ສະມິດ, ໂຈເຊັບ, ຜູ້ລູກ
ສາດສະດາທີ່ຖືກເລືອກໃຫ້ຟື້ນຟູສາດສະໜາຈັກທີ່ແທ້ຈິງຂອງພຣະເຢຊູຄຣິດຄືນມາສູ່ແຜ່ນດິນໂລກ. ໂຈເຊັບ ສະມິດ ໄດ້ເກີດໃນລັດເວີໝ້ອນ ໃນສະຫະລັດອາເມຣິກາ ແລະ ໄດ້ມີຊີວິດຈາກປີ 1805 ເຖິງ 1844.
ໃນປີ 1820, ພຣະເຈົ້າອົງເປັນພຣະບິດາ ແລະ ພຣະເຢຊູຄຣິດ ໄດ້ປະກົດຕໍ່ໂຈເຊັບ, ແລະ ເພິ່ນໄດ້ຮຽນຮູ້ວ່າ ບໍ່ມີສາດສະໜາຈັກແຫ່ງໃດຢູ່ໃນແຜ່ນດິນໂລກ ທີ່ແທ້ຈິງ (ຈສ—ປ 1:1–20). ຕໍ່ມາ ທູດໂມໂຣໄນ ໄດ້ມາຢ້ຽມຢາມເພິ່ນ, ຜູ້ໄດ້ເປີດເຜີຍບ່ອນທີ່ແຜ່ນຈາລຶກຄຳ ທີ່ບັນຈຸບັນທຶກຂອງຜູ້ຄົນໃນສະໄໝບູຮານ ທີ່ໄດ້ອາໄສຢູ່ໃນທະວີບອາເມຣິກາ (ຈສ—ປ 1:29–54).
ໂຈເຊັບໄດ້ແປແຜ່ນຈາລຶກຄຳ ແລະ ໃນປີ 1830 ໄດ້ຈັດພິມມັນເປັນພຣະຄຳພີມໍມອນ (ຈສ—ປ 1:66–67, 75). ໃນປີ 1829, ເພິ່ນໄດ້ຮັບສິດອຳນາດຖານະປະໂລຫິດ ຈາກໂຢຮັນບັບຕິສະໂຕ ແລະ ຈາກ ເປໂຕ, ຢາໂກໂບ, ແລະ ໂຢຮັນ (ຄພ 13; 27:12; 128:20; ຈສ—ປ 1:68–70).
ຕາມທີ່ໄດ້ຮັບການຊີ້ນຳຈາກພຣະເຈົ້າ, ໃນວັນທີ 6 ເດືອນເມສາ, 1830, ໂຈເຊັບ ແລະ ຄົນອື່ນໆຫລາຍຄົນ ໄດ້ຟື້ນຟູສາດສະໜາຈັກຂອງພຣະເຢຊູຄຣິດຄືນມາໃໝ່ (ຄພ 20:1–4). ພາຍໃຕ້ການນຳພາຂອງໂຈເຊັບ, ສາດສະໜາຈັກຈຶ່ງໄດ້ເຕີບໂຕຂຶ້ນໃນປະເທດການາດາ, ປະເທດອັງກິດ, ແລະ ພາກສ່ວນໜຶ່ງໃນພາກຕາເວັນອອກຂອງສະຫະລັດອາເມຣິກາ, ໂດຍສະເພາະໃນລັດໂອໄຮໂອ, ລັດມີເຊີຣີ, ແລະ ລັດອິລິນອຍ. ການຂົ່ມເຫັງທີ່ຮ້າຍແຮງໄດ້ຕິດຕາມໂຈເຊັບ ແລະ ໄພ່ພົນຂອງພຣະເຈົ້າ ບໍ່ວ່າເຂົາເຈົ້າຈະໄປຕັ້ງຖິ່ນຖານຢູ່ບ່ອນໃດກໍຕາມ. ໃນວັນທີ 27 ເດືອນມິຖຸນາ, 1844, ໂຈເຊັບ ແລະ ໄຮຣຳ ອ້າຍຂອງເພິ່ນ ໄດ້ຖືກຂ້າຍ້ອນຄວາມເຊື່ອ ໃນເມືອງຄາດເທດ, ລັດອິລິນອຍ, ໃນສະຫະລັດອາເມຣິກາ.
ພຣະຄຳພີທີ່ໄດ້ນຳອອກມາໂດຍສາດສະດາໂຈເຊັບ ສະມິດ
ໂຈເຊັບໄດ້ແປພາກສ່ວນໜຶ່ງຂອງແຜ່ນຈາລຶກຄຳ ທີ່ທູດໂມໂຣໄນໄດ້ມອບໃຫ້ເພິ່ນ, ຊຶ່ງການແປນັ້ນ ໄດ້ຖືກຈັດພິມ ໃນປີ 1830 ເປັນພຣະຄຳພີມໍມອນ. ເພິ່ນຍັງໄດ້ຮັບການເປີດເຜີຍຫລາຍຢ່າງຈາກພຣະຜູ້ເປັນເຈົ້ານຳອີກ ໃຫ້ເຄົ້າໂຄງກ່ຽວກັບຄຳສອນຂັ້ນພື້ນຖານ ແລະ ອົງການຂອງສາດສະໜາຈັກ. ການເປີດເຜີຍຫລາຍຢ່າງເຫລົ່ານີ້ ໄດ້ຖືກຮວບຮວມໄວ້ໃນໜັງສືທີ່ເອີ້ນວ່າ ຄຳສອນ ແລະ ພັນທະສັນຍາ. ເພິ່ນເປັນຜູ້ຮັບຜິດຊອບຕໍ່ການນຳໜັງສືໄຂ່ມຸກອັນລ້ຳຄ່າອອກມາ, ຊຶ່ງບັນຈຸການແປທີ່ດົນໃຈຂອງການຂຽນບາງຢ່າງຂອງໂມເຊ, ອັບຣາຮາມ, ແລະ ມັດທາຍ, ຄັດເລືອກເອົາມາຈາກປະຫວັດ ແລະ ປະຈັກພະຍານສ່ວນຕົວຂອງເພິ່ນ, ແລະ ຂໍ້ຄວາມສິບສາມຂໍ້ເລື່ອງຄຳສອນ ແລະ ຄວາມເຊື່ອຖື ທີ່ສາດສະໜາຈັກຍຶດໝັ້ນ.