ອັບຣາຮາມ

ລູກຊາຍຂອງເຕຣາ, ເກີດໃນເມືອງອູເຣແຫ່ງເຄນເດຍ (ປຖກ 11:26, 31; 17:5). ສາດສະດາຂອງພຣະຜູ້ເປັນເຈົ້າ ຜູ້ຊຶ່ງພຣະຜູ້ເປັນເຈົ້າໄດ້ເຮັດພັນທະສັນຍານິລັນດອນໄວ້ກັບເພິ່ນ, ຊຶ່ງໂດຍຜ່ານເພິ່ນ ປະຊາຊາດທັງປວງຂອງແຜ່ນດິນໂລກຈະໄດ້ຮັບພອນ. ຊື່ດັ້ງເດີມຂອງອັບຣາຮາມແມ່ນ ອັບຣາມ.

ໄດ້ຍ້າຍໄປຢູ່ເມືອງຮາຣານ, ບ່ອນທີ່ເຕຣາໄດ້ຕາຍໄປ, ປຖກ 11:31–32 (ອຣຮ 2:1–5).
ໄດ້ຖືກເອີ້ນໂດຍພຣະເຈົ້າເພື່ອໃຫ້ເດີນທາງໄປຫາການາອານ ແລະ ເພື່ອຮັບພັນທະສັນຍາແຫ່ງສະຫວັນ, ປຖກ 12:1–8 (ອຣຮ 2:4, 15–17).
ໄດ້ເດີນທາງໄປປະເທດເອຢິບ, ປຖກ 12:9–20 (ອຣຮ 2:21–25).
ໄດ້ຕັ້ງຖິ່ນຖານຢູ່ເຮັບໂຣນ, ປຖກ 13:18.
ໄດ້ຊ່ວຍກູ້ຊີວິດຂອງໂລດ, ປຖກ 14:1–16.
ໄດ້ພົບກັບເມນຄີເສເດັກ, ປຖກ 14:18–20.
ນາງຮາກາໄດ້ເກີດລູກຊາຍໃຫ້ເພິ່ນຊື່ ອິດຊະມາເອນ, ປຖກ 16:15–16.
ຊື່ຂອງເພິ່ນໄດ້ຖືກປ່ຽນເປັນ ອັບຣາຮາມ, ປຖກ 17:5.
ພຣະຜູ້ເປັນເຈົ້າໄດ້ບອກອັບຣາຮາມ ແລະ ນາງຊາຣາ ວ່າເຂົາເຈົ້າຈະມີລູກຊາຍ, ປຖກ 17:15–22; 18:1–14.
ນາງຊາຣາໄດ້ເກີດລູກຊາຍໃຫ້ເພິ່ນຊື່ ອີຊາກ, ປຖກ 21:2–3.
ໄດ້ຖືກບັນຊາໃຫ້ຖວາຍອີຊາກ, ປຖກ 22:1–18.
ນາງຊາຣາໄດ້ຕາຍໄປ ແລະ ຖືກຝັງໄວ້, ປຖກ 23:1–2, 19.
ອັບຣາຮາມໄດ້ຕາຍໄປ ແລະ ຖືກຝັງໄວ້, ປຖກ 25:8–10.

ຄວາມເຕັມໃຈຂອງອັບຣາຮາມທີ່ຈະຖວາຍອີຊາກເປັນລັກສະນະດຽວກັນກັບພຣະເຈົ້າຖວາຍພຣະບຸດອົງດຽວທີ່ຖືກຳເນີດຂອງພຣະອົງ, ຢຄ 4:5.
ໄດ້ຈ່າຍສ່ວນສິບໃຫ້ແກ່ເມນຄີເສເດັກ, ແອວ 13:15.
ໄດ້ເຫັນລ່ວງໜ້າ ແລະ ໄດ້ເປັນພະຍານເຖິງການສະເດັດມາຂອງພຣະຄຣິດ, ຮລມ 8:16–17.

ໄດ້ຮັບຖານະປະໂລຫິດຈາກເມນຄີເສເດັກ, ຄພ 84:14.
ຄົນຊື່ສັດກາຍເປັນເຊື້ອສາຍຂອງອັບຣາຮາມ, ຄພ 84:33–34 (ຄລຕ 3:27–29).
ໄດ້ຮັບທຸກສິ່ງທັງປວງໂດຍການເປີດເຜີຍ ແລະ ໄດ້ຮັບຄວາມສູງສົ່ງຂອງເພິ່ນ, ຄພ 132:29.

