te whenua, e inu tahi ai ano hoki me Moronai i tonoa mai na e ahau ki te hura i te Pukapuka a Moromona, Kei reira nei te raneatanga o taku Rongo-pai mau tonu, kua tukua e ahau ki a ia nga kii o te tuhituhinga o te rakau o Eparaima;

6. E inu ai ano hoki me Iraia, kua tukua nei e ahau ki a ia nga kii he whakatutuki i te whakahokinga o nga mea katoa, kua korerotia nei e nga mangai o nga poropiti tapu katoa mai o te timatanga o te ao, mo nga ra whakamutunga:

7. E inu ai ano hoki me Hoani te Tama a Hakaraia i puta ra ki a ia (a Iraia) a ka whakaari i a ia tera ka riro i a ia he tama, a ko tona te ingoa me hua ko Hoani, a ka whakakia ia i te wairua o Iraia;

8. Ko taua Hoani i tonoa atu na e ahau ki a korua, ki aku pononga, ki a Hohepa Mete, tamaiti, me Oriwa Kautere, hei whakapa i a korua ki tenei tohungatanga tuatahi kua whiwhi na korua, kia karangatia ai, kia whakapangia ai korua kia pera ano i Arona:

9. E inu ai ano hoki me Iraia, kua tukua nei e ahau ki a ia nga kii o te mana ki te whakatahuri i nga ngakau o nga matua ki nga tamariki, me nga ngakau o nga tamariki ki nga matua, kia kore ai te ao katoa e whiua ki te kanga:

10. E inu ai ano hoki me Hohepa ratou ko Hakopa, ko Ihaka, ko Aperahama, o koruamatua, na ratou hoki i mau tonu ai nga kupu whakaari.

11. Me Mikaera hoki, ara, Arama, te matua o te katoa, te rangatira o te katoa, te Tuaiho Onamata.

12. E inu ai ano hoki me Pita ratou ko Hemi, ko Hoani, kua tonoa atu nei e ahau ki a korua, na roto nei hoki i a ratou i whakapa ai, i whakau ai ahau i a korua hei apotoro, hei tino kai-whakaatu whiriwhiri mo toku ingoa, a kei a ratou hoki nga kii o ta korua mahi minita, a, o nga mea pu ano i whakakitea atu e ahau ki a ratou.

13. Te hunga kua tukua nei e ahau nga kii o toku kingitanga, me te raneatanga o te Rongo-pai mo te wa whakamutunga, a mo te tutukitanga o nga wa, e huihuia tahitia ai e ahau nga mea katoa kia kotahi, nga mea i te rangi, me nga mea i runga i te whenua;

14. E inu ai me te hunga katoa o te ao kua homai nei e toku Matua ki a au:

15. No reira, kia ara ake o korua ngakau kia hari, a me te whitiki ano i o korua hope, whakakakahuria ki oku mea whawhai katoa, kia taea ai e korua te tu a te ra kino, i te mea kua whakapau korua i o korua kaha kia taea ai e korua te tu.

16. No reira, e tu, he mea whitiki o korua hope ki te pono, e mau ana hoki korua ki te pukupuka o te tika, me o korua waewae e kakahuria ana ki te Rongo-pai o te rangimarie. Kua tonoa atu e ahau i aku anahera ki te hoatu i tenei mea (te Rongo-pai) ki a korua,

17. E mau ki te whakapono hei whakangungu-rakau e taea ai e korua nga matia muramura katoa o te hunga kino:

18. E mau ki te ora, hei potae, me te hoari a toku Wairua, tera e ringihia ki runga i a korua, e mau hoki ki aku kupu e whakaaturia nei e ahau ki a korua, a kia tapatahi a korua whakaaro i runga i nga mea katoa e tonoa e korua i a au, e, kia u ki te whakapono, tae noa ki te wa e haere mai ai ahau, a ka tangohia ake korua, a ka noho korua i te wahi e noho ai ahau. Amine.