ພຣະຄຳພີມໍມອນ
ໜຶ່ງໃນພຣະຄຳພີສີ່ເຫລັ້ມ ຊຶ່ງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຮັບຮູ້. ມັນເປັນການຫຍໍ້ບັນທຶກໂດຍສາດສະດາມໍມອນກ່ຽວກັບບັນທຶກຂອງຜູ້ຄົນໃນສະໄໝບູຮານທີ່ອາໄສຢູ່ອາເມຣິກາ. ມັນໄດ້ຖືກຂຽນໄວ້ເພື່ອເປັນພະຍານວ່າພຣະເຢຊູຄືພຣະຄຣິດ. ກ່ຽວກັບບັນທຶກນີ້, ສາດສະດາໂຈເຊັບ ສະມິດ, ຜູ້ໄດ້ແປມັນໂດຍຂອງປະທານ ແລະ ອຳນາດຂອງພຣະເຈົ້າ, ໄດ້ກ່າວວ່າ: “ຂ້າພະເຈົ້າໄດ້ບອກບັນດາອ້າຍນ້ອງວ່າ ພຣະຄຳພີມໍມອນເປັນໜັງສືທີ່ຖືກຕ້ອງຫລາຍກວ່າໜັງສືໃດໆຢູ່ເທິງແຜ່ນດິນໂລກ, ແລະ ເປັນຫີນເສົາເອກຂອງສາດສະໜາຂອງເຮົາ, ແລະ ມະນຸດຈະເຂົ້າໃກ້ພຣະເຈົ້າຫລາຍຂຶ້ນໂດຍການຍຶດໝັ້ນກັບກົດເກນຂອງໜັງສືເຫລັ້ມນີ້” (ເບິ່ງ ຄຳນຳຢູ່ທາງໜ້າຂອງພຣະຄຳພີມໍມອນ).
ພຣະຄຳພີມໍມອນເປັນບັນທຶກທາງສາດສະໜາຂອງຜູ້ຄົນສາມກຸ່ມ ຊຶ່ງໄດ້ຍົກຍ້າຍຈາກໂລກເກົ່າໄປຫາທະວີບອາເມຣິກາ. ກຸ່ມຜູ້ຄົນເຫລົ່ານີ້ໄດ້ຖືກນຳພາໂດຍສາດສະດາ ຜູ້ໄດ້ບັນທຶກປະຫວັດສາດທາງສາດສະໜາ ແລະ ທາງໂລກຂອງພວກເຂົາໄວ້ໃນແຜ່ນຈາລຶກ. ພຣະຄຳພີມໍມອນບັນທຶກການສະເດັດມາຢ້ຽມຢາມຂອງພຣະເຢຊູຄຣິດຕໍ່ຜູ້ຄົນໃນອາເມຣິກາຫລັງຈາກການຟື້ນຄືນພຣະຊົນຂອງພຣະອົງ. ມີສັນຕິສຸກເປັນເວລາສອງຮ້ອຍປີຫລັງຈາກການສະເດັດມາຢ້ຽມຢາມຂອງພຣະຄຣິດ.
ໂມໂຣໄນ, ສາດສະດາ ແລະ ນັກປະຫວັດສາດຄົນສຸດທ້າຍຂອງຊາວນີໄຟ, ໄດ້ຜະນຶກບັນທຶກສະບັບຫຍໍ້ຂອງຜູ້ຄົນເຫລົ່ານີ້ ແລະ ໄດ້ເຊື່ອງມັນໄວ້ ເມື່ອປະມານ ຄ.ສ. 421. ໃນປີ 1823, ໂມໂຣໄນທີ່ໄດ້ຟື້ນຄືນຊີວິດແລ້ວໄດ້ມາຢ້ຽມຢາມໂຈເຊັບ ສະມິດ ແລະ ຕໍ່ມາໄດ້ມອບບັນທຶກບູຮານ ແລະ ສັກສິດເຫລົ່ານີ້ໃຫ້ເພິ່ນເພື່ອແປ ແລະ ນຳອອກມາສູ່ໂລກໃນຖານະເປັນປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ.