ແອວມາ, ລູກຊາຍຂອງແອວມາ
ໃນພຣະຄຳພີມໍມອນ, ຫົວໜ້າຜູ້ຕັດສິນຄົນທຳອິດ ແລະ ສາດສະດາໃນປະຊາຊາດນີໄຟ. ຕອນເປັນໜຸ່ມ ລາວໄດ້ພະຍາຍາມທີ່ຈະທຳລາຍສາດສະໜາຈັກ (ມຊຢ 27:8–10). ເຖິງຢ່າງໃດກໍຕາມ, ທູດໄດ້ມາປະກົດຕໍ່ລາວ ແລະ ລາວໄດ້ປ່ຽນໃຈເຫລື້ອມໃສຕໍ່ພຣະກິດຕິຄຸນ (ມຊຢ 27:8–24; ແອວ 36:6–27). ຕໍ່ມາ ລາວໄດ້ສະລະຕຳແໜ່ງເປັນຫົວໜ້າຜູ້ຕັດສິນ ເພື່ອໄປສິດສອນຜູ້ຄົນ (ແອວ 4:11–20).
ໜັງສືແອວມາ
ໜັງສືເຫລັ້ມໜຶ່ງອີກຕ່າງຫາກຢູ່ໃນພຣະຄຳພີມໍມອນ, ບັນຈຸຄຳຫຍໍ້ຈາກບັນທຶກຕ່າງໆຂອງສາດສະດາແອວມາ, ລູກຊາຍຂອງແອວມາ, ແລະ ຮີລາມັນ ລູກຊາຍຂອງເພິ່ນ. ເຫດການຕ່າງໆທີ່ໄດ້ອະທິບາຍຢູ່ໃນໜັງສືໄດ້ເກີດຂຶ້ນປະມານ 91 ເຖິງ 52 ປີ ກ່ອນ ຄ.ສ. ໜັງສືມີຢູ່ດ້ວຍກັນ 63 ບົດ. ບົດທີ 1–4 ບັນຍາຍເຖິງການກະບົດຂອງຜູ້ຕິດຕາມນີຮໍ ແລະ ອາມລິໄຊ ຕໍ່ຕ້ານຊາວນີໄຟ. ຜົນສະທ້ອນຂອງສົງຄາມເຫລົ່ານັ້ນແມ່ນເປັນການທຳລາຍທີ່ຮ້າຍແຮງທີ່ສຸດໃນປະຫວັດສາດຂອງຊາວນີໄຟທີ່ເຄີຍມີມາ. ບົດທີ 5–16 ບັນຈຸເລື່ອງລາວຂອງການເດີນທາງໄປສອນສາດສະໜາຂອງແອວມາໃນຕອນຕົ້ນ, ລວມທັງຄຳເທດສະໜາຂອງເພິ່ນເລື່ອງຜູ້ລ້ຽງທີ່ດີ (ແອວ 5) ແລະ ການສັ່ງສອນຂອງເພິ່ນກັບແອມມິວເລັກໃນເມືອງອຳໂມນໄນຮາ. ບົດທີ 17–27 ບັນຈຸບັນທຶກຂອງພວກລູກຊາຍຂອງໂມໄຊຢາ ແລະ ການປະຕິບັດສາດສະໜາກິດຂອງເຂົາເຈົ້າໃນບັນດາຊາວເລມັນ. ບົດທີ 28–44 ບັນຈຸຄຳເທດສະໜາທີ່ສຳຄັນທີ່ສຸດບາງຢ່າງຂອງແອວມາ. ໃນບົດທີ 32 ແອວມາໄດ້ປຽບທຽບພຣະຄຳໃສ່ກັບເມັດພືດ; ໃນບົດທີ 36 ເພິ່ນໄດ້ເລົ່າເລື່ອງການປ່ຽນໃຈເຫລື້ອມໃສຂອງເພິ່ນໃຫ້ຮີລາມັນ ລູກຊາຍຂອງເພິ່ນຟັງ. ບົດທີ 39–42 ບັນທຶກຄຳແນະນຳຂອງແອວມາຕໍ່ໂຄຣິອານທັນ ລູກຊາຍຂອງເພິ່ນ, ຜູ້ໄດ້ໄປພົວພັນກັບການລ່ວງລະເມີດທາງສິນທຳ; ຄຳເທດສະໜາທີ່ສຳຄັນນີ້ອະທິບາຍເຖິງຄວາມຍຸດຕິທຳ, ຄວາມເມດຕາ, ການຟື້ນຄືນພຣະຊົນ, ແລະ ການຊົດໃຊ້. ບົດທີ 45–63 ບັນຍາຍເຖິງສົງຄາມຕ່າງໆຂອງຊາວນີໄຟໃນຊ່ວງເວລານັ້ນ ແລະ ການຍ້າຍຖິ່ນຖານພາຍໃຕ້ ເຮກອດ. ຜູ້ນຳທີ່ຍິ່ງໃຫຍ່ເຊັ່ນ ນາຍທັບໂມໂຣໄນ, ທີອານຄຳ, ແລະ ລີໄຮ ໄດ້ຊ່ວຍປົກປັກຮັກສາຊາວນີໄຟ ໂດຍຜ່ານຄວາມກ້າຫານຂອງເຂົາເຈົ້າ ແລະ ການກະທຳໃນເວລາທີ່ເໝາະສົມ.