ການສື່ສານຈາກພຣະເຈົ້ານຳລູກໆຂອງພຣະອົງຢູ່ເທິງແຜ່ນດິນໂລກ. ການເປີດເຜີຍອາດມາເຖິງ ຜ່ານຄວາມສະຫວ່າງຂອງພຣະຄຣິດ ແລະ ພຣະວິນຍານບໍລິສຸດ ຜ່ານທາງການດົນໃຈ, ພາບທີ່ມາໃຫ້ເຫັນ, ຄວາມຝັນ, ຫລື ການມາຢ້ຽມຢາມຂອງທູດ. ການເປີດເຜີຍຈະໃຫ້ການນຳພາແກ່ຄົນຊອບທຳໄປສູ່ຄວາມລອດນິລັນດອນ ໃນອານາຈັກຊັ້ນສູງ.
ພຣະຜູ້ເປັນເຈົ້າເປີດເຜີຍວຽກງານຂອງພຣະອົງຕໍ່ສາດສະດາຂອງພຣະອົງ ແລະ ຢືນຢັນຕໍ່ຜູ້ທີ່ເຊື່ອ ວ່າການເປີດເຜີຍຕໍ່ສາດສະດາເປັນຄວາມຈິງ (ອມ 3:7). ຜ່ານການເປີດເຜີຍ, ພຣະຜູ້ເປັນເຈົ້າຈະໃຫ້ ການນຳພາທຸກຄົນທີ່ສະແຫວງຫາການເປີດເຜີຍ ແລະ ຜູ້ມີສັດທາ, ກັບໃຈ, ແລະ ເຊື່ອຟັງຕໍ່ພຣະກິດຕິຄຸນ ຂອງພຣະເຢຊູຄຣິດ. “ພຣະວິນຍານບໍລິສຸດ ເປັນຜູ້ເປີດເຜີຍ,” ໂຈເຊັບ ສະມິດ ໄດ້ກ່າວ, ແລະ “ບໍ່ມີມະນຸດຄົນໃດສາມາດໄດ້ຮັບພຣະວິນຍານບໍລິສຸດ ປາດສະຈາກການໄດ້ຮັບການເປີດເຜີຍ.”
ໃນສາດສະໜາຈັກຂອງພຣະຜູ້ເປັນເຈົ້າ, ຝ່າຍປະທານສູງສຸດ ແລະ ກຸ່ມອັກຄະສາວົກສິບສອງເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ຕໍ່ສາດສະໜາຈັກ ແລະ ຕໍ່ໂລກ. ປະທານຂອງສາດສະໜາຈັກ ເປັນພຽງຜູ້ດຽວເທົ່ານັ້ນທີ່ພຣະເຈົ້າໄດ້ປະທານສິດອຳນາດໃຫ້ຮັບການເປີດເຜີຍ ສຳລັບສາດສະໜາຈັກ (ຄພ 28:2–7). ທຸກຄົນສາມາດໄດ້ຮັບການເປີດເຜີຍສຳລັບຜົນປະໂຫຍດຂອງຕົນເອງ.