ຄວາມໝັ້ນໃຈໃນບາງສິ່ງ ຫລື ໃນບາງຄົນ. ດັ່ງທີ່ມັກໃຊ້ຢູ່ໃນພຣະຄຳພີ, ສັດທາຄືຄວາມໝັ້ນໃຈ ແລະ ຄວາມໄວ້ວາງໃຈໃນພຣະເຢຊູຄຣິດ ທີ່ນຳພາບຸກຄົນໄປເຊື່ອຟັງພຣະອົງ. ຈະຕ້ອງມີສັດທາໃນພຣະເຢຊູຄຣິດ ກ່ອນມັນຈະນຳພາບຸກຄົນໄປສູ່ຄວາມລອດ. ໄພ່ພົນຍຸກສຸດທ້າຍກໍມີສັດທາໃນພຣະເຈົ້າ ພຣະບິດາ, ພຣະວິນຍານບໍລິສຸດ, ອຳນາດຖານະປະໂລຫິດ, ແລະ ພາກສ່ວນອື່ນໆທີ່ສຳຄັນເລື່ອງການຟື້ນຟູພຣະກິດຕິຄຸນນຳອີກ.
ສັດທາແມ່ນຮ່ວມດ້ວຍຄວາມຫວັງໃນສິ່ງທີ່ບໍ່ເຄີຍເຫັນ, ແຕ່ເປັນຄວາມຈິງ (ຮຣ 11:1; ແອວ 32:21; ອທ 12:6). ສັດທາຈະມີມາໂດຍການໄດ້ຍິນພຣະກິດຕິຄຸນ ຊຶ່ງສິດສອນໂດຍຜູ້ປະຕິບັດທີ່ມີສິດ ທີ່ຖືກພຣະເຈົ້າສົ່ງມາ (ຣມ 10:14–17). ສິ່ງມະຫັດສະຈັນຈະບໍ່ເກີດຂຶ້ນກ່ອນສັດທາ, ແຕ່ສັດທາທີ່ເຂັ້ມແຂງຈະຖືກພັດທະນາຂຶ້ນໂດຍຄວາມເຊື່ອຕໍ່ພຣະກິດຕິຄຸນຂອງພຣະເຢຊູຄຣິດ. ອີກຄຳໜຶ່ງ, ສັດທາມາເຖິງໂດຍຄວາມຊອບທຳ (ແອວ 32:40–43; ອທ 12:4, 6, 12; ຄພ 63:9–12).
ສັດທາທີ່ແທ້ຈິງຈະເຮັດໃຫ້ເກີດສິ່ງມະຫັດສະຈັນ, ພາບນິມິດ, ຄວາມຝັນ, ການປິ່ນປົວ, ແລະ ຂອງປະທານທັງໝົດຂອງພຣະເຈົ້າທີ່ພຣະອົງປະທານໃຫ້ໄພ່ພົນຂອງພຣະອົງ. ໂດຍສັດທາບຸກຄົນຈະໄດ້ຮັບການປົດບາບ ແລະ ໃນທີ່ສຸດຈະສາມາດອາໄສຢູ່ໃນທີ່ປະທັບຂອງພຣະເຈົ້າໄດ້. ການຂາດສັດທາຈະພາບຸກຄົນໄປສູ່ຄວາມໝົດຫວັງ, ຊຶ່ງມາເຖິງເພາະຄວາມຊົ່ວຮ້າຍ (ມຣນ 10:22).