ເມືອງນາວູ, ລັດອິລິນອຍ (ສະຫະລັດອາເມຣິກາ)
ເມືອງໜຶ່ງທີ່ໄດ້ຖືກສ້າງຂຶ້ນໂດຍໄພ່ພົນຍຸກສຸດທ້າຍ ໃນປີ 1839 ໃນລັດອິລິນອຍ. ມັນຕັ້ງຢູ່ແຄມແມ່ນ້ຳມິດຊີຊິບປີ, ເກືອບເປັນໄລຍະຍາວເຖິງສອງຮ້ອຍໄມ (320 ກິໂລແມັດ) ເລີຍແມ່ນ້ຳຂຶ້ນໄປ ຈາກເມືອງເຊັ້ນຫລຸຍ.
ເພາະການຂົ່ມເຫັງຢູ່ໃນລັດມີເຊີຣີ, ໄພ່ພົນຂອງພຣະເຈົ້າຈຶ່ງໄດ້ຍ້າຍຂຶ້ນໄປທາງພາກເໜືອທີ່ໄກປະມານສອງຮ້ອຍໄມ, ຂ້າມແມ່ນ້ຳມິດຊີຊິບປີ, ແລະ ເຂົ້າໄປຫາລັດອິລິນອຍ, ບ່ອນທີ່ເຂົາເຈົ້າພົບເຫັນສະພາບທີ່ໜ້າພໍໃຈ. ໃນທີ່ສຸດ, ໄພ່ພົນຂອງພຣະເຈົ້າກໍໄດ້ຊື້ທີ່ດິນທີ່ຍັງບໍ່ໄດ້ພັດທະນາຂອງເມືອງຄອມເມີສ. ທີ່ດິນຕອນນີ້ແທ້ຈິງແລ້ວເປັນບຶງ ແລະ ມີອາຄານຕັ້ງຢູ່ສອງສາມບ່ອນ. ໄພ່ພົນຂອງພຣະເຈົ້າໄດ້ດູດນ້ຳອອກຈາກບຶງ ແລະ ໄດ້ສ້າງເຮືອນຂຶ້ນ. ໂຈເຊັບ ສະມິດ ໄດ້ຍ້າຍຄອບຄົວຂອງເພິ່ນໄປຢູ່ໃນເຮືອນນ້ອຍທີ່ເຮັດດ້ວຍໄມ້ທ່ອນ. ຊື່ຂອງເມືອງຄອມເມີສໄດ້ປ່ຽນເປັນເມືອງນາວູ, ຕາມພາສາເຮັບເຣີ ສຳລັບຄຳວ່າ “ສວຍງາມ.”
ຫລາຍພາກໃນພຣະຄຳພີຄຳສອນ ແລະ ພັນທະສັນຍາ ໄດ້ຖືກຂຽນຢູ່ໃນເມືອງນາວູ (ຄພ 124–129; 132; 135). ໄພ່ພົນຂອງພຣະເຈົ້າໄດ້ຖືກສັ່ງໃຫ້ສ້າງພຣະວິຫານຢູ່ໃນເມືອງນາວູ (ຄພ 124:26–27). ເຂົາເຈົ້າໄດ້ສ້າງພຣະວິຫານ ແລະ ໄດ້ຈັດຕັ້ງສະເຕກຂອງຊີໂອນຂຶ້ນ ກ່ອນເຂົາເຈົ້າຖືກຂັບໄລ່ໜີຈາກບ້ານເຮືອນຂອງເຂົາເຈົ້າໃນປີ 1846. ເພາະການຂົ່ມເຫັງນີ້, ໄພ່ພົນຂອງພຣະເຈົ້າຈຶ່ງໄດ້ໜີຈາກເຂດນີ້ ແລະ ໄດ້ເດີນທາງໄປຫາພາກຕາເວັນຕົກ.