ພຣະຄຣິດ (ພາສາກຣີກ) ແລະ ພຣະເມຊີອາ (ພາສາເຮັບເຣີ) ໝາຍເຖິງ “ຜູ້ທີ່ຖືກເຈີມ.” ພຣະເຢຊູຄຣິດ ເປັນລູກກົກທາງວິນຍານຂອງພຣະບິດາ (ຮຣ 1:6; ຄພ 93:21). ພຣະອົງເປັນພຣະອົງດຽວທີ່ຖືກຳເນີດຈາກພຣະບິດາໃນເນື້ອໜັງ (ຢຮ 1:14; 3:16). ພຣະອົງເປັນພຣະເຢໂຮວາ (ຄພ 110:3–4) ແລະ ໄດ້ຮັບການແຕ່ງຕັ້ງລ່ວງໜ້າຕໍ່ການເອີ້ນທີ່ຍິ່ງໃຫຍ່ຂອງພຣະອົງກ່ອນການສ້າງໂລກ. ພາຍໃຕ້ການຊີ້ນຳຂອງພຣະບິດາ, ພຣະເຢຊູໄດ້ສ້າງແຜ່ນດິນໂລກ ແລະ ທຸກສິ່ງທີ່ຢູ່ໃນນັ້ນ (ຢຮ 1:3, 14; ມຊ 1:31–33). ພຣະອົງໄດ້ມາກຳເນີດນຳນາງມາຣີ ໃນເບັດເລເຮັມ, ໄດ້ໃຊ້ຊີວິດທີ່ປາດສະຈາກບາບ, ແລະ ໄດ້ທຳການຊົດໃຊ້ທີ່ດີເລີດແທນບາບຂອງມະນຸດຊາດທັງປວງ ໂດຍການຫລັ່ງໂລຫິດ ແລະ ປະທານຊີວິດຢູ່ເທິງໄມ້ກາງແຂນ (ມທ 2:1; 1 ນຟ 11:13–33; 3 ນຟ 27:13–16; ຄພ 76:40–42). ພຣະອົງໄດ້ຟື້ນຄືນພຣະຊົນ, ດັ່ງນັ້ນຈຶ່ງເປັນສິ່ງປະກັນວ່າມະນຸດຊາດທັງປວງກໍຈະຟື້ນຄືນຊີວິດຄືກັນ. ຜ່ານການຊົດໃຊ້ ແລະ ການຟື້ນຄືນພຣະຊົນຂອງພຣະເຢຊູ, ຜູ້ທີ່ກັບໃຈຈາກບາບຂອງຕົນ ແລະ ເຊື່ອຟັງຕໍ່ພຣະບັນຍັດຂອງພຣະເຈົ້າ ຈະສາມາດອາໄສຢູ່ນຳພຣະເຢຊູ ແລະ ພຣະບິດາຕະຫລອດການ (2 ນຟ 9:10–12; 21–22; ຄພ 76:50–53, 62).
ພຣະເຢຊູຄຣິດເປັນພຣະຜູ້ຍິ່ງໃຫຍ່ ທີ່ໄດ້ມາເກີດຢູ່ໃນໂລກນີ້. ຊີວິດຂອງພຣະອົງເປັນຕົວຢ່າງທີ່ດີເລີດ ເຖິງວິທີທີ່ມະນຸດຊາດທັງປວງຄວນດຳລົງຊີວິດ. ຄຳອະທິຖານ, ພອນ, ແລະ ພິທີການຂອງຖານະປະໂລຫິດທັງໝົດ ຄວນເປັນໄປໃນພຣະນາມຂອງພຣະອົງ. ພຣະອົງເປັນພຣະຜູ້ເປັນເຈົ້າຂອງບັນດາພຣະຜູ້ເປັນເຈົ້າທັງຫລາຍ, ເປັນມະຫາກະສັດຂອງບັນດາກະສັດທັງຫລາຍ, ເປັນພຣະຜູ້ສ້າງ, ເປັນພຣະຜູ້ຊ່ວຍໃຫ້ລອດ, ແລະ ເປັນພຣະເຈົ້າຂອງທັງແຜ່ນດິນໂລກ.
ພຣະເຢຊູຄຣິດຈະສະເດັດມາອີກໃນອຳນາດ ແລະ ລັດສະໝີພາບ ເພື່ອປົກຄອງຢູ່ເທິງແຜ່ນດິນໂລກ ໃນໄລຍະພັນປີ. ໃນວັນສຸດທ້າຍ, ພຣະອົງຈະພິພາກສາມະນຸດຊາດທັງປວງ (ແອວ 11:40–41; ຈສ—ມ 1).
ການສະຫລຸບພຣະຊົນຊີບຂອງພຣະອົງ (ໃນລຳດັບຂອງເຫດການທີ່ເກີດຂຶ້ນ)
ການທຳນາຍກ່ຽວກັບການກຳເນີດ ແລະ ການສິ້ນພຣະຊົນຂອງພຣະເຢຊູຄຣິດ
ການປະກົດຕົວຂອງພຣະຄຣິດຫລັງຈາກຊີວິດມະຕະ
ການເປັນຢູ່ຂອງພຣະຄຣິດກ່ອນມະຕະ
ການປົກຄອງຂອງພຣະຄຣິດໃນລະຫວ່າງພັນປີ
ການຮັບເອົາພຣະນາມຂອງພຣະເຢຊູຄຣິດໄວ້ກັບເຮົາ
ຕົວຢ່າງຂອງພຣະເຢຊູຄຣິດ
ປະຈັກພະຍານເຖິງພຣະເຢຊູຄຣິດ
ລັດສະໝີພາບຂອງພຣະເຢຊູຄຣິດ
ຮູບແບບ ຫລື ເຄື່ອງໝາຍເຖິງພຣະຄຣິດ