ໄດ້ສະແຫວງຫາພອນຂອງບັນພະບຸລຸດ ແລະ ການມອບໝາຍສູ່ຖານະປະໂລຫິດ, ອຣຮ 1:1–4.
ໄດ້ຖືກປະໂລຫິດປອມແຫ່ງເຄນເດຍຂົ່ມເຫັງ, ອຣຮ 1:5–15.
ໄດ້ຖືກໄວ້ຊີວິດໂດຍພຣະຜູ້ເປັນເຈົ້າ, ອຣຮ 1:16–20.
ໄດ້ຮຽນຮູ້ກ່ຽວກັບດວງຕາເວັນ, ດວງເດືອນ, ແລະ ດວງດາວ, ອຣຮ 3:1–14.
ໄດ້ຮຽນຮູ້ກ່ຽວກັບຊີວິດກ່ອນເກີດ ແລະ ການສ້າງ, ອຣຮ 3:22–28.

ໜັງສືອັບຣາຮາມ

ເປັນບັນທຶກບູຮານທີ່ຖືກຂຽນໄວ້ໂດຍອັບຣາຮາມ ຊຶ່ງກາຍເປັນກຳມະສິດຂອງສາດສະໜາຈັກໃນປີ 1835. ບັນທຶກດັ່ງກ່າວ ແລະ ສົບທີ່ອາບຢາຈຳນວນໜຶ່ງໄດ້ຖືກຄົ້ນພົບເຫັນຢູ່ໃນຫ້ອງຝັງສົບໃຕ້ດິນຢູ່ປະເທດເອຢິບ ໂດຍແອນໂທນີໂອ ເລໂບໂລ, ຜູ້ໄດ້ເຮັດພິໄນກຳມອບໃຫ້ແກ່ໄມໂກ ແຊນເລີ. ທ່ານແຊນເລີໄດ້ຈັດສະແດງມັນໃນສະຫະລັດອາເມຣິກາໃນປີ 1835. ໝູ່ເພື່ອນຈຳນວນໜຶ່ງຂອງໂຈເຊັບ ສະມິດ ໄດ້ຊື້ມັນຈາກທ່ານແຊນເລີ ແລະ ໄດ້ມອບມັນໃຫ້ແກ່ສາດສະດາ, ຜູ້ໄດ້ແປມັນ. ປະຈຸບັນນີ້ ຈຳນວນໜຶ່ງຂອງບັນທຶກນີ້ມີຢູ່ໃນພຣະຄຳພີໄຂ່ມຸກອັນລ້ຳຄ່າ.

ບົດທີ 1 ບັນທຶກປະສົບການຂອງອັບຣາຮາມຢູ່ໃນເມືອງອູເຣແຫ່ງເຄນເດຍ, ບ່ອນທີ່ປະໂລຫິດທີ່ຊົ່ວຮ້າຍ ໄດ້ພະຍາຍາມຂ້າເພິ່ນເປັນເຄື່ອງຖວາຍ. ບົດທີ 2 ບອກເຖິງການເດີນທາງຂອງເພິ່ນໄປຫາການາອານ. ພຣະຜູ້ເປັນເຈົ້າໄດ້ມາປະກົດຕໍ່ເພິ່ນ ແລະ ໄດ້ເຮັດພັນທະສັນຍາກັບເພິ່ນ. ບົດທີ 3 ບັນທຶກວ່າອັບຣາຮາມໄດ້ເຫັນ ຈັກກະວານ ແລະ ຮູ້ຈັກຄວາມສຳພັນຂອງດາວພະເຄາະຕ່າງໆໃນຟ້າສະຫວັນ. ບົດທີ 4–5 ເປັນບັນທຶກອີກເຫລັ້ມໜຶ່ງຂອງການສ້າງ.

ເຊື້ອສາຍຂອງອັບຣາຮາມ

ຜູ້ທີ່ໄດ້ຮັບຄຳສັນຍາ ແລະ ພັນທະສັນຍາຕ່າງໆ ຊຶ່ງພຣະເຈົ້າໄດ້ເຮັດໄວ້ກັບອັບຣາຮາມ ໂດຍການເຊື່ອຟັງກົດ ແລະ ພິທີການແຫ່ງພຣະກິດຕິຄຸນຂອງພຣະເຢຊູຄຣິດ. ຊາຍ ແລະ ຍິງ ສາມາດຮັບພອນເຫລົ່ານີ້ ຖ້າຫາກເຂົາເປັນທາຍາດໂດຍແທ້ຂອງອັບຣາຮາມ ຫລື ຖ້າຫາກເຂົາໄດ້ຖືກຮັບເຂົ້າຢູ່ໃນຄອບຄົວຂອງອັບຣາຮາມ ໂດຍການຮັບເອົາພຣະກິດຕິຄຸນ ແລະ ຮັບບັບຕິສະມາ (ຄລຕ 3:26–29; 4:1–7; ຄພ 84:33–34; 103:17; 132:30–32; ອຣຮ 2:9–11). ຜູ້ສືບຕະກຸນໂດຍແທ້ຂອງອັບຣາຮາມ ອາດສູນເສຍພອນຈາກການບໍ່ເຊື່ອຟັງ (ຣມ 4:13; 9:6–8